৩. পচ্চাগমনিযত্থেরঅপদানং

১৩. ‘‘সিন্ধুযা নদিযা তীরে, চক্কৰাকো অহং তদা;

সুদ্ধসেৰালভক্খোহং, পাপেসু চ সুসঞ্ঞতো.

১৪. ‘‘অদ্দসং ৰিরজং বুদ্ধং, গচ্ছন্তং অনিলঞ্জসে;

তুণ্ডেন সালং পগ্গয্হ, ৰিপস্সিস্সাভিরোপযিং.

১৫. ‘‘যস্স সদ্ধা তথাগতে, অচলা সুপতিট্ঠিতা;

তেন চিত্তপ্পসাদেন, দুগ্গতিং সো ন গচ্ছতি.

১৬. ‘‘স্ৰাগতং ৰত মে আসি, বুদ্ধসেট্ঠস্স সন্তিকে;

ৰিহঙ্গমেন সন্তেন, সুবীজং রোপিতং মযা.

১৭. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং [পুপ্ফপূজাযিদং (সী.)] ফলং.

১৮. ‘‘সুচারুদস্সনা নাম, অট্ঠেতে একনামকা;

কপ্পে সত্তরসে আসুং, চক্কৰত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পচ্চাগমনিযো থেরো ইমা গাথাযো অভাসিত্থাতি.

পচ্চাগমনিযত্থেরস্সাপদানং ততিযং.