২১. ৰিপস্সীবুদ্ধৰংসো

১. ফুস্সস্স চ অপরেন, সম্বুদ্ধো দ্ৰিপদুত্তমো;

ৰিপস্সী নাম নামেন, লোকে উপ্পজ্জি চক্খুমা.

২. অৰিজ্জং সব্বং পদালেত্ৰা, পত্তো সম্বোধিমুত্তমং;

ধম্মচক্কং পৰত্তেতুং, পক্কামি বন্ধুমতীপুরং.

৩. ধম্মচক্কং পৰত্তেত্ৰা, উভো বোধেসি নাযকো;

গণনায ন ৰত্তব্বো, পঠমাভিসমযো অহু.

৪. পুনাপরং অমিতযসো, তত্থ সচ্চং পকাসযি;

চতুরাসীতিসহস্সানং, দুতিযাভিসমযো অহু.

৫. চতুরাসীতিসহস্সানি, সম্বুদ্ধং অনুপব্বজুং;

তেসমারামপত্তানং, ধম্মং দেসেসি চক্খুমা.

৬. সব্বাকারেন ভাসতো, সুত্ৰা উপনিসাদিনো [উপনিস্সা জিনো (স্যা. কং.)];

তেপি ধম্মৰরং গন্ত্ৰা, ততিযাভিসমযো অহু.

৭. সন্নিপাতা তযো আসুং, ৰিপস্সিস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. অট্ঠসট্ঠিসতসহস্সানং, পঠমো আসি সমাগমো;

ভিক্খুসতসহস্সানং, দুতিযো আসি সমাগমো.

৯. অসীতিভিক্খুসহস্সানং, ততিযো আসি সমাগমো;

তত্থ ভিক্খুগণমজ্ঝে, সম্বুদ্ধো অতিরোচতি.

১০. অহং তেন সমযেন, নাগরাজা মহিদ্ধিকো;

অতুলো নাম নামেন, পুঞ্ঞৰন্তো জুতিন্ধরো.

১১. নেকানং নাগকোটীনং, পরিৰারেত্ৰানহং তদা;

ৰজ্জন্তো দিব্বতুরিযেহি, লোকজেট্ঠং উপাগমিং.

১২. উপসঙ্কমিত্ৰা সম্বুদ্ধং, ৰিপস্সিং লোকনাযকং;

মণিমুত্তরতনখচিতং, সব্বাভরণৰিভূসিতং;

নিমন্তেত্ৰা ধম্মরাজস্স, সুৰণ্ণপীঠমদাসহং.

১৩. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘একনৰুতিতো কপ্পে, অযং বুদ্ধো ভৰিস্সতি.

১৪. ‘‘অহু কপিলৰ্হযা রম্মা, নিক্খমিত্ৰা তথাগতো;

পধানং পদহিত্ৰান, কত্ৰা দুক্করকারিকং.

১৫. ‘‘অজপালরুক্খমূলস্মিং, নিসীদিত্ৰা তথাগতো;

তত্থ পাযাসং পগ্গয্হ, নেরঞ্জরমুপেহিতি.

১৬. ‘‘নেরঞ্জরায তীরম্হি, পাযাসং অদ সো জিনো;

পটিযত্তৰরমগ্গেন, বোধিমূলমুপেহিতি.

১৭. ‘‘ততো পদক্খিণং কত্ৰা, বোধিমণ্ডং অনুত্তরো;

অস্সত্থমূলে সম্বোধিং, বুজ্ঝিস্সতি মহাযসো.

১৮. ‘‘ইমস্স জনিকা মাতা, মাযা নাম ভৰিস্সতি;

পিতা সুদ্ধোদনো নাম, অযং হেস্সতি গোতমো.

১৯. ‘‘অনাসৰা ৰীতরাগা, সন্তচিত্তা সমাহিতা;

কোলিতো উপতিস্সো চ, অগ্গা হেস্সন্তি সাৰকা;

আনন্দো নামুপট্ঠাকো, উপট্ঠিস্সতিমং জিনং.

