৫. মঙ্গলবুদ্ধৰংসো

১. কোণ্ডঞ্ঞস্স অপরেন, মঙ্গলো নাম নাযকো;

তমং লোকে নিহন্ত্ৰান, ধম্মোক্কমভিধারযি.

২. অতুলাসি পভা তস্স, জিনেহঞ্ঞেহি উত্তরিং;

চন্দসূরিযপভং হন্ত্ৰা, দসসহস্সী ৰিরোচতি.

৩. সোপি বুদ্ধো পকাসেসি, চতুরো সচ্চৰরুত্তমে;

তে তে সচ্চরসং পীত্ৰা, ৰিনোদেন্তি মহাতমং.

৪. পত্ৰান বোধিমতুলং, পঠমে ধম্মদেসনে;

কোটিসতসহস্সানং, ধম্মাভিসমযো অহু.

৫. সুরিন্দদেৰভৰনে, বুদ্ধো ধম্মমদেসযি;

তদা কোটিসহস্সানং [নৰকোটিসহস্সানং (সী.)], দুতিযো সমযো অহু.

৬. যদা সুনন্দো চক্কৰত্তী, সম্বুদ্ধং উপসঙ্কমি;

তদা আহনি সম্বুদ্ধো, ধম্মভেরিং ৰরুত্তমং.

৭. সুনন্দস্সানুচরা জনতা, তদাসুং নৰুতিকোটিযো;

সব্বেপি তে নিরৰসেসা, অহেসুং এহি ভিক্খুকা.

৮. সন্নিপাতা তযো আসুং, মঙ্গলস্স মহেসিনো;

কোটিসতসহস্সানং, পঠমো আসি সমাগমো.

৯. দুতিযো কোটিসতসহস্সানং, ততিযো নৰুতিকোটিনং;

খীণাসৰানং ৰিমলানং, তদা আসি সমাগমো.

১০. অহং তেন সমযেন, সুরুচী নাম ব্রাহ্মণো;

অজ্ঝাযকো মন্তধরো, তিণ্ণং ৰেদান পারগূ.

১১. তমহং উপসঙ্কম্ম, সরণং গন্ত্ৰান সত্থুনো;

সম্বুদ্ধপ্পমুখং সঙ্ঘং, গন্ধমালেন পূজযিং;

পূজেত্ৰা গন্ধমালেন, গৰপানেন তপ্পযিং.

১২. সোপি মং বুদ্ধো ব্যাকাসি, মঙ্গলো দ্ৰিপদুত্তমো;

‘‘অপরিমেয্যিতো কপ্পে, অযং বুদ্ধো ভৰিস্সতি.

১৩. ‘‘পধানং পদহিত্ৰান…পে… হেস্সাম সম্মুখা ইমং’’.

১৪. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দস পারমিপূরিযা.

১৫. তদা পীতিমনুব্রূহন্তো, সম্বোধিৰরপত্তিযা;

বুদ্ধে দত্ৰান মং গেহং, পব্বজিং তস্স সন্তিকে.

১৬. সুত্তন্তং ৰিনযঞ্চাপি, নৰঙ্গং সত্থুসাসনং;

সব্বং পরিযাপুণিত্ৰা, সোভযিং জিনসাসনং.

১৭. তত্থপ্পমত্তো ৰিহরন্তো, ব্রহ্মং ভাৰেত্ৰ ভাৰনং;

অভিঞ্ঞাপারমিং গন্ত্ৰা, ব্রহ্মলোকমগচ্ছহং.

১৮. উত্তরং নাম নগরং, উত্তরো নাম খত্তিযো;

উত্তরা নাম জনিকা, মঙ্গলস্স মহেসিনো.

১৯. নৰৰস্সসহস্সানি, অগারং অজ্ঝ সো ৰসি;

যসৰা সুচিমা সিরীমা, তযো পাসাদমুত্তমা.

২০. সমতিংসসহস্সানি, নারিযো সমলঙ্কতা;

যসৰতী নাম নারী, সীৰলো নাম অত্রজো.

২১. নিমিত্তে চতুরো দিস্ৰা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

২২. ব্রহ্মুনা যাচিতো সন্তো, মঙ্গলো নাম নাযকো;

ৰত্তি চক্কং মহাৰীরো, ৰনে সিরীৰরুত্তমে.

২৩. সুদেৰো ধম্মসেনো চ, অহেসুং অগ্গসাৰকা;

পালিতো নামুপট্ঠাকো, মঙ্গলস্স মহেসিনো.

২৪. সীৰলা চ অসোকা চ, অহেসুং অগ্গসাৰিকা;

বোধি তস্স ভগৰতো, নাগরুক্খোতি ৰুচ্চতি.

২৫. নন্দো চেৰ ৰিসাখো চ, অহেসুং অগ্গুপট্ঠকা;

অনুলা চেৰ সুতনা চ, অহেসুং অগ্গুপট্ঠিকা.

২৬. অট্ঠাসীতি রতনানি, অচ্চুগ্গতো মহামুনি;

ততো নিদ্ধাৰতী রংসী, অনেকসতসহস্সিযো.

২৭. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৮. যথাপি সাগরে ঊমী, ন সক্কা তা গণেতুযে;

তথেৰ সাৰকা তস্স, ন সক্কা তে গণেতুযে.

২৯. যাৰ অট্ঠাসি সম্বুদ্ধো, মঙ্গলো লোকনাযকো;

ন তস্স সাসনে অত্থি, সকিলেসমরণং [সংকিলেসমরণং (সী.)] তদা.

৩০. ধম্মোক্কং ধারযিত্ৰান, সন্তারেত্ৰা মহাজনং;

জলিত্ৰা ধূমকেতূৰ, নিব্বুতো সো মহাযসো.

৩১. সঙ্খারানং সভাৰত্থং, দস্সযিত্ৰা সদেৰকে;

জলিত্ৰা অগ্গিক্খন্ধোৰ, সূরিযো অত্থঙ্গতো যথা.

৩২. উয্যানে ৰস্সরে নাম, বুদ্ধো নিব্বাযি মঙ্গলো;

তত্থেৰস্স জিনথূপো, তিংসযোজনমুগ্গতোতি.

মঙ্গলস্স ভগৰতো ৰংসো ততিযো.