৮. পাটলিপুপ্ফিযত্থেরঅপদানং

৩৬. ‘‘সুৰণ্ণৰণ্ণং সম্বুদ্ধং, গচ্ছন্তং অন্তরাপণে;

কঞ্চনগ্ঘিযসঙ্কাসং, বাত্তিংসৰরলক্খণং.

৩৭. ‘‘সেট্ঠিপুত্তো তদা আসিং, সুখুমালো সুখেধিতো;

উচ্ছঙ্গে পাটলিপুপ্ফং, কত্ৰান [কত্ৰা তং (সী. স্যা.)] অভিসংহরিং.

৩৮. ‘‘হট্ঠো হট্ঠেন চিত্তেন, পুপ্ফেহি অভিপূজযিং;

তিস্সং লোকৰিদুং নাথং, নরদেৰং নমস্সহং.

৩৯. ‘‘দ্ৰেনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, পুপ্ফপূজাযিদং ফলং.

৪০. ‘‘ইতো তেসট্ঠিকপ্পম্হি, অভিসম্মতনামকো;

সত্তরতনসম্পন্নো, চক্কৰত্তী মহব্বলো.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাটলিপুপ্ফিযো থেরো ইমা গাথাযো অভাসিত্থাতি.

পাটলিপুপ্ফিযত্থেরস্সাপদানং অট্ঠমং.