১৬. অত্থদস্সীবুদ্ধৰংসো

১. তত্থেৰ মণ্ডকপ্পম্হি, অত্থদস্সী মহাযসো;

মহাতমং নিহন্ত্ৰান, পত্তো সম্বোধিমুত্তমং.

২. ব্রহ্মুনা যাচিতো সন্তো, ধম্মচক্কং পৰত্তযি;

অমতেন তপ্পযী লোকং, দসসহস্সিসদেৰকং.

৩. তস্সাপি লোকনাথস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. যদা বুদ্ধো অত্থদস্সী, চরতে দেৰচারিকং;

কোটিসতসহস্সানং, দুতিযাভিসমযো অহু.

৫. পুনাপরং যদা বুদ্ধো, দেসেসি পিতুসন্তিকে;

কোটিসতসহস্সানং, ততিযাভিসমযো অহু.

৬. সন্নিপাতা তযো আসুং, তস্সাপি চ মহেসিনো;

খীণাসৰানং ৰিমলানং, সন্তচিত্তান তাদিনং.

৭. অট্ঠনৰুতিসহস্সানং, পঠমো আসি সমাগমো;

অট্ঠাসীতিসহস্সানং, দুতিযো আসি সমাগমো.

৮. অট্ঠসত্ততিসতসহস্সানং, ততিযো আসি সমাগমো;

অনুপাদা ৰিমুত্তানং, ৰিমলানং মহেসিনং.

৯. অহং তেন সমযেন, জটিলো উগ্গতাপনো;

সুসীমো নাম নামেন, মহিযা সেট্ঠসম্মতো.

১০. দিব্বং মন্দারৰং পুপ্ফং, পদুমং পারিছত্তকং;

দেৰলোকাহরিত্ৰান, সম্বুদ্ধমভিপূজযিং.

১১. সোপি মং বুদ্ধো ব্যাকাসি, অত্থদস্সী মহামুনি;

‘‘অট্ঠারসে কপ্পসতে, অযং বুদ্ধো ভৰিস্সতি.

১২. ‘‘পধানং পদহিত্ৰান…পে… হেস্সাম সম্মুখা ইমং’’.

১৩. তস্সাপি ৰচনং সুত্ৰা, হট্ঠো [তুট্ঠো (স্যা. কং.)] সংৰিগ্গমানসো;

উত্তরিং ৰতমধিট্ঠাসিং, দসপারমিপূরিযা.

১৪. সোভণং নাম নগরং, সাগরো নাম খত্তিযো;

সুদস্সনা নাম জনিকা, অত্থদস্সিস্স সত্থুনো.

১৫. দসৰস্সসহস্সানি, অগারং অজ্ঝ সো ৰসি;

অমরগিরি সুগিরি ৰাহনা, তযো পাসাদমুত্তমা.

১৬. তেত্তিংসঞ্চ সহস্সানি, নারিযো সমলঙ্কতা;

ৰিসাখা নাম নারী চ, সেলো নামাসি অত্রজো.

১৭. নিমিত্তে চতুরো দিস্ৰা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

১৮. ব্রহ্মুনা যাচিতো সন্তো, অত্থদস্সী মহাযসো;

ৰত্তি চক্কং মহাৰীরো, অনোমুয্যানে নরাসভো.

১৯. সন্তো চ উপসন্তো চ, অহেসুং অগ্গসাৰকা;

অভযো নামুপট্ঠাকো, অত্থদস্সিস্স সত্থুনো.

২০. ধম্মা চেৰ সুধম্মা চ, অহেসুং অগ্গসাৰিকা;

বোধি তস্স ভগৰতো, চম্পকোতি পৰুচ্চতি.

২১. নকুলো চ নিসভো চ, অহেসুং অগ্গুপট্ঠকা;

মকিলা চ সুনন্দা চ, অহেসুং অগ্গুপট্ঠিকা.

২২. সোপি বুদ্ধো অসমসমো, অসীতিহত্থমুগ্গতো;

সোভতে সালরাজাৰ, উল়ুরাজাৰ পূরিতো.

২৩. তস্স পাকতিকা রংসী, অনেকসতকোটিযো;

উদ্ধং অধো দস দিসা, ফরন্তি যোজনং সদা.

২৪. সোপি বুদ্ধো নরাসভো, সব্বসত্তুত্তমো মুনি;

ৰস্সসতসহস্সানি, লোকে অট্ঠাসি চক্খুমা.

২৫. অতুলং দস্সেত্ৰা ওভাসং, ৰিরোচেত্ৰা সদেৰকে [অতুলং দস্সযিত্ৰান, ওভাসেত্ৰা সদেৰকে (সী. ক.)];

সোপি অনিচ্চতং পত্তো, যথগ্গুপাদানসঙ্খযা.

২৬. অত্থদস্সী জিনৰরো, অনোমারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

অত্থদস্সিস্স ভগৰতো ৰংসো চুদ্দসমো.