২৫. কোণাগমনবুদ্ধৰংসো

১. ককুসন্ধস্স অপরেন, সম্বুদ্ধো দ্ৰিপদুত্তমো;

কোণাগমনো নাম জিনো, লোকজেট্ঠো নরাসভো.

২. দসধম্মে পূরযিত্ৰান, কন্তারং সমতিক্কমি;

পৰাহিয মলং সব্বং, পত্তো সম্বোধিমুত্তমং.

৩. ধম্মচক্কং পৰত্তেন্তে, কোণাগমননাযকে;

তিংসকোটিসহস্সানং, পঠমাভিসমযো অহু.

৪. পাটিহীরং করোন্তে চ, পরৰাদপ্পমদ্দনে;

ৰীসতিকোটিসহস্সানং, দুতিযাভিসমযো অহু.

৫. ততো ৰিকুব্বনং কত্ৰা, জিনো দেৰপুরং গতো;

ৰসতে তত্থ সম্বুদ্ধো, সিলায পণ্ডুকম্বলে.

৬. পকরণে সত্ত দেসেন্তো, ৰস্সং ৰসতি সো মুনি;

দসকোটিসহস্সানং, ততিযাভিসমযো অহু.

৭. তস্সাপি দেৰদেৰস্স, একো আসি সমাগমো;

খীণাসৰানং ৰিমলানং, সন্তচিত্তান তাদিনং.

৮. তিংসভিক্খুসহস্সানং, তদা আসি সমাগমো;

ওঘানমতিক্কন্তানং, ভিজ্জিতানঞ্চ মচ্চুযা.

৯. অহং তেন সমযেন, পব্বতো নাম খত্তিযো;

মিত্তামচ্চেহি সম্পন্নো, অনন্তবলৰাহনো.

১০. সম্বুদ্ধদস্সনং গন্ত্ৰা, সুত্ৰা ধম্মমনুত্তরং;

নিমন্তেত্ৰা সজিনসঙ্ঘং, দানং দত্ৰা যদিচ্ছকং.

১১. পট্টুণ্ণং চীনপট্টঞ্চ, কোসেয্যং কম্বলম্পি চ;

সোৰণ্ণপাদুকঞ্চেৰ, অদাসিং সত্থুসাৰকে.

১২. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘ইমম্হি ভদ্দকে কপ্পে, অযং বুদ্ধো ভৰিস্সতি.

১৩. ‘‘অহু কপিলৰ্হযা রম্মা…পে… হেস্সাম সম্মুখা ইমং’’.

১৪. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৫. সব্বঞ্ঞুতং গৰেসন্তো, দানং দত্ৰা নরুত্তমে;

ওহাযাহং মহারজ্জং, পব্বজিং জিনসন্তিকে [তস্স সন্তিকে (সী.)].

১৬. নগরং সোভৰতী নাম, সোভো নামাসি খত্তিযো;

ৰসতে তত্থ নগরে, সম্বুদ্ধস্স মহাকুলং.

১৭. ব্রাহ্মণো যঞ্ঞদত্তো চ, আসি বুদ্ধস্স সো পিতা;

উত্তরা নাম জনিকা, কোণাগমনস্স সত্থুনো.

১৮. তীণি ৰস্সসহস্সানি, অগারং অজ্ঝ সো ৰসি;

তুসিতসন্তুসিতসন্তুট্ঠা, তযো পাসাদমুত্তমা.

১৯. অনূনসোল়সসহস্সানি, নারিযো সমলঙ্কতা;

রুচিগত্তা নাম নারী, সত্থৰাহো নাম অত্রজো.

২০. নিমিত্তে চতুরো দিস্ৰা, হত্থিযানেন নিক্খমি;

ছমাসং পধানচারং, অচরী পুরিসুত্তমো.

২১. ব্রহ্মুনা যাচিতো সন্তো, কোণাগমননাযকো;

ৰত্তি চক্কং মহাৰীরো, মিগদাযে নরুত্তমো.

২২. ভিয্যসো উত্তরো নাম, অহেসুং অগ্গসাৰকা;

সোত্থিজো নামুপট্ঠাকো, কোণাগমনস্স সত্থুনো.

২৩. সমুদ্দা উত্তরা চেৰ, অহেসুং অগ্গসাৰিকা;

বোধি তস্স ভগৰতো, উদুম্বরোতি পৰুচ্চতি.

২৪. উগ্গো চ সোমদেৰো চ, অহেসুং অগ্গুপট্ঠকা;

সীৰলা চেৰ সামা চ, অহেসুং অগ্গুপট্ঠিকা.

২৫. উচ্চত্তনেন সো বুদ্ধো, তিংসহত্থসমুগ্গতো;

উক্কামুখে যথা কম্বু, এৰং রংসীহি মণ্ডিতো.

২৬. তিংসৰস্সসহস্সানি, আযু বুদ্ধস্স তাৰদে;

তাৰতা তিট্ঠমানো সো, তারেসি জনতং বহুং.

২৭. ধম্মচেতিং সমুস্সেত্ৰা, ধম্মদুস্সৰিভূসিতং;

ধম্মপুপ্ফগুল়ং কত্ৰা, নিব্বুতো সো সসাৰকো.

২৮. মহাৰিলাসো তস্স জনো, সিরিধম্মপ্পকাসনো;

সব্বং তমন্তরহিতং, ননু রিত্তা সব্বসঙ্খারা.

২৯. কোণাগমনো সম্বুদ্ধো, পব্বতারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

কোণাগমনস্স ভগৰতো ৰংসো তেৰীসতিমো.