২০. ‘‘খেমা উপ্পলৰণ্ণা চ, অগ্গা হেস্সন্তি সাৰিকা;

অনাসৰা ৰীতরাগা, সন্তচিত্তা সমাহিতা;

বোধি তস্স ভগৰতো, অস্সত্থোতি পৰুচ্চতি.

২১. ‘‘চিত্তো চ হত্থাল়ৰকো, অগ্গা হেস্সন্তুপট্ঠকা;

নন্দমাতা চ উত্তরা, অগ্গা হেস্সন্তুপট্ঠিকা;

আযু ৰস্সসতং তস্স, গোতমস্স যসস্সিনো.

২২. ‘‘ইদং সুত্ৰান ৰচনং…পে… হেস্সাম সম্মুখা ইমং’’.

২৩. তস্সাহং ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

২৪. নগরং বন্ধুমতী নাম, বন্ধুমা নাম খত্তিযো;

মাতা বন্ধুমতী নাম, ৰিপস্সিস্স মহেসিনো.

২৫. অট্ঠৰস্সসহস্সানি, অগারং অজ্ঝ সো ৰসি;

নন্দো সুনন্দো সিরিমা, তযো পাসাদমুত্তমা.

২৬. তিচত্তারীসসহস্সানি, নারিযো সমলঙ্কতা;

সুদস্সনা নাম সা নারী, সমৰত্তক্খন্ধো নাম অত্রজো.

২৭. নিমিত্তে চতুরো দিস্ৰা, রথযানেন নিক্খমি;

অনূনঅট্ঠমাসানি, পধানং পদহী জিনো.

২৮. ব্রহ্মুনা যাচিতো সন্তো, ৰিপস্সী লোকনাযকো;

ৰত্তি চক্কং মহাৰীরো, মিগদাযে নরুত্তমো.

২৯. খণ্ডো চ তিস্সনামো চ, অহেসুং অগ্গসাৰকা;

অসোকো নামুপট্ঠাকো, ৰিপস্সিস্স মহেসিনো.

৩০. চন্দা চ চন্দমিত্তা চ, অহেসুং অগ্গসাৰিকা;

বোধি তস্স ভগৰতো, পাটলীতি পৰুচ্চতি.

৩১. পুনব্বসুমিত্তো নাগো চ, অহেসুং অগ্গুপট্ঠকা;

সিরিমা উত্তরা চেৰ, অহেসুং অগ্গুপট্ঠিকা.

৩২. অসীতিহত্থমুব্বেধো, ৰিপস্সী লোকনাযকো;

পভা নিদ্ধাৰতি তস্স, সমন্তা সত্তযোজনে.

৩৩. অসীতিৰস্সসহস্সানি, আযু বুদ্ধস্স তাৰদে;

তাৰতা তিট্ঠমানো সো, তারেসি জনতং বহুং.

৩৪. বহুদেৰমনুস্সানং, বন্ধনা পরিমোচযি;

মগ্গামগ্গঞ্চ আচিক্খি, অৰসেসপুথুজ্জনে.

৩৫. আলোকং দস্সযিত্ৰান, দেসেত্ৰা অমতং পদং;

জলিত্ৰা অগ্গিক্খন্ধোৰ, নিব্বুতো সো সসাৰকো.

৩৬. ইদ্ধিৰরং পুঞ্ঞৰরং, লক্খণঞ্চ কুসুমিতং;

সব্বং তমন্তরহিতং, ননু রিত্তা সব্বসঙ্খারা.

৩৭. ৰিপস্সী জিনৰরো বুদ্ধো, সুমিত্তারামম্হি নিব্বুতো;

তত্থেৰস্স থূপৰরো, সত্তযোজনমুস্সিতোতি.

ৰিপস্সিস্স ভগৰতো ৰংসো একূনৰীসতিমো.