৮. উরুৰেল়কস্সপত্থেরঅপদানং

২৫১. ‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

২৫২. ‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

২৫৩. ‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

২৫৪. ‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

২৫৫. ‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

২৫৬. ‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৫৭. ‘‘তদাহং হংসৰতিযা, ব্রাহ্মণো সাধুসম্মতো;

উপেচ্চ লোকপজ্জোতং, অস্সোসিং ধম্মদেসনং.

২৫৮. ‘‘তদা মহাপরিসতিং, মহাপরিসসাৰকং;

ঠপেন্তং এতদগ্গম্হি, সুত্ৰান মুদিতো অহং.

২৫৯. ‘‘মহতা পরিৰারেন, নিমন্তেত্ৰা মহাজিনং;

ব্রাহ্মণানং সহস্সেন, সহদানমদাসহং.

২৬০. ‘‘মহাদানং দদিত্ৰান, অভিৰাদিয নাযকং;

একমন্তং ঠিতো হট্ঠো, ইদং ৰচনমব্রৰিং.

২৬১. ‘‘‘তযি সদ্ধায মে ৰীর, অধিকারগুণেন চ;

পরিসা মহতী হোতু, নিব্বত্তস্স তহিং তহিং’.

২৬২. ‘‘তদা অৰোচ পরিসং, গজগজ্জিতসুস্সরো;

করৰীকরুতো সত্থা, ‘এতং পস্সথ ব্রাহ্মণং.

২৬৩. ‘‘‘হেমৰণ্ণং মহাবাহুং, কমলাননলোচনং;

উদগ্গতনুজং হট্ঠং, সদ্ধৰন্তং গুণে মম.

২৬৪. ‘‘‘এস পত্থযতে ঠানং [পত্থযি তং ঠানং (স্যা.)], সীহঘোসস্স ভিক্খুনো;

অনাগতম্হি অদ্ধানে, লচ্ছসে তং মনোরথং.

২৬৫. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

২৬৬. ‘‘‘তস্স ধম্মেসু দাযাদো, ওরসো ধম্মনিম্মিতো;

কস্সপো নাম গোত্তেন, হেস্সতি সত্থু সাৰকো’.

২৬৭. ‘‘ইতো দ্ৰেনৰুতে কপ্পে, অহু সত্থা অনুত্তরো;

অনূপমো অসদিসো, ফুস্সো লোকগ্গনাযকো.

২৬৮. ‘‘সো চ সব্বং তমং হন্ত্ৰা, ৰিজটেত্ৰা মহাজটং;

ৰস্সতে অমতং ৰুট্ঠিং, তপ্পযন্তো সদেৰকং.

২৬৯. ‘‘তদা হি বারাণসিযং, রাজা পচ্চা অহুম্হসে;

ভাতরোম্হ তযো সব্বে, সংৰিসট্ঠাৰ রাজিনো.

২৭০. ‘‘ৰীরঙ্গরূপা বলিনো, সঙ্গামে অপরাজিতা;

তদা কুপিতপচ্চন্তো [কুপ্পতি পচ্চন্তো (ক.)], অম্হে আহ মহীপতি.

২৭১. ‘‘‘এথ গন্ত্ৰান পচ্চন্তং, সোধেত্ৰা অট্টৰীবলং;

খেমং ৰিজিরিতং কত্ৰা, পুন দেথাতি ভাসথ’.

২৭২. ‘‘ততো মযং অৰোচুম্হ, যদি দেয্যাসি নাযকং;

উপট্ঠানায অম্হাকং, সাধযিস্সাম ৰো ততো.

২৭৩. ‘‘ততো মযং লদ্ধৰরা, ভূমিপালেন পেসিতা;

নিক্খিত্তসত্থং পচ্চন্তং, কত্ৰা পুনরুপচ্চ তং.

২৭৪. ‘‘যাচিত্ৰা সত্থুপট্ঠানং, রাজানং লোকনাযকং;

মুনিৰীরং লভিত্ৰান, যাৰজীৰং যজিম্হ তং.

২৭৫. ‘‘মহগ্ঘানি চ ৰত্থানি, পণীতানি রসানি চ;

সেনাসনানি রম্মানি, ভেসজ্জানি হিতানি চ.

২৭৬. ‘‘দত্ৰা সসঙ্ঘমুনিনো [সসংঘস্স মুনে (সী. পী.)], ধম্মেনুপ্পাদিতানি নো;

সীলৰন্তো কারুণিকা, ভাৰনাযুত্তমানসা.

