১৩. সুমেধবুদ্ধৰংসো

১. পদুমুত্তরস্স অপরেন, সুমেধো নাম নাযকো;

দুরাসদো উগ্গতেজো, সব্বলোকুত্তমো মুনি.

২. পসন্ননেত্তো সুমুখো, ব্রহা উজু পতাপৰা;

হিতেসী সব্বসত্তানং, বহূ মোচেসি বন্ধনা.

৩. যদা বুদ্ধো পাপুণিত্ৰা, কেৰলং বোধিমুত্তমং;

সুদস্সনম্হি নগরে, ধম্মচক্কং পৰত্তযি.

৪. তস্সাপি অভিসমযা তীণি, অহেসুং ধম্মদেসনে;

কোটিসতসহস্সানং, পঠমাভিসমযো অহু.

৫. পুনাপরং কুম্ভকণ্ণং, যক্খং সো দমযী জিনো;

নৰুতিকোটিসহস্সানং, দুতিযাভিসমযো অহু.

৬. পুনাপরং অমিতযসো, চতুসচ্চং পকাসযি;

অসীতিকোটিসহস্সানং, ততিযাভিসমযো অহু.

৭. সন্নিপাতা তযো আসুং, সুমেধস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. সুদস্সনং নাম নগরং, উপগঞ্ছি জিনো যদা;

তদা খীণাসৰা ভিক্খূ, সমিংসু সতকোটিযো.

৯. পুনাপরং দেৰকূটে, ভিক্খূনং কথিনত্থতে;

তদা নৰুতিকোটীনং, দুতিযো আসি সমাগমো.

১০. পুনাপরং দসবলো, যদা চরতি চারিকং;

তদা অসীতিকোটীনং, ততিযো আসি সমাগমো.

১১. অহং তেন সমযেন, উত্তরো নাম মাণৰো;

অসীতিকোটিযো ময্হং, ঘরে সন্নিচিতং ধনং.

১২. কেৰলং সব্বং দত্ৰান, সসঙ্ঘে লোকনাযকে;

সরণং তস্সুপগঞ্ছিং, পব্বজ্জঞ্চাভিরোচযিং.

১৩. সোপি মং বুদ্ধো ব্যাকাসি, করোন্তো অনুমোদনং;

‘‘তিংসকপ্পসহস্সম্হি, অযং বুদ্ধো ভৰিস্সতি.

১৪. ‘‘পধানং পদহিত্ৰান…পে… হেস্সাম সম্মুখা ইমং’’.

১৫. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৬. সুত্তন্তং ৰিনযঞ্চাপি, নৰঙ্গং সত্থুসাসনং;

সব্বং পরিযাপুণিত্ৰান, সোভযিং জিনসাসনং.

১৭. তত্থপ্পমত্তো ৰিহরন্তো, নিসজ্জট্ঠানচঙ্কমে;

অভিঞ্ঞাসু পারমিং গন্ত্ৰা, ব্রহ্মলোকমগঞ্ছহং.

১৮. সুদস্সনং নাম নগরং, সুদত্তো নাম খত্তিযো;

সুদত্তা নাম জনিকা, সুমেধস্স মহেসিনো.

১৯. নৰৰস্সসহস্সানি, অগারং অজ্ঝ সো ৰসি;

সুচন্দকঞ্চনসিরিৰড্ঢা, তযো পাসাদমুত্তমা.

২০. তিসোল়সসহস্সানি, নারিযো সমলঙ্কতা;

সুমনা নাম সা নারী, পুনব্বসু নাম অত্রজো.

২১. নিমিত্তে চতুরো দিস্ৰা, হত্থিযানেন নিক্খমি;

অনূনকং অড্ঢমাসং, পধানং পদহী জিনো.

২২. ব্রহ্মুনা যাচিতো সন্তো, সুমেধো লোকনাযকো;

ৰত্তি চক্কং মহাৰীরো, সুদস্সনুয্যানমুত্তমে.

২৩. সরণো সব্বকামো চ, অহেসুং অগ্গসাৰকা;

সাগরো নামুপট্ঠাকো, সুমেধস্স মহেসিনো.

২৪. রামা চেৰ সুরামা চ, অহেসুং অগ্গসাৰিকা;

বোধি তস্স ভগৰতো, মহানীপোতি ৰুচ্চতি.

২৫. উরুৰেলা যসৰা চ, অহেসুং অগ্গুপট্ঠকা;

যসোধরা সিরিমা চ [যসা নাম সিরিমা চ (স্যা. কং.)], অহেসুং অগ্গুপট্ঠিকা.

২৬. অট্ঠাসীতিরতনানি, অচ্চুগ্গতো মহামুনি;

ওভাসেতি দিসা সব্বা, চন্দো তারগণে যথা.

২৭. চক্কৰত্তিমণী নাম, যথা তপতি যোজনং;

তথেৰ তস্স রতনং, সমন্তা ফরতি যোজনং.

২৮. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৯. তেৰিজ্জছল়ভিঞ্ঞেহি, বলপ্পত্তেহি তাদিহি;

সমাকুলমিদং আসি, অরহন্তেহি সাধুহি.

৩০. তেপি সব্বে অমিতযসা, ৰিপ্পমুত্তা নিরূপধী;

ঞাণালোকং দস্সযিত্ৰা, নিব্বুতা তে মহাযসা.

৩১. সুমেধো জিনৰরো বুদ্ধো, মেধারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

সুমেধস্স ভগৰতো ৰংসো একাদসমো.