৬. কাল়ুদাযিত্থেরঅপদানং

১৬৫. ‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

১৬৬. ‘‘নাযকানং ৰরো সত্থা, গুণাগুণৰিদূ জিনো;

কতঞ্ঞূ কতৰেদী চ, তিত্থে যোজেতি পাণিনে [পাণিনো (সী. স্যা পী.)].

১৬৭. ‘‘সব্বঞ্ঞুতেন ঞাণেন, তুলযিত্ৰা দযাসযো;

দেসেতি পৰরং ধম্মং, অনন্তগুণসঞ্চযো.

১৬৮. ‘‘স কদাচি মহাৰীরো, অনন্তজিনসংসরি [অনন্তজনসংসদি (সী.), অনন্তজনসংসুধি (স্যা.), অনন্তজনসংসরী (পী.)];

দেসেতি মধুরং ধম্মং, চতুসচ্চূপসঞ্হিতং.

১৬৯. ‘‘সুত্ৰান তং ধম্মৰরং, আদিমজ্ঝন্তসোভণং;

পাণসতসহস্সানং, ধম্মাভিসমযো অহু.

১৭০. ‘‘নিন্নাদিতা তদা ভূমি, গজ্জিংসু চ পযোধরা;

সাধুকারং পৰত্তিংসু, দেৰব্রহ্মনরাসুরা.

১৭১. ‘‘‘অহো কারুণিকো সত্থা, অহো সদ্ধম্মদেসনা;

অহো ভৰসমুদ্দম্হি, নিমুগ্গে উদ্ধরী জিনো’.

১৭২. ‘‘এৰং পৰেদজাতেসু, সনরামরব্রহ্মসু;

কুলপ্পসাদকানগ্গং, সাৰকং ৰণ্ণযী জিনো.

১৭৩. ‘‘তদাহং হংসৰতিযং, জাতোমচ্চকুলে অহুং;

পাসাদিকো দস্সনিযো, পহূতধনধঞ্ঞৰা.

১৭৪. ‘‘হংসারামমুপেচ্চাহং, ৰন্দিত্ৰা তং তথাগতং;

সুণিত্ৰা মধুরং ধম্মং, কারং কত্ৰা চ তাদিনো.

১৭৫. ‘‘নিপচ্চ পাদমূলেহং, ইমং ৰচনমব্রৰিং;

‘কুলপ্পসাদকানগ্গো, যো তযা সন্থুতো [যো তৰ সাসনে (স্যা.)] মুনে.

১৭৬. ‘‘‘তাদিসো হোমহং ৰীর [তাদিসোহং মহাৰীর (স্যা. ক.)], বুদ্ধসেট্ঠস্স সাসনে’;

তদা মহাকারুণিকো, সিঞ্চন্তো ৰা মতেন মং.

১৭৭. ‘‘আহ মং ‘পুত্ত উত্তিট্ঠ, লচ্ছসে তং মনোরথং;

কথং নাম জিনে কারং, কত্ৰান ৰিফলো সিযা.

১৭৮. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৭৯. ‘‘‘তস্স ধম্মেসু দাযাদো, ওরসো ধম্মনিম্মিতো;

উদাযি নাম নামেন, হেস্সতি সত্থু সাৰকো’.

১৮০. ‘‘তং সুত্ৰা মুদিতো হুত্ৰা, যাৰজীৰং তদা জিনং;

মেত্তচিত্তো পরিচরিং, পচ্চযেহি ৰিনাযকং.

১৮১. ‘‘তেন কম্মৰিপাকেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

১৮২. ‘‘পচ্ছিমে চ ভৰে দানি, রম্মে কপিলৰত্থৰে;

জাতো মহামচ্চকুলে, সুদ্ধোদনমহীপতে [সুদ্ধোদনো মহীপতি (স্যা.)].

১৮৩. ‘‘তদা অজাযি সিদ্ধত্থো, রম্মে লুম্বিনিকাননে;

হিতায সব্বলোকস্স, সুখায চ নরাসভো.

১৮৪. ‘‘তদহেৰ অহং জাতো, সহ তেনেৰ ৰড্ঢিতো;

পিযো সহাযো দযিতো, ৰিযত্তো নীতিকোৰিদো.

১৮৫. ‘‘একূনতিংসো ৰযসা, নিক্খমিত্ৰা অগারতো [নিক্খন্তো পব্বজিত্থসো (সী. স্যা.)];

ছব্বস্সং ৰীতিনামেত্ৰা, আসি বুদ্ধো ৰিনাযকো.

১৮৬. ‘‘জেত্ৰা সসেনকং মারং, খেপযিত্ৰান আসৰে;

ভৰণ্ণৰং তরিত্ৰান, বুদ্ধো আসি সদেৰকে.

১৮৭. ‘‘ইসিৰ্হযং গমিত্ৰান [ইসিৰ্হযং পতনং গন্ত্ৰা (স্যা.)], ৰিনেত্ৰা পঞ্চৰগ্গিযে;

ততো ৰিনেসি ভগৰা, গন্ত্ৰা গন্ত্ৰা তহিং তহিং.

১৮৮. ‘‘ৰেনেয্যে ৰিনযন্তো সো, সঙ্গণ্হন্তো সদেৰকং;

উপেচ্চ মগধে গিরিং [মাগদগিরিং (সী.), মঙ্গলাগিরিং (পী.)], ৰিহরিত্থ তদা জিনো.

১৮৯. ‘‘তদা সুদ্ধোদনেনাহং, ভূমিপালেন পেসিতো;

গন্ত্ৰা দিস্ৰা দসবলং, পব্বজিত্ৰারহা অহুং.

১৯০. ‘‘তদা মহেসিং যাচিত্ৰা, পাপযিং কপিলৰ্হযং;

ততো পুরাহং গন্ত্ৰান, পসাদেসিং মহাকুলং.

১৯১. ‘‘জিনো তস্মিং গুণে তুট্ঠো, মং মহাপরিসায সো [মমাহ পুরিসাসভো (স্যা. পী.)];

কুলপ্পসাদকানগ্গং, পঞ্ঞাপেসি ৰিনাযকো.

১৯২. ‘‘কিলেসা ঝাপিতা ময্হং…পে… ৰিহরামি অনাসৰো.

১৯৩. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৯৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কাল়ুদাযিথেরো ইমা গাথাযো

অভাসিত্থাতি.

কাল়ুদাযিত্থেরস্সাপদানং ছট্ঠং.