২৭৭. ‘‘সদ্ধা পরিচরিত্ৰান, মেত্তচিত্তেন নাযকং;

নিব্বুতে তম্হি লোকগ্গে, পূজং কত্ৰা যথাবলং.

২৭৮. ‘‘ততো চুতা সন্তুসিতং [তাৰতিংসং (স্যা.)], গতা তত্থ মহাসুখং;

অনুভূতা মযং সব্বে, বুদ্ধপূজাযিদং ফলং.

২৭৯. ‘‘মাযাকারো যথা রঙ্গে [লদ্ধো (স্যা. পী.)], দস্সেসি ৰিকতিং বহুং;

তথা ভৰে ভমন্তোহং [গমেন্তোহং (ক.), ভৰন্তোহং (স্যা.)], ৰিদেহাধিপতী অহুং.

২৮০. ‘‘গুণাচেল়স্স ৰাক্যেন, মিচ্ছাদিট্ঠিগতাসযো;

নরকং মগ্গমারূল়্হো, রুচায মম ধীতুযা.

২৮১. ‘‘ওৰাদং নাদিযিত্ৰান, ব্রহ্মুনা নারদেনহং;

বহুধা সংসিতো সন্তো, দিট্ঠিং হিত্ৰান পাপিকং.

২৮২. ‘‘পূরযিত্ৰা ৰিসেসেন, দস কম্মপথানিহং;

হিত্ৰান দেহমগমিং, সগ্গং সভৰনং যথা.

২৮৩. ‘‘পচ্ছিমে ভৰে সম্পত্তে, ব্রহ্মবন্ধু অহোসহং;

বারাণসিযং ফীতাযং, জাতো ৰিপ্পমহাকুলে.

২৮৪. ‘‘মচ্চুব্যাধিজরা ভীতো, ওগাহেত্ৰা মহাৰনং [জহিত্ৰান মহাধনং (সী.), জহিত্ৰা চ মহাধনং (পী.)];

নিব্বানং পদমেসন্তো, জটিলেসু পরিব্বজিং.

২৮৫. ‘‘তদা দ্ৰে ভাতরো ময্হং, পব্বজিংসু মযা সহ;

উরুৰেল়াযং মাপেত্ৰা, অস্সমং নিৰসিং অহং.

২৮৬. ‘‘কস্সপো নাম গোত্তেন, উরুৰেল়নিৰাসিকো [উরুৰেল়ায নিৰসিং (স্যা.)];

ততো মে আসি পঞ্ঞত্তি, উরুৰেল়কস্সপো ইতি.

২৮৭. ‘‘নদীসকাসে ভাতা মে, নদীকস্সপসৰ্হযো;

আসী সকাসনামেন, গযাযং গযাকস্সপো.

২৮৮. ‘‘দ্ৰে সতানি কনিট্ঠস্স, তীণি মজ্ঝস্স ভাতুনো;

মম পঞ্চ সতানূনা, সিস্সা সব্বে মমানুগা.

২৮৯. ‘‘তদা উপেচ্চ মং বুদ্ধো, কত্ৰান ৰিৰিধানি মে [কত্ৰা নানাৰিধানি মে (সী.)];

পাটিহীরানি লোকগ্গো, ৰিনেসি নরসারথি.

২৯০. ‘‘সহস্সপরিৰারেন, অহোসিং এহিভিক্খুকো;

তেহেৰ সহ সব্বেহি, অরহত্তমপাপুণিং.

২৯১. ‘‘তে চেৰঞ্ঞে চ বহৰো, সিস্সা মং পরিৰারযুং;

সাসিতুঞ্চ সমত্থোহং, ততো মং ইসিসত্তমো.

২৯২. ‘‘মহাপরিসভাৰস্মিং, এতদগ্গে ঠপেসি মং;

অহো বুদ্ধে কতং কারং, সফলং মে অজাযথ.

২৯৩. ‘‘কিলেসা ঝাপিতা ময্হং…পে… ৰিহরামি অনাসৰো.

২৯৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

২৯৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উরুৰেল়কস্সপো থেরো ইমা গাথাযো

অভাসিত্থাতি.

উরুৰেল়কস্সপত্থেরস্সাপদানং অট্ঠমং.