১. ৰিধূপনদাযকত্থেরঅপদানং

১. ‘‘পদুমুত্তরবুদ্ধস্স, লোকজেট্ঠস্স তাদিনো;

বীজনিকা [ৰীজনিকা (সী. স্যা.)] মযা দিন্না, দ্ৰিপদিন্দস্স তাদিনো.

২. ‘‘সকং চিত্তং পসাদেত্ৰা, পগ্গহেত্ৰান অঞ্জলিং;

সম্বুদ্ধমভিৰাদেত্ৰা, পক্কমিং উত্তরামুখো.

৩. ‘‘বীজনিং পগ্গহেত্ৰান, সত্থা লোকগ্গনাযকো [লোকে অনুত্তরো (সী.)];

ভিক্খুসঙ্ঘে ঠিতো সন্তো, ইমা গাথা অভাসথ.

৪. ‘‘‘ইমিনা বীজনিদানেন, চিত্তস্স পণিধীহি [চেতনাপণিধীহি (অঞ্ঞত্থ)] চ;

কপ্পানং সতসহস্সং, ৰিনিপাতং ন গচ্ছতি’.

৫. ‘‘আরদ্ধৰীরিযো পহিতত্তো, চেতোগুণসমাহিতো;

জাতিযা সত্তৰস্সোহং, অরহত্তং অপাপুণিং.

৬. ‘‘সট্ঠিকপ্পসহস্সম্হি, বীজমানসনামকা;

সোল়সাসিংসু রাজানো, চক্কৰত্তী মহব্বলা.

৭. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ৰিধূপনদাযকো থেরো ইমা গাথাযো অভাসিত্থাতি.

ৰিধূপনদাযকত্থেরস্সাপদানং পঠমং.