২০. ফুস্সবুদ্ধৰংসো

১. তত্থেৰ মণ্ডকপ্পম্হি, অহু সত্থা অনুত্তরো;

অনুপমো অসমসমো, ফুস্সো লোকগ্গনাযকো.

২. সোপি সব্বং তমং হন্ত্ৰা, ৰিজটেত্ৰা মহাজটং;

সদেৰকং তপ্পযন্তো, অভিৰস্সি অমতম্বুনা.

৩. ধম্মচক্কং পৰত্তেন্তে, ফুস্সে নক্খত্তমঙ্গলে;

কোটিসতসহস্সানং, পঠমাভিসমযো অহু.

৪. নৰুতিসতসহস্সানং, দুতিযাভিসমযো অহু;

অসীতিসতসহস্সানং, ততিযাভিসমযো অহু.

৫. সন্নিপাতা তযো আসুং, ফুস্সস্সাপি মহেসিনো;

খীণাসৰানং ৰিমলানং, সন্তচিত্তান তাদিনং.

৬. সট্ঠিসতসহস্সানং, পঠমো আসি সমাগমো;

পঞ্ঞাসসতসহস্সানং, দুতিযো আসি সমাগমো.

৭. চত্তারীসসতসহস্সানং, ততিযো আসি সমাগমো;

অনুপাদা ৰিমুত্তানং, ৰোচ্ছিন্নপটিসন্ধিনং.

৮. অহং তেন সমযেন, ৰিজিতাৰী নাম খত্তিযো;

ছড্ডযিত্ৰা মহারজ্জং, পব্বজিং তস্স সন্তিকে.

৯. সোপি মং বুদ্ধো ব্যাকাসি, ফুস্সো লোকগ্গনাযকো;

‘‘দ্ৰেনৰুতে ইতো কপ্পে, অযং বুদ্ধো ভৰিস্সতি.

১০. ‘‘পধানং পদহিত্ৰান…পে… হেস্সাম সম্মুখা ইমং’’.

১১. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১২. সুত্তন্তং ৰিনযঞ্চাপি, নৰঙ্গং সত্থুসাসনং;

সব্বং পরিযাপুণিত্ৰা, সোভযিং জিনসাসনং.

১৩. তত্থপ্পমত্তো ৰিহরন্তো, ব্রহ্মং ভাৰেত্ৰ ভাৰনং;

অভিঞ্ঞাসু পারমিং গন্ত্ৰা, ব্রহ্মলোকমগঞ্ছহং.

১৪. কাসিকং নাম নগরং, জযসেনো নাম খত্তিযো;

সিরিমা নাম জনিকা, ফুস্সস্সাপি মহেসিনো.

১৫. নৰৰস্সসহস্সানি, অগারং অজ্ঝ সো ৰসি;

গরুল়পক্খ হংস সুৰণ্ণভারা, তযো পাসাদমুত্তমা.

১৬. তিংসইত্থিসহস্সানি, নারিযো সমলঙ্কতা;

কিসাগোতমী নাম নারী, অনূপমো নাম অত্রজো.

১৭. নিমিত্তে চতুরো দিস্ৰা, হত্থিযানেন নিক্খমি;

ছমাসং পধানচারং, অচরী পুরিসুত্তমো.

১৮. ব্রহ্মুনা যাচিতো সন্তো, ফুস্সো লোকগ্গনাযকো;

ৰত্তি চক্কং মহাৰীরো, মিগদাযে নরুত্তমো.

১৯. সুরক্খিতো ধম্মসেনো, অহেসুং অগ্গসাৰকা;

সভিযো নামুপট্ঠাকো, ফুস্সস্সাপি মহেসিনো.

২০. চালা চ উপচালা চ, অহেসুং অগ্গসাৰিকা;

বোধি তস্স ভগৰতো, আমণ্ডোতি পৰুচ্চতি.

২১. ধনঞ্চযো ৰিসাখো চ, অহেসুং অগ্গুপট্ঠকা;

পদুমা চেৰ নাগা চ, অহেসুং অগ্গুপট্ঠিকা.

২২. অট্ঠপণ্ণাসরতনং, সোপি অচ্চুগ্গতো মুনি;

সোভতে সতরংসীৰ, উল়ুরাজাৰ পূরিতো.

২৩. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৪. ওৰদিত্ৰা বহূ সত্তে, সন্তারেত্ৰা বহূ জনে;

সোপি সত্থা অতুলযসো, নিব্বুতো সো সসাৰকো.

২৫. ফুস্সো জিনৰরো সত্থা, সেনারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

ফুস্সস্স ভগৰতো ৰংসো অট্ঠারসমো.