১০. তিপদুমিযত্থেরঅপদানং

৪৮. ‘‘পদুমুত্তরো নাম জিনো, সব্বধম্মান পারগূ;

দন্তো দন্তপরিৰুতো, নগরা নিক্খমী তদা.

৪৯. ‘‘নগরে হংসৰতিযং, অহোসিং মালিকো তদা;

যং তত্থ উত্তমং তোণি, পদ্মপুপ্ফানি [উত্তমং পুপ্ফং, তীণি পুপ্ফানি (সী.)] অগ্গহিং.

৫০. ‘‘অদ্দসং ৰিরজং বুদ্ধং, পটিমগ্গন্তরাপণে;

সহ [সোহং (সী.)] দিস্ৰান সম্বুদ্ধং, এৰং চিন্তেসহং তদা.

৫১. ‘‘কিং মে ইমেহি পুপ্ফেহি, রঞ্ঞো উপনিতেহি মে;

গামং ৰা গামখেত্তং ৰা, সহস্সং ৰা লভেয্যহং.

৫২. ‘‘অদন্তদমনং ৰীরং, সব্বসত্তসুখাৰহং;

লোকনাথং পূজযিত্ৰা, লচ্ছামি অমতং ধনং.

৫৩. ‘‘এৰাহং চিন্তযিত্ৰান, সকং চিত্তং পসাদযিং;

তীণি লোহিতকে গয্হ, আকাসে উক্খিপিং তদা.

৫৪. ‘‘মযা উক্খিত্তমত্তম্হি, আকাসে পত্থরিংসু তে;

ধারিংসু মত্থকে তত্থ, উদ্ধংৰণ্টা অধোমুখা.

৫৫. ‘‘যে কেচি মনুজা দিস্ৰা, উক্কুট্ঠিং সম্পৰত্তযুং;

দেৰতা অন্তলিক্খম্হি, সাধুকারং পৰত্তযুং.

৫৬. ‘‘অচ্ছেরং লোকে উপ্পন্নং, বুদ্ধসেট্ঠস্স ৰাহসা;

সব্বে ধম্মং সুণিস্সাম, পুপ্ফানং ৰাহসা মযং.

৫৭. ‘‘পদুমুত্তরো লোকৰিদূ, আহুতীনং পটিগ্গহো;

ৰীথিযঞ্হি ঠিতো সন্তো, ইমা গাথা অভাসথ.

৫৮. ‘‘‘যো সো বুদ্ধং অপূজেসি, রত্তপদ্মেহি [রত্তপদুমেহি (সী. স্যা.)] মাণৰো;

তমহং কিত্তযিস্সামি, সুণাথ মম ভাসতো.

৫৯. ‘‘‘তিংসকপ্পসহস্সানি, দেৰলোকে রমিস্সতি;

তিংসকপ্পানি [তিংসক্খত্তুঞ্চ (স্যা.)] দেৰিন্দো, দেৰরজ্জং করিস্সতি.

৬০. ‘‘‘মহাৰিত্থারিকং নাম, ব্যম্হং হেস্সতি তাৰদে;

তিযোজনসতুব্বিদ্ধং, দিযড্ঢসতৰিত্থতং.

৬১. ‘‘‘চত্তারিসতসহস্সানি, নিয্যূহা চ সুমাপিতা;

কূটাগারৰরূপেতা, মহাসযনমণ্ডিতা.

৬২. ‘‘‘কোটিসতসহস্সিযো, পরিৰারেস্সন্তি অচ্ছরা;

কুসলা নচ্চগীতস্স, ৰাদিতেপি পদক্খিণা.

৬৩. ‘‘‘এতাদিসে ব্যম্হৰরে, নারীগণসমাকুলে;

ৰস্সিস্সতি পুপ্ফৰস্সো, দিব্বো [পদ (ক.)] লোহিতকো সদা.

৬৪. ‘‘‘ভিত্তিখীলে নাগদন্তে, দ্ৰারবাহায তোরণে;

চক্কমত্তা লোহিতকা, ওলম্বিস্সন্তি তাৰদে.

৬৫. ‘‘‘পত্তেন পত্তসঞ্ছন্নে, অন্তোব্যম্হৰরে ইমং;

অত্থরিত্ৰা পারুপিত্ৰা, তুৰট্টিস্সন্তি তাৰদে.

৬৬. ‘‘‘ভৰনং পরিৰারেত্ৰা, সমন্তা সতযোজনে;

তেপি পদ্মা [তে ৰিসুদ্ধা (সী. স্যা.)] লোহিতকা, দিব্বগন্ধং পৰাযরে.

৬৭. ‘‘‘পঞ্চসত্ততিক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

৬৮. ‘‘‘সম্পত্তিযো দুৰে ভুত্ৰা, অনীতি অনুপদ্দৰো;

সম্পত্তে পরিযোসানে, নিব্বানং পাপুণিস্সতি’ [ফস্সযিস্সতি (সী.), পস্সযিস্সতি (ক.)].

৬৯. ‘‘সুদিট্ঠো ৰত মে বুদ্ধো, ৰাণিজ্জং সুপযোজিতং;

পদ্মানি তীণি পূজেত্ৰা, অনুভোসিং তিসম্পদা [অনুভূযন্তি সম্পদা (ক.)].

৭০. ‘‘অজ্জ মে ধম্মপ্পত্তস্স, ৰিপ্পমুত্তস্স সব্বসো;

সুপুপ্ফিতং লোহিতকং, ধারযিস্সতি মত্থকে.

৭১. ‘‘মম কম্মং কথেন্তস্স, পদুমুত্তরসত্থুনো;

সতপাণসহস্সানং, ধম্মাভিসমযো অহু.

৭২. ‘‘সতসহস্সিতো কপ্পে, যং বুদ্ধমভিপূজযিং;

দুগ্গতিং নাভিজানামি, তিপদুমানিদং ফলং.

৭৩. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৭৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিপদুমিযো থেরো ইমা গাথাযো অভাসিত্থাতি.

তিপদুমিযত্থেরস্সাপদানং দসমং.

নাগসমালৰগ্গো অট্ঠমো.