২. ৰক্কলিত্থেরঅপদানং

২৮. ‘‘ইতো সতসহস্সম্হি, কপ্পে উপ্পজ্জি নাযকো;

অনোমনামো অমিতো, নামেন পদুমুত্তরো.

২৯. ‘‘পদুমাকারৰদনো, পদুমামলসুচ্ছৰী;

লোকেনানুপলিত্তোৰ তোযেন পদুমং যথা.

৩০. ‘‘ৰীরো পদুমপত্তক্খো, কন্তো চ পদুমং যথা;

পদুমুত্তরগন্ধোৰ, তস্মা সো পদুমুত্তরো.

৩১. ‘‘লোকজেট্ঠো চ নিম্মানো, অন্ধানং নযনূপমো;

সন্তৰেসো গুণনিধি, করুণামতিসাগরো.

৩২. ‘‘স কদাচি মহাৰীরো, ব্রহ্মাসুরসুরচ্চিতো;

সদেৰমনুজাকিণ্ণে, জনমজ্ঝে জিনুত্তমো [জনুত্তমো (স্যা. পী.), অনুত্তমো (ক.) ৰঙ্গীসত্থেরাপদানেপি].

৩৩. ‘‘ৰদনেন সুগন্ধেন, মধুরেন রুতেন চ;

রঞ্জযং পরিসং সব্বং, সন্থৰী সাৰকং সকং.

৩৪. ‘‘সদ্ধাধিমুত্তো সুমতি, মম দস্সনলালসো [দস্সনসালযো (স্যা.)];

নত্থি এতাদিসো অঞ্ঞো, যথাযং ভিক্খু ৰক্কলি.

৩৫. ‘‘তদাহং হংসৰতিযং, নগরে ব্রাহ্মণত্রজো;

হুত্ৰা সুত্ৰা চ তং ৰাক্যং, তং ঠানমভিরোচযিং.

৩৬. ‘‘সসাৰকং তং ৰিমলং, নিমন্তেত্ৰা তথাগতং;

সত্তাহং ভোজযিত্ৰান, দুস্সেহচ্ছাদযিং তদা.

৩৭. ‘‘নিপচ্চ সিরসা তস্স, অনন্তগুণসাগরে;

নিমুগ্গো পীতিসম্পুণ্ণো, ইদং ৰচনমব্রৰিং.

৩৮. ‘‘‘যো সো তযা সন্থৰিতো, ইতো সত্তমকে মুনি [ইধ সদ্ধাধিমুত্তো ইসি (স্যা.), ইতো সত্তমকেহনি (সী. পী.)];

ভিক্খু সদ্ধাৰতং অগ্গো, তাদিসো হোমহং মুনে’.

৩৯. ‘‘এৰং ৰুত্তে মহাৰীরো, অনাৰরণদস্সনো;

ইমং ৰাক্যং উদীরেসি, পরিসায মহামুনি.

৪০. ‘‘‘পস্সথেতং মাণৰকং, পীতমট্ঠনিৰাসনং;

হেমযঞ্ঞোপচিতঙ্গং [হেমযঞ্ঞোপৰীতঙ্গং (সী.)], জননেত্তমনোহরং.

৪১. ‘‘‘এসো অনাগতদ্ধানে, গোতমস্স মহেসিনো;

অগ্গো সদ্ধাধিমুত্তানং, সাৰকোযং ভৰিস্সতি.

৪২. ‘‘‘দেৰভূতো মনুস্সো ৰা, সব্বসন্তাপৰজ্জিতো;

সব্বভোগপরিব্যূল়্হো, সুখিতো সংসরিস্সতি.

৪৩. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪৪. ‘‘‘তস্স ধম্মেসু দাযাদো, ওরসো ধম্মনিম্মিতো;

ৰক্কলি নাম নামেন, হেস্সতি সত্থু সাৰকো’.

৪৫. ‘‘তেন কম্মৰিসেসেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৪৬. ‘‘সব্বত্থ সুখিতো হুত্ৰা, সংসরন্তো ভৰাভৰে;

সাৰত্থিযং পুরে জাতো, কুলে অঞ্ঞতরে অহং.

