১৫. পিযদস্সীবুদ্ধৰংসো

১. সুজাতস্স অপরেন, সযম্ভূ লোকনাযকো;

দুরাসদো অসমসমো, পিযদস্সী মহাযসো.

২. সোপি বুদ্ধো অমিতযসো, আদিচ্চোৰ ৰিরোচতি;

সব্বং তমং নিহন্ত্ৰান, ধম্মচক্কং পৰত্তযি.

৩. তস্সাপি অতুলতেজস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. সুদস্সনো দেৰরাজা, মিচ্ছাদিট্ঠিমরোচযি;

তস্স দিট্ঠিং ৰিনোদেন্তো, সত্থা ধম্মমদেসযি.

৫. জনসন্নিপাতো অতুলো, মহাসন্নিপতী তদা;

নৰুতিকোটিসহস্সানং, দুতিযাভিসমযো অহু.

৬. যদা দোণমুখং হত্থিং, ৰিনেসি নরসারথি;

অসীতিকোটিসহস্সানং, ততিযাভিসমযো অহু.

৭. সন্নিপাতা তযো আসুং, তস্সাপি পিযদস্সিনো;

কোটিসতসহস্সানং, পঠমো আসি সমাগমো.

৮. ততো পরং নৰুতিকোটী, সমিংসু একতো মুনী;

ততিযে সন্নিপাতম্হি, অসীতিকোটিযো অহূ.

৯. অহং তেন সমযেন, কস্সপো নাম ব্রাহ্মণো [মানৰো (স্যা. কং.)];

অজ্ঝাযকো মন্তধরো, তিণ্ণং ৰেদান পারগূ.

১০. তস্স ধম্মং সুণিত্ৰান, পসাদং জনযিং অহং;

কোটিসতসহস্সেহি, সঙ্ঘারামং অমাপযিং.

১১. তস্স দত্ৰান আরামং, হট্ঠো সংৰিগ্গমানসো;

সরণে পঞ্চ সীলে চ [সরণং পঞ্চসীলঞ্চ (সী.)], দল়্হং কত্ৰা সমাদিযিং.

১২. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘অট্ঠারসে কপ্পসতে, অযং বুদ্ধো ভৰিস্সতি.

১৩. ‘‘পধানং পদহিত্ৰান…পে… হেস্সাম সম্মুখা ইমং’’.

১৪. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৫. সুধঞ্ঞং নাম নগরং, সুদত্তো নাম খত্তিযো;

চন্দা নামাসি জনিকা, পিযদস্সিস্স সত্থুনো.

১৬. নৰৰস্সসহস্সানি, অগারং অজ্ঝ সো ৰসি;

সুনিম্মলৰিমলগিরিগুহা, তযো পাসাদমুত্তমা.

১৭. তেত্তিংসসহস্সানি চ, নারিযো সমলঙ্কতা;

ৰিমলা নাম নারী চ, কঞ্চনাৰেল়ো নাম অত্রজো.

১৮. নিমিত্তে চতুরো দিস্ৰা, রথযানেন নিক্খমি;

ছমাসং পধানচারং, অচরী পুরিসুত্তমো.

১৯. ব্রহ্মুনা যাচিতো সন্তো, পিযদস্সী মহামুনি;

ৰত্তি চক্কং মহাৰীরো, উসভুয্যানে মনোরমে.

২০. পালিতো সব্বদস্সী চ, অহেসুং অগ্গসাৰকা;

সোভিতো নামুপট্ঠাকো, পিযদস্সিস্স সত্থুনো.

২১. সুজাতা ধম্মদিন্না চ, অহেসুং অগ্গসাৰিকা;

বোধি তস্স ভগৰতো, ককুধোতি পৰুচ্চতি.

২২. সন্ধকো ধম্মকো চেৰ, অহেসুং অগ্গুপট্ঠকা;

ৰিসাখা ধম্মদিন্না চ, অহেসুং অগ্গুপট্ঠিকা.

২৩. সোপি বুদ্ধো অমিতযসো, দ্ৰত্তিংসৰরলক্খণো;

অসীতিহত্থমুব্বেধো, সালরাজাৰ দিস্সতি.

২৪. অগ্গিচন্দসূরিযানং, নত্থি তাদিসিকা পভা;

যথা অহু পভা তস্স, অসমস্স মহেসিনো.

২৫. তস্সাপি দেৰদেৰস্স, আযু তাৰতকং অহু;

নৰুতিৰস্সসহস্সানি, লোকে অট্ঠাসি চক্খুমা.

২৬. সোপি বুদ্ধো অসমসমো, যুগানিপি তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা.

২৭. পিযদস্সী মুনিৰরো, অস্সত্থারামম্হি নিব্বুতো;

তত্থেৰস্স জিনথূপো, তীণিযোজনমুগ্গতোতি.

পিযদস্সিস্স ভগৰতো ৰংসো তেরসমো.