১৯. তিস্সবুদ্ধৰংসো

১. সিদ্ধত্থস্স অপরেন, অসমো অপ্পটিপুগ্গলো;

অনন্ততেজো অমিতযসো, তিস্সো লোকগ্গনাযকো.

২. তমন্ধকারং ৰিধমিত্ৰা, ওভাসেত্ৰা সদেৰকং;

অনুকম্পকো মহাৰীরো, লোকে উপ্পজ্জি চক্খুমা.

৩. তস্সাপি অতুলা ইদ্ধি, অতুলং সীলং সমাধি চ;

সব্বত্থ পারমিং গন্ত্ৰা, ধম্মচক্কং পৰত্তযি.

৪. সো বুদ্ধো দসসহস্সিম্হি, ৰিঞ্ঞাপেসি গিরং সুচিং;

কোটিসতানি অভিসমিংসু, পঠমে ধম্মদেসনে.

৫. দুতিযো নৰুতিকোটীনং, ততিযো সট্ঠিকোটিযো;

বন্ধনাতো পমোচেসি, সত্তে [সম্পত্তে (ক.)] নরমরূ তদা.

৬. সন্নিপাতা তযো আসুং, তিস্সে লোকগ্গনাযকে;

খীণাসৰানং ৰিমলানং, সন্তচিত্তান তাদিনং.

৭. খীণাসৰসতসহস্সানং, পঠমো আসি সমাগমো;

নৰুতিসতসহস্সানং, দুতিযো আসি সমাগমো.

৮. অসীতিসতসহস্সানং, ততিযো আসি সমাগমো;

খীণাসৰানং ৰিমলানং, পুপ্ফিতানং ৰিমুত্তিযা.

৯. অহং তেন সমযেন, সুজাতো নাম খত্তিযো;

মহাভোগং ছড্ডযিত্ৰা, পব্বজিং ইসিপব্বজং.

১০. মযি পব্বজিতে সন্তে, উপ্পজ্জি লোকনাযকো;

বুদ্ধোতি সদ্দং সুত্ৰান, পীতি মে উপপজ্জথ.

১১. দিব্বং মন্দারৰং পুপ্ফং, পদুমং পারিছত্তকং;

উভো হত্থেহি পগ্গয্হ, ধুনমানো উপাগমিং.

১২. চতুৰণ্ণপরিৰুতং, তিস্সং লোকগ্গনাযকং;

তমহং পুপ্ফং গহেত্ৰা, মত্থকে ধারযিং জিনং.

১৩. সোপি মং বুদ্ধো ব্যাকাসি, জনমজ্ঝে নিসীদিয;

‘‘দ্ৰেনৰুতে ইতো কপ্পে, অযং বুদ্ধো ভৰিস্সতি.

১৪. ‘‘পধানং পদহিত্ৰান…পে… হেস্সাম সম্মুখা ইমং’’.

১৫. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৬. খেমকং নাম নগরং, জনসন্ধো নাম খত্তিযো;

পদুমা নাম জনিকা, তিস্সস্স চ মহেসিনো.

১৭. সত্তৰস্সসহস্সানি, অগারং অজ্ঝ সো ৰসি;

গুহাসেল নারিসয নিসভা [কুমুদো নাল়িযো পদুমো (ক.)], তযো পাসাদমুত্তমা.

১৮. সমতিংসসহস্সানি, নারিযো সমলঙ্কতা;

সুভদ্দানামিকা নারী, আনন্দো নাম অত্রজো.

১৯. নিমিত্তে চতুরো দিস্ৰা, অস্সযানেন নিক্খমি;

অনূনঅট্ঠমাসানি, পধানং পদহী জিনো.

২০. ব্রহ্মুনা যাচিতো সন্তো, তিস্সো লোকগ্গনাযকো;

ৰত্তি চক্কং মহাৰীরো, যসৰতিযমুত্তমে.

২১. ব্রহ্মদেৰো উদযো চ, অহেসুং অগ্গসাৰকা;

সমঙ্গো নামুপট্ঠাকো, তিস্সস্স চ মহেসিনো.

২২. ফুস্সা চেৰ সুদত্তা চ, অহেসুং অগ্গসাৰিকা;

বোধি তস্স ভগৰতো, অসনোতি পৰুচ্চতি.

২৩. সম্বলো চ সিরিমা চেৰ, অহেসুং অগ্গুপট্ঠকা;

কিসাগোতমী উপসেনা, অহেসুং অগ্গুপট্ঠিকা.

২৪. সো বুদ্ধো সট্ঠিরতনো, অহু উচ্চত্তনে জিনো;

অনূপমো অসদিসো, হিমৰা ৰিয দিস্সতি.

২৫. তস্সাপি অতুলতেজস্স, আযু আসি অনুত্তরো;

ৰস্সসতসহস্সানি, লোকে অট্ঠাসি চক্খুমা.

২৬. উত্তমং পৰরং সেট্ঠং, অনুভোত্ৰা মহাযসং;

জলিত্ৰা অগ্গিক্খন্ধোৰ, নিব্বুতো সো সসাৰকো.

২৭. ৰলাহকোৰ অনিলেন, সূরিযেন ৰিয উস্সৰো;

অন্ধকারোৰ পদীপেন, নিব্বুতো সো সসাৰকো.

২৮. তিস্সো জিনৰরো বুদ্ধো, নন্দারামম্হি নিব্বুতো;

তত্থেৰস্স জিনথূপো, তীণিযোজনমুগ্গতোতি.

তিস্সস্স ভগৰতো ৰংসো সত্তরসমো.