৯. ঠিতঞ্জলিযত্থেরঅপদানং

৪২. ‘‘মিগলুদ্দো পুরে আসিং, অরঞ্ঞে কাননে অহং;

তত্থ অদ্দসং [তত্থদ্দসাসিং (সী. স্যা.)] সম্বুদ্ধং, বাত্তিংসৰরলক্খণং.

৪৩. ‘‘তত্থাহং অঞ্জলিং কত্ৰা, পক্কামিং পাচিনামুখো;

অৰিদূরে নিসিন্নস্স, নিযকে পণ্ণসন্থরে.

৪৪. ‘‘ততো মে অসনীপাতো, মত্থকে নিপতী তদা;

সোহং মরণকালম্হি, অকাসিং পুনরঞ্জলিং.

৪৫. ‘‘দ্ৰেনৰুতে ইতো কপ্পে, অঞ্জলিং অকরিং তদা;

দুগ্গতিং নাভিজানামি, অঞ্জলিস্স ইদং ফলং.

৪৬. ‘‘চতুপণ্ণাসকপ্পম্হি, মিগকেতুসনামকো;

সত্তরতনসম্পন্নো, চক্কৰত্তী মহব্বলো.

৪৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ঠিতঞ্জলিযো থেরো ইমা গাথাযো অভাসিত্থাতি.

ঠিতঞ্জলিযত্থেরস্সাপদানং নৰমং.