২. সতরংসিত্থেরঅপদানং

৮. ‘‘উব্বিদ্ধং সেলমারুয্হ, নিসীদি পুরিসুত্তমো;

পব্বতস্সাৰিদূরম্হি, ব্রাহ্মণো মন্তপারগূ.

৯. ‘‘উপৰিট্ঠং মহাৰীরং, দেৰদেৰং নরাসভং;

অঞ্জলিং পগ্গহেত্ৰান, সন্থৰিং লোকনাযকং.

১০. ‘‘‘এস বুদ্ধো মহাৰীরো, ৰরধম্মপ্পকাসকো;

জলতি অগ্গিখন্ধোৰ, ভিক্খুসঙ্ঘপুরক্খতো.

১১. ‘‘‘মহাসমুদ্দোৰ‘ক্খুব্ভো [’ক্খোভো (সী. স্যা.)], অণ্ণৰোৰ দুরুত্তরো;

মিগরাজাৰসম্ভীতো [ছম্ভিতো (ক.)], ধম্মং দেসেতি চক্খুমা’.

১২. ‘‘মম সঙ্কপ্পমঞ্ঞায, পদুমুত্তরনাযকো;

ভিক্খুসঙ্ঘে ঠিতো সত্থা, ইমা গাথা অভাসথ.

১৩. ‘‘‘যেনাযং [যেনাহং (ক.)] অঞ্জলী দিন্নো, বুদ্ধসেট্ঠো চ থোমিতো;

তিংসকপ্পসহস্সানি, দেৰরজ্জং করিস্সতি.

১৪. ‘‘‘কপ্পসতসহস্সম্হি, অঙ্গীরসসনামকো;

ৰিৰট্টচ্ছদো [ৰিৰত্থচ্ছদ্দো (সী.)] সম্বুদ্ধো, উপ্পজ্জিস্সতি তাৰদে.

১৫. ‘‘‘তস্স ধম্মেসু দাযাদো, ওরসো ধম্মনিম্মিতো;

সতরংসীতি নামেন, অরহা সো ভৰিস্সতি’.

১৬. ‘‘জাতিযা সত্তৰস্সোহং, পব্বজিং অনগারিযং;

সতরংসিম্হি নামেন, পভা নিদ্ধাৰতে মম.

১৭. ‘‘মণ্ডপে রুক্খমূলে ৰা, ঝাযী ঝানরতো অহং;

ধারেমি অন্তিমং দেহং, সম্মাসম্বুদ্ধসাসনে.

১৮. ‘‘সট্ঠিকপ্পসহস্সম্হি, চতুরো রামনামকা;

সত্তরতনসম্পন্না, চক্কৰত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সতরংসি থেরো ইমা গাথাযো অভাসিত্থাতি.

সতরংসিত্থেরস্সাপদানং দুতিযং.