৪৭. ‘‘নোনীতসুখুমালং মং, জাতপল্লৰকোমলং;

মন্দং উত্তানসযনং, পিসাচভযতজ্জিতা.

৪৮. ‘‘পাদমূলে মহেসিস্স, সাযেসুং দীনমানসা;

ইমং দদাম তে নাথ, সরণং হোহি নাযক.

৪৯. ‘‘তদা পটিগ্গহি সো মং, ভীতানং সরণো মুনি;

জালিনা চক্কঙ্কিতেন [সঙ্কলঙ্কেন (সী.)], মুদুকোমলপাণিনা.

৫০. ‘‘তদা পভুতি তেনাহং, অরক্খেয্যেন রক্খিতো;

সব্বৰেরৰিনিমুত্তো [সব্বব্যাধিৰিনিমুত্তো (স্যা.), সব্বূপধিৰিনিমুত্তো (পী.)], সুখেন পরিৰুদ্ধিতো.

৫১. ‘‘সুগতেন ৰিনা ভূতো, উক্কণ্ঠামি মুহুত্তকং;

জাতিযা সত্তৰস্সোহং, পব্বজিং অনগারিযং.

৫২. ‘‘সব্বপারমিসম্ভূতং, নীলক্খিনযনং [লঙ্কিনীলযনং (সী.)] ৰরং;

রূপং সব্বসুভাকিণ্ণং, অতিত্তো ৰিহরামহং [ৰিহযামহং (সী. পী.)].

৫৩. ‘‘বুদ্ধরূপরতিং [বুদ্ধো রূপরতিং (সী.)] ঞত্ৰা, তদা ওৰদি মং জিনো;

‘অলং ৰক্কলি কিং রূপে, রমসে বালনন্দিতে.

৫৪. ‘‘‘যো হি পস্সতি সদ্ধম্মং, সো মং পস্সতি পণ্ডিতো;

অপস্সমানো সদ্ধম্মং, মং পস্সম্পি ন পস্সতি.

৫৫. ‘‘‘অনন্তাদীনৰো কাযো, ৰিসরুক্খসমূপমো;

আৰাসো সব্বরোগানং, পুঞ্জো দুক্খস্স কেৰলো.

৫৬. ‘‘‘নিব্বিন্দিয ততো রূপে, খন্ধানং উদযব্বযং;

পস্স উপক্কিলেসানং, সুখেনন্তং গমিস্সতি’.

৫৭. ‘‘এৰং তেনানুসিট্ঠোহং, নাযকেন হিতেসিনা;

গিজ্ঝকূটং সমারুয্হ, ঝাযামি গিরিকন্দরে.

৫৮. ‘‘ঠিতো পব্বতপাদম্হি, অস্সাসযি [মমাহসো (সী.)] মহামুনি;

ৰক্কলীতি জিনো ৰাচং, তং সুত্ৰা মুদিতো অহং.

৫৯. ‘‘পক্খন্দিং সেলপব্ভারে, অনেকসতপোরিসে;

তদা বুদ্ধানুভাৰেন, সুখেনেৰ মহিং গতো.

৬০. ‘‘পুনোপি [পুনাপি (স্যা.), মুনি মং (ক.)] ধম্মং দেসেতি, খন্ধানং উদযব্বযং;

তমহং ধম্মমঞ্ঞায, অরহত্তমপাপুণিং.

৬১. ‘‘সুমহাপরিসমজ্ঝে, তদা মং চরণন্তগো;

অগ্গং সদ্ধাধিমুত্তানং, পঞ্ঞপেসি মহামতি.

৬২. ‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

৬৩. ‘‘কিলেসা ঝাপিতা ময্হং…পে… ৰিহরামি অনাসৰো.

৬৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰক্কলিত্থেরো ইমা গাথাযো

অভাসিত্থাতি.

ৰক্কলিত্থেরস্সাপদানং দুতিযং.