১৪. সুজাতবুদ্ধৰংসো

১. তত্থেৰ মণ্ডকপ্পম্হি, সুজাতো নাম নাযকো;

সীহহনুসভক্খন্ধো, অপ্পমেয্যো দুরাসদো.

২. চন্দোৰ ৰিমলো সুদ্ধো, সতরংসীৰ পতাপৰা;

এৰং সোভতি সম্বুদ্ধো, জলন্তো সিরিযা সদা.

৩. পাপুণিত্ৰান সম্বুদ্ধো, কেৰলং বোধিমুত্তমং;

সুমঙ্গলম্হি নগরে, ধম্মচক্কং পৰত্তযি.

৪. দেসেন্তে [দেসেন্তো (স্যা. কং.)] পৰরং ধম্মং, সুজাতে লোকনাযকে [সুজাতো লোকনাযকো (স্যা. কং.)];

অসীতিকোটী অভিসমিংসু, পঠমে ধম্মদেসনে.

৫. যদা সুজাতো অমিতযসো, দেৰে ৰস্সং উপাগমি;

সত্ততিংসসতসহস্সানং, দুতিযাভিসমযো অহু.

৬. যদা সুজাতো অসমসমো, উপগচ্ছি পিতুসন্তিকং;

সট্ঠিসতসহস্সানং [সত্ততিংসসহস্সানং (সী.)], ততিযাভিসমযো অহু.

৭. সন্নিপাতা তযো আসুং, সুজাতস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. অভিঞ্ঞাবলপ্পত্তানং, অপ্পত্তানং ভৰাভৰে;

সট্ঠিসতসহস্সানি, পঠমং সন্নিপতিংসু তে.

৯. পুনাপরং সন্নিপাতে, তিদিৰোরোহণে জিনে;

পঞ্ঞাসসতসহস্সানং, দুতিযো আসি সমাগমো.

১০. উপসঙ্কমন্তো নরাসভং, তস্স যো অগ্গসাৰকো;

চতূহি সতসহস্সেহি, সম্বুদ্ধং উপসঙ্কমি.

১১. অহং তেন সমযেন, চতুদীপম্হি ইস্সরো;

অন্তলিক্খচরো আসিং, চক্কৰত্তী মহব্বলো.

১২. লোকে অচ্ছরিযং দিস্ৰা, অব্ভুতং লোমহংসনং;

উপগন্ত্ৰান ৰন্দিং সো, সুজাতং লোকনাযকং.

১৩. চতুদীপে মহারজ্জং, রতনে সত্ত উত্তমে;

বুদ্ধে নিয্যাদযিত্ৰান, পব্বজিং তস্স সন্তিকে.

১৪. আরামিকা জনপদে, উট্ঠানং পটিপিণ্ডিয;

উপনেন্তি ভিক্খুসঙ্ঘস্স, পচ্চযং সযনাসনং.

১৫. সোপি মং বুদ্ধো [তদা (স্যা. কং.)] ব্যাকাসি, দসসহস্সিম্হি ইস্সরো;

‘‘তিংসকপ্পসহস্সম্হি, অযং বুদ্ধো ভৰিস্সতি.

১৬. ‘‘পধানং পদহিত্ৰান…পে… হেস্সাম সম্মুখা ইমং’’.

১৭. তস্সাপি ৰচনং সুত্ৰা, ভিয্যো হাসং জনেসহং;

অধিট্ঠহিং ৰতং উগ্গং, দসপারমিপূরিযা.

১৮. সুত্তন্তং ৰিনযঞ্চাপি, নৰঙ্গং সত্থুসাসনং;

সব্বং পরিযাপুণিত্ৰান, সোভযিং জিনসাসনং.

১৯. তত্থপ্পমত্তো ৰিহরন্তো, ব্রহ্মং ভাৰেত্ৰ ভাৰনং;

অভিঞ্ঞাপারমিং গন্ত্ৰা, ব্রহ্মলোকমগঞ্ছহং.

২০. সুমঙ্গলং নাম নগরং, উগ্গতো নাম খত্তিযো;

মাতা পভাৰতী নাম, সুজাতস্স মহেসিনো.

২১. নৰৰস্সসহস্সানি, অগারং অজ্ঝ সো ৰসি;

সিরী উপসিরী নন্দো, তযো পাসাদমুত্তমা.

২২. তেৰীসতিসহস্সানি, নারিযো সমলঙ্কতা;

সিরিনন্দা নাম নারী, উপসেনো নাম অত্রজো.

২৩. নিমিত্তে চতুরো দিস্ৰা, অস্সযানেন নিক্খমি;

অনূননৰমাসানি, পধানং পদহী জিনো.

২৪. ব্রহ্মুনা যাচিতো সন্তো, সুজাতো লোকনাযকো;

ৰত্তি চক্কং মহাৰীরো, সুমঙ্গলুয্যানমুত্তমে.

২৫. সুদস্সনো সুদেৰো চ, অহেসুং অগ্গসাৰকা;

নারদো নামুপট্ঠাকো, সুজাতস্স মহেসিনো.

২৬. নাগা চ নাগসমালা চ, অহেসুং অগ্গসাৰিকা;

বোধি তস্স ভগৰতো, মহাৰেল়ূতি ৰুচ্চতি.

২৭. সো চ রুক্খো ঘনক্খন্ধো [ঘনরুচিরো (সী. ক.)], অচ্ছিদ্দো হোতি পত্তিকো;

উজু ৰংসো ব্রহা হোতি, দস্সনীযো মনোরমো.

২৮. একক্খন্ধো পৰড্ঢিত্ৰা, ততো সাখা পভিজ্জতি;

যথা সুবদ্ধো মোরহত্থো, এৰং সোভতি সো দুমো.

২৯. ন তস্স কণ্টকা হোন্তি, নাপি ছিদ্দং মহা অহু;

ৰিত্থিণ্ণসাখো অৰিরলো, সন্দচ্ছাযো মনোরমো.

৩০. সুদত্তো চেৰ চিত্তো চ, অহেসুং অগ্গুপট্ঠকা;

সুভদ্দা চ পদুমা চ, অহেসুং অগ্গুপট্ঠিকা.

৩১. পঞ্ঞাসরতনো আসি, উচ্চত্তনেন সো জিনো;

সব্বাকারৰরূপেতো, সব্বগুণমুপাগতো.

৩২. তস্স পভা অসমসমা, নিদ্ধাৰতি সমন্ততো;

অপ্পমাণো অতুলিযো, ওপম্মেহি অনূপমো.

৩৩. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩৪. যথাপি সাগরে ঊমী, গগনে তারকা যথা;

এৰং তদা পাৰচনং, অরহন্তেহি চিত্তিতং [চিত্তকং (স্যা. কং.)].

৩৫. সো চ বুদ্ধো অসমসমো, গুণানি চ তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা.

৩৬. সুজাতো জিনৰরো বুদ্ধো, সিলারামম্হি নিব্বুতো;

তত্থেৰ তস্স চেতিযো [তত্থেৰ চেতিযো সত্থু (স্যা. কং.)], তীণিগাৰুতমুগ্গতোতি.

সুজাতস্স ভগৰতো ৰংসো দ্ৰাদসমো.