২৩. ৰেস্সভূবুদ্ধৰংসো

১. তত্থেৰ মণ্ডকপ্পম্হি, অসমো অপ্পটিপুগ্গলো;

ৰেস্সভূ নাম নামেন, লোকে উপ্পজ্জি নাযকো [সো জিনো (স্যা. কং. ক.)].

২. আদিত্তং ৰত রাগগ্গি, তণ্হানং ৰিজিতং তদা;

নাগোৰ বন্ধনং ছেত্ৰা, পত্তো সম্বোধিমুত্তমং.

৩. ধম্মচক্কং পৰত্তেন্তে, ৰেস্সভূলোকনাযকে;

অসীতিকোটিসহস্সানং, পঠমাভিসমযো অহু.

৪. পক্কন্তে চারিকং রট্ঠে, লোকজেট্ঠে নরাসভে;

সত্ততিকোটিসহস্সানং, দুতিযাভিসমযো অহু.

৫. মহাদিট্ঠিং ৰিনোদেন্তো, পাটিহেরং করোতি সো;

সমাগতা নরমরূ, দসসহস্সী সদেৰকে.

৬. মহাঅচ্ছরিযং দিস্ৰা, অব্ভুতং লোমহংসনং;

দেৰা চেৰ মনুস্সা চ, বুজ্ঝরে সট্ঠিকোটিযো.

৭. সন্নিপাতা তযো আসুং, ৰেস্সভুস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. অসীতিভিক্খুসহস্সানং, পঠমো আসি সমাগমো;

সত্ততিভিক্খুসহস্সানং, দুতিযো আসি সমাগমো.

৯. সট্ঠিভিক্খুসহস্সানং, ততিযো আসি সমাগমো;

জরাদিভযভীতানং, ওরসানং মহেসিনো.

১০. অহং তেন সমযেন, সুদস্সনো নাম খত্তিযো;

নিমন্তেত্ৰা মহাৰীরং, দানং দত্ৰা মহারহং;

অন্নপানেন ৰত্থেন, সসঙ্ঘং জিন পূজযিং.

১১. তস্স বুদ্ধস্স অসমস্স, চক্কং ৰত্তিতমুত্তমং;

সুত্ৰান পণিতং ধম্মং, পব্বজ্জমভিরোচযিং.

১২. মহাদানং পৰত্তেত্ৰা, রত্তিন্দিৰমতন্দিতো;

পব্বজ্জং গুণসম্পন্নং, পব্বজিং জিনসন্তিকে.

১৩. আচারগুণসম্পন্নো, ৰত্তসীলসমাহিতো;

সব্বঞ্ঞুতং গৰেসন্তো, রমামি জিনসাসনে.

১৪. সদ্ধাপীতিং উপগন্ত্ৰা, বুদ্ধং ৰন্দামি সত্থরং;

পীতি উপ্পজ্জতি ময্হং, বোধিযাযেৰ কারণা.

১৫. অনিৰত্তমানসং ঞত্ৰা, সম্বুদ্ধো এতদব্রৰি;

‘‘একতিংসে ইতো কপ্পে, অযং বুদ্ধো ভৰিস্সতি.

১৬. ‘‘অহু কপিলৰ্হযা রম্মা…পে… হেস্সাম সম্মুখা ইমং’’.

১৭. তস্সাহং ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৮. অনোমং নাম নগরং, সুপ্পতীতো নাম খত্তিযো;

মাতা যসৰতী নাম, ৰেস্সভুস্স মহেসিনো.

১৯. ছ চ ৰস্সসহস্সানি, অগারং অজ্ঝ সো ৰসি;

রুচি সুরুচি রতিৰড্ঢনো, তযো পাসাদমুত্তমা.

২০. অনূনতিংসসহস্সানি, নারিযো সমলঙ্কতা;

সুচিত্তা নাম সা নারী, সুপ্পবুদ্ধো নাম অত্রজো.

২১. নিমিত্তে চতুরো দিস্ৰা, সিৰিকাযাভিনিক্খমি;

ছমাসং পধানচারং, অচরী পুরিসুত্তমো.

২২. ব্রহ্মুনা যাচিতো সন্তো, ৰেস্সভূলোকনাযকো;

ৰত্তি চক্কং মহাৰীরো, অরুণারামে নরুত্তমো.

২৩. সোণো চ উত্তরো চেৰ, অহেসুং অগ্গসাৰকা;

উপসন্তো নামুপট্ঠাকো, ৰেস্সভুস্স মহেসিনো.

২৪. রামা [দামা (সী.)] চেৰ সমালা চ, অহেসুং অগ্গসাৰিকা;

বোধি তস্স ভগৰতো, মহাসালোতি ৰুচ্চতি.

২৫. সোত্থিকো চেৰ রম্ভো চ, অহেসুং অগ্গুপট্ঠকা;

গোতমী সিরিমা চেৰ, অহেসুং অগ্গুপট্ঠিকা.

২৬. সট্ঠিরতনমুব্বেধো, হেমযূপসমূপমো;

কাযা নিচ্ছরতি রস্মি, রত্তিংৰ পব্বতে সিখী.

২৭. সট্ঠিৰস্সসহস্সানি, আযু তস্স মহেসিনো;

তাৰতা তিট্ঠমানো সো, তারেসি জনতং বহুং.

২৮. ধম্মং ৰিত্থারিকং কত্ৰা, ৰিভজিত্ৰা মহাজনং;

ধম্মনাৰং ঠপেত্ৰান, নিব্বুতো সো সসাৰকো.

২৯. দস্সনেয্যং সব্বজনং, ৰিহারং ইরিযাপথং;

সব্বং তমন্তরহিতং, ননু রিত্তা সব্বসঙ্খারা.

৩০. ৰেস্সভূ জিনৰরো সত্থা, খেমারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

ৰেস্সভুস্স ভগৰতো ৰংসো একৰীসতিমো.