৯. পদুমত্থেরঅপদানং

৬৭. ‘‘চতুসচ্চং পকাসেন্তো, ৰরধম্মপ্পৰত্তকো;

ৰস্সতে [ৰস্সেতি (?)] অমতং ৰুট্ঠিং, নিব্বাপেন্তো মহাজনং.

৬৮. ‘‘সধজং [সদণ্ডং (সী.)] পদুমং গয্হ, অড্ঢকোসে ঠিতো অহং;

পদুমুত্তরমুনিস্স, পহট্ঠো উক্খিপিমম্বরে.

৬৯. ‘‘আগচ্ছন্তে চ পদুমে, অব্ভুতো আসি তাৰদে;

মম সঙ্কপ্পমঞ্ঞায, পগ্গণ্হি ৰদতং ৰরো.

৭০. ‘‘করসেট্ঠেন পগ্গয্হ, জলজং পুপ্ফমুত্তমং;

ভিক্খুসঙ্ঘে ঠিতো সত্থা, ইমা গাথা অভাসথ.

৭১. ‘‘‘যেনিদং পদুমং খিত্তং, সব্বঞ্ঞুম্হি ৰিনাযকে [সব্বঞ্ঞুতমনাযকে (স্যা. ক.)];

তমহং কিত্তযিস্সামি, সুণাথ মম ভাসতো.

৭২. ‘‘‘তিংসকপ্পানি দেৰিন্দো, দেৰরজ্জং করিস্সতি;

পথব্যা রজ্জং সত্তসতং, ৰসুধং আৰসিস্সতি.

৭৩. ‘‘‘তত্থ পত্তং গণেত্ৰান, চক্কৰত্তী ভৰিস্সতি;

আকাসতো পুপ্ফৰুট্ঠি, অভিৰস্সিস্সতী তদা.

৭৪. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম নামেন, সত্থা লোকে ভৰিস্সতি.

৭৫. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো’.

৭৬. ‘‘নিক্খমিত্ৰান কুচ্ছিম্হা, সম্পজানো পতিস্সতো;

জাতিযা পঞ্চৰস্সোহং, অরহত্তং অপাপুণিং.

৭৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদুমো থেরো ইমা গাথাযো অভাসিত্থাতি.

পদুমত্থেরস্সাপদানং নৰমং.