৮. ধজদাযকত্থেরঅপদানং

৫৭. ‘‘পদুমুত্তরবুদ্ধস্স, বোধিযা পাদপুত্তমে;

হট্ঠো হট্ঠেন চিত্তেন, ধজমারোপযিং অহং.

৫৮. ‘‘পতিতপত্তানি গণ্হিত্ৰা, বহিদ্ধা ছড্ডযিং অহং;

অন্তোসুদ্ধং বহিসুদ্ধং, অধিমুত্তমনাসৰং.

৫৯. ‘‘সম্মুখা ৰিয সম্বুদ্ধং, অৰন্দিং বোধিমুত্তমং;

পদুমুত্তরো লোকৰিদূ, আহুতীনং পটিগ্গহো.

৬০. ‘‘ভিক্খুসঙ্ঘে ঠিতো সত্থা, ইমা গাথা অভাসথ;

‘‘‘ইমিনা ধজদানেন, উপট্ঠানেন চূভযং.

৬১. ‘‘‘কপ্পানং সতসহস্সং, দুগ্গতিং সো ন গচ্ছতি;

দেৰেসু দেৰসোভগ্যং, অনুভোস্সতিনপ্পকং.

৬২. ‘‘‘অনেকসতক্খত্তুঞ্চ, রাজা রট্ঠে ভৰিস্সতি;

উগ্গতো নাম নামেন, চক্কৰত্তী ভৰিস্সতি.

৬৩. ‘‘‘সম্পত্তিং অনুভোত্ৰান, সুক্কমূলেন চোদিতো;

গোতমস্স ভগৰতো, সাসনেভিরমিস্সতি’.

৬৪. ‘‘পধানপহিতত্তোম্হি, উপসন্তো নিরূপধি;

ধারেমি অন্তিমং দেহং, সম্মাসম্বুদ্ধসাসনে.

৬৫. ‘‘একপঞ্ঞাসসহস্সে, কপ্পে উগ্গতসৰ্হযো [সৰ্হযা (স্যা.)];

পঞ্ঞাসসতসহস্সে, খত্তিযো মেঘসৰ্হযো [খত্তিযা খেমসৰ্হযা (স্যা.)].

৬৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধজদাযকো থেরো ইমা গাথাযো অভাসিত্থাতি.

ধজদাযকত্থেরস্সাপদানং অট্ঠমং.