৬. সুমনবুদ্ধৰংসো

১. মঙ্গলস্স অপরেন, সুমনো নাম নাযকো;

সব্বধম্মেহি অসমো, সব্বসত্তানমুত্তমো.

২. তদা অমতভেরিং সো, আহনী মেখলে পুরে;

ধম্মসঙ্খসমাযুত্তং, নৰঙ্গং জিনসাসনং.

৩. নিজ্জিনিত্ৰা কিলেসে সো, পত্ৰা সম্বোধিমুত্তমং;

মাপেসি নগরং সত্থা, সদ্ধম্মপুরৰরুত্তমং.

৪. নিরন্তরং অকুটিলং, উজুং ৰিপুলৰিত্থতং;

মাপেসি সো মহাৰীথিং, সতিপট্ঠানৰরুত্তমং.

৫. ফলে চত্তারি সামঞ্ঞে, চতস্সো পটিসম্ভিদা;

ছল়ভিঞ্ঞাট্ঠসমাপত্তী, পসারেসি তত্থ ৰীথিযং.

৬. যে অপ্পমত্তা অখিলা, হিরিৰীরিযেহুপাগতা;

তে তে ইমে গুণৰরে, আদিযন্তি যথা সুখং.

৭. এৰমেতেন যোগেন, উদ্ধরন্তো মহাজনং;

বোধেসি পঠমং সত্থা, কোটিসতসহস্সিযো.

৮. যম্হি কালে মহাৰীরো, ওৰদী তিত্থিযে গণে;

কোটিসহস্সাভিসমিংসু [কোটিসতসহস্সানি (স্যা. কং.), কোটিসতসহস্সানং (ক.)], দুতিযে ধম্মদেসনে.

৯. যদা দেৰা মনুস্সা চ, সমগ্গা একমানসা;

নিরোধপঞ্হং পুচ্ছিংসু, সংসযঞ্চাপি মানসং.

১০. তদাপি ধম্মদেসনে, নিরোধপরিদীপনে;

নৰুতিকোটিসহস্সানং, ততিযাভিসমযো অহু.

১১. সন্নিপাতা তযো আসুং, সুমনস্স মহেসিনো;

খীণাসৰানং ৰিমলানং, সন্তচিত্তান তাদিনং.

১২. ৰস্সংৰুত্থস্স ভগৰতো, অভিঘুট্ঠে পৰারণে;

কোটিসতসহস্সেহি, পৰারেসি তথাগতো.

১৩. ততোপরং সন্নিপাতে, ৰিমলে কঞ্চনপব্বতে;

নৰুতিকোটিসহস্সানং, দুতিযো আসি সমাগমো.

১৪. যদা সক্কো দেৰরাজা, বুদ্ধদস্সনুপাগমি;

অসীতিকোটিসহস্সানং, ততিযো আসি সমাগমো.

১৫. অহং তেন সমযেন, নাগরাজা মহিদ্ধিকো;

অতুলো নাম নামেন, উস্সন্নকুসলসঞ্চযো.

১৬. তদাহং নাগভাৰনা, নিক্খমিত্ৰা সঞাতিভি;

নাগানং দিব্বতুরিযেহি, সসঙ্ঘং জিনমুপট্ঠহিং.

১৭. কোটিসতসহস্সানং, অন্নপানেন তপ্পযিং;

পচ্চেকদুস্সযুগং দত্ৰা, সরণং তমুপাগমিং.

১৮. সোপি মং বুদ্ধো ব্যাকাসি, সুমনো লোকনাযকো;

‘‘অপরিমেয্যিতো কপ্পে, অযং বুদ্ধো ভৰিস্সতি.

১৯. ‘‘পধানং পদহিত্ৰান…পে… হেস্সাম সম্মুখা ইমং’’.

২০. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

২১. নগরং মেখলং নাম [মেখলং নাম নগরং (সী. স্যা.)], সুদত্তো নাম খত্তিযো;

সিরিমা নাম জনিকা, সুমনস্স মহেসিনো.

২২. নৰৰস্সসহস্সানি, অগারং অজ্ঝ সো ৰসি;

চন্দো সুচন্দো ৰটংসো চ, তযো পাসাদমুত্তমা.

২৩. তেসট্ঠিসতসহস্সানি, নারিযো সমলঙ্কতা;

ৰটংসিকা নাম নারী, অনূপমো নাম অত্রজো.

২৪. নিমিত্তে চতুরো দিস্ৰা, হত্থিযানেন নিক্খমি;

অনূনদসমাসানি, পধানং পদহী জিনো.

২৫. ব্রহ্মুনা যাচিতো সন্তো, সুমনো লোকনাযকো;

ৰত্তি চক্কং মহাৰীরো, মেখলে পুরমুত্তমে.

২৬. সরণো ভাৰিতত্তো চ, অহেসুং অগ্গসাৰকা;

উদেনো নামুপট্ঠাকো, সুমনস্স মহেসিনো.

২৭. সোণা চ উপসোণা চ, অহেসুং অগ্গসাৰিকা;

সোপি বুদ্ধো অমিতযসো, নাগমূলে অবুজ্ঝথ.

২৮. ৰরুণো চেৰ সরণো চ, অহেসুং অগ্গুপট্ঠকা;

চালা চ উপচালা চ, অহেসুং অগ্গুপট্ঠিকা.

২৯. উচ্চত্তনেন [উচ্চতরেন (ক.)] সো বুদ্ধো, নৰুতিহত্থমুগ্গতো;

কঞ্চনগ্ঘিযসঙ্কাসো, দসসহস্সী ৰিরোচতি.

৩০. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩১. তারণীযে তারযিত্ৰা, বোধনীযে চ বোধযি;

পরিনিব্বাযি সম্বুদ্ধো, উল়ুরাজাৰ অত্থমি.

৩২. তে চ খীণাসৰা ভিক্খূ, সো চ বুদ্ধো অসাদিসো;

অতুলপ্পভং দস্সযিত্ৰা, নিব্বুতা যে মহাযসা.

৩৩. তঞ্চ ঞাণং অতুলিযং, তানি চ অতুলানি রতনানি;

সব্বং তমন্তরহিতং, ননু রিত্তা সব্বসঙ্খারা.

৩৪. সুমনো যসধরো বুদ্ধো, অঙ্গারামম্হি নিব্বুতো;

তত্থেৰ তস্স জিনথূপো, চতুযোজনমুগ্গতোতি.

সুমনস্স ভগৰতো ৰংসো চতুত্থো.