২৪. ককুসন্ধবুদ্ধৰংসো

১. ৰেস্সভুস্স অপরেন, সম্বুদ্ধো দ্ৰিপদুত্তমো;

ককুসন্ধো নাম নামেন, অপ্পমেয্যো দুরাসদো.

২. উগ্ঘাটেত্ৰা সব্বভৰং, চরিযায পারমিং গতো;

সীহোৰ পঞ্জরং ভেত্ৰা, পত্তো সম্বোধিমুত্তমং.

৩. ধম্মচক্কং পৰত্তেন্তে, ককুসন্ধে লোকনাযকে;

চত্তারীসকোটিসহস্সানং, ধম্মাভিসমযো অহু.

৪. অন্তলিক্খম্হি আকাসে, যমকং কত্ৰা ৰিকুব্বনং;

তিংসকোটিসহস্সানং, বোধেসি দেৰমানুসে.

৫. নরদেৰস্স যক্খস্স, চতুসচ্চপ্পকাসনে;

ধম্মাভিসমযো তস্স, গণনাতো অসঙ্খিযো.

৬. ককুসন্ধস্স ভগৰতো, একো আসি সমাগমো;

খীণাসৰানং ৰিমলানং, সন্তচিত্তান তাদিনং.

৭. চত্তালীসসহস্সানং, তদা আসি সমাগমো;

দন্তভূমিমনুপ্পত্তানং, আসৰারিগণক্খযা.

৮. অহং তেন সমযেন, খেমো নামাসি খত্তিযো;

তথাগতে জিনপুত্তে, দানং দত্ৰা অনপ্পকং.

৯. পত্তঞ্চ চীৰরং দত্ৰা, অঞ্জনং মধুলট্ঠিকং;

ইমেতং পত্থিতং সব্বং, পটিযাদেমি ৰরং ৰরং.

১০. সোপি মং বুদ্ধো ব্যাকাসি, ককুসন্ধো ৰিনাযকো;

‘‘ইমম্হি ভদ্দকে কপ্পে, অযং বুদ্ধো ভৰিস্সতি.

১১. ‘‘অহু কপিলৰ্হযা রম্মা…পে… হেস্সাম সম্মুখা ইমং’’.

১২. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৩. নগরং খেমাৰতী নাম, খেমো নামাসহং তদা;

সব্বঞ্ঞুতং গৰেসন্তো, পব্বজিং তস্স সন্তিকে.

১৪. ব্রাহ্মণো অগ্গিদত্তো চ, আসি বুদ্ধস্স সো পিতা;

ৰিসাখা নাম জনিকা, ককুসন্ধস্স সত্থুনো.

১৫. ৰসতে তত্থ খেমে পুরে, সম্বুদ্ধস্স মহাকুলং;

নরানং পৰরং সেট্ঠং, জাতিমন্তং মহাযসং.

১৬. চতুৰস্সসহস্সানি, অগারং অজ্ঝ সো ৰসি;

কাম -কামৰণ্ণ-কামসুদ্ধিনামা [সুচি সুরুচি রতিৰদ্ধননামকা (সী.)], তযো পাসাদমুত্তমা.

১৭. সমতিংসসহস্সানি, নারিযো সমলঙ্কতা;

রোচিনী নাম সা নারী, উত্তরো নাম অত্রজো.

১৮. নিমিত্তে চতুরো দিস্ৰা, রথযানেন নিক্খমি;

অনূনঅট্ঠমাসানি, পধানং পদহী জিনো.

১৯. ব্রহ্মুনা যাচিতো সন্তো, ককুসন্ধো ৰিনাযকো;

ৰত্তি চক্কং মহাৰীরো, মিগদাযে নরুত্তমো.

২০. ৰিধুরো চ সঞ্জীৰো চ, অহেসুং অগ্গসাৰকা;

বুদ্ধিজো নামুপট্ঠাকো, ককুসন্ধস্স সত্থুনো.

২১. সামা চ চম্পানামা চ, অহেসুং অগ্গসাৰিকা;

বোধি তস্স ভগৰতো, সিরীসোতি পৰুচ্চতি.

২২. অচ্চুতো চ সুমনো চ, অহেসুং অগ্গুপট্ঠকা;

নন্দা চেৰ সুনন্দা চ, অহেসুং অগ্গুপট্ঠিকা.

২৩. চত্তালীসরতনানি, অচ্চুগ্গতো মহামুনি;

কনকপ্পভা নিচ্ছরতি, সমন্তা দসযোজনং.

২৪. চত্তালীসৰস্সসহস্সানি, আযু তস্স মহেসিনো;

তাৰতা তিট্ঠমানো সো, তারেসি জনতং বহুং.

২৫. ধম্মাপণং পসারেত্ৰা, নরনারীনং সদেৰকে;

নদিত্ৰা সীহনাদংৰ, নিব্বুতো সো সসাৰকো.

২৬. অট্ঠঙ্গৰচনসম্পন্নো, অচ্ছিদ্দানি নিরন্তরং;

সব্বং তমন্তরহিতং, ননু রিত্তা সব্বসঙ্খারা.

২৭. ককুসন্ধো জিনৰরো, খেমারামম্হি নিব্বুতো;

তত্থেৰস্স থূপৰরো, গাৰুতং নভমুগ্গতোতি.

ককুসন্ধস্স ভগৰতো ৰংসো দ্ৰাৰীসতিমো.