৪. ঞাণথৰিকত্থেরঅপদানং

৪৬. ‘‘দক্খিণে হিমৰন্তস্স, সুকতো অস্সমো মম;

উত্তমত্থং গৰেসন্তো, ৰসামি ৰিপিনে তদা.

৪৭. ‘‘লাভালাভেন সন্তুট্ঠো, মূলেন চ ফলেন চ;

অন্ৰেসন্তো আচরিযং, ৰসামি এককো অহং.

৪৮. ‘‘সুমেধো নাম সম্বুদ্ধো, লোকে উপ্পজ্জি তাৰদে;

চতুসচ্চং পকাসেতি, উদ্ধরন্তো মহাজনং.

৪৯. ‘‘নাহং সুণোমি সম্বুদ্ধং, নপি মে কোচি সংসতি [ভাসতি (সী.), সাসতি (স্যা. পী.)];

অট্ঠৰস্সে অতিক্কন্তে, অস্সোসিং লোকনাযকং.

৫০. ‘‘অগ্গিদারুং নীহরিত্ৰা, সম্মজ্জিত্ৰান অস্সমং;

খারিভারং গহেত্ৰান, নিক্খমিং ৰিপিনা অহং.

৫১. ‘‘একরত্তিং ৰসন্তোহং, গামেসু নিগমেসু চ;

অনুপুব্বেন চন্দৰতিং, তদাহং উপসঙ্কমিং.

৫২. ‘‘ভগৰা তম্হি সমযে, সুমেধো লোকনাযকো;

উদ্ধরন্তো বহূ সত্তে, দেসেতি অমতং পদং.

৫৩. ‘‘জনকাযমতিক্কম্ম, ৰন্দিত্ৰা জিনসাগরং;

একংসং অজিনং কত্ৰা, সন্থৰিং লোকনাযকং.

৫৪. ‘‘‘তুৰং সত্থা চ কেতু চ, ধজো যূপো চ পাণিনং;

পরাযনো [পরাযণো (সী. পী.)] পতিট্ঠা চ, দীপো চ দ্ৰিপদুত্তমো.

একৰীসতিমং ভাণৰারং.

৫৫. ‘‘‘নেপুঞ্ঞো দস্সনে ৰীরো, তারেসি জনতং তুৰং;

নত্থঞ্ঞো তারকো লোকে, তৰুত্তরিতরো মুনে.

৫৬. ‘‘‘সক্কা থেৰে [হৰে (সী. পী.) ভৰে (স্যা. ক.)] কুসগ্গেন, পমেতুং সাগরুত্তমে [সাগরুত্তমো (সী. স্যা. পী.)];

নত্ৰেৰ তৰ সব্বঞ্ঞু, ঞাণং সক্কা পমেতৰে.

৫৭. ‘‘‘তুলদণ্ডে [তুলমণ্ডলে (সী. পী.)] ঠপেত্ৰান, মহিং [মহী (স্যা. পী.)] সক্কা ধরেতৰে;

নত্ৰেৰ তৰ পঞ্ঞায, পমাণমত্থি চক্খুম.

৫৮. ‘‘‘আকাসো মিনিতুং সক্কা, রজ্জুযা অঙ্গুলেন ৰা;

নত্ৰেৰ তৰ সব্বঞ্ঞু, সীলং সক্কা পমেতৰে.

৫৯. ‘‘‘মহাসমুদ্দে উদকং, আকাসো চ ৰসুন্ধরা;

পরিমেয্যানি এতানি, অপ্পমেয্যোসি চক্খুম’.

৬০. ‘‘ছহি গাথাহি সব্বঞ্ঞুং, কিত্তযিত্ৰা মহাযসং;

অঞ্জলিং পগ্গহেত্ৰান, তুণ্হী অট্ঠাসহং তদা.

৬১. ‘‘যং ৰদন্তি সুমেধোতি, ভূরিপঞ্ঞং সুমেধসং;

ভিক্খুসঙ্ঘে নিসীদিত্ৰা, ইমা গাথা অভাসথ.

৬২. ‘‘‘যো মে ঞাণং পকিত্তেসি, ৰিপ্পসন্নেন চেতসা;

তমহং কিত্তযিস্সামি, সুণাথ মম ভাসতো.

৬৩. ‘‘‘সত্তসত্ততি কপ্পানি, দেৰলোকে রমিস্সতি;

সহস্সক্খত্তুং দেৰিন্দো, দেৰরজ্জং করিস্সতি.

৬৪. ‘‘‘অনেকসতক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

৬৫. ‘‘‘দেৰভূতো মনুস্সো ৰা, পুঞ্ঞকম্মসমাহিতো;

অনূনমনসঙ্কপ্পো, তিক্খপঞ্ঞো ভৰিস্সতি’.

৬৬. ‘‘তিংসকপ্পসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬৭. ‘‘অগারা অভিনিক্খম্ম, পব্বজিস্সতি কিঞ্চনো;

জাতিযা সত্তৰস্সেন, অরহত্তং ফুসিস্সতি.

৬৮. ‘‘যতো সরামি অত্তানং, যতো পত্তোস্মি সাসনং;

এত্থন্তরে ন জানামি, চেতনং অমনোরমং.

৬৯. ‘‘সংসরিত্ৰা ভৰে সব্বে, সম্পত্তানুভৰিং অহং;

ভোগে মে ঊনতা নত্থি, ফলং ঞাণস্স থোমনে.

৭০. ‘‘তিযগ্গী নিব্বুতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৭১. ‘‘তিংসকপ্পসহস্সম্হি, যং ঞাণমথৰিং অহং [মভিথোমযিং (সী. পী.), মভিথোমহং (স্যা.)];

দুগ্গতিং নাভিজানামি, ফলং ঞাণস্স থোমনে.

৭২. ‘‘কিলেসা ঝাপিতা ময্হং…পে… ৰিহরামি অনাসৰো.

৭৩. ‘‘স্ৰাগতং ৰত মে আসি…পে… কতং বুদ্ধস্স সাসনং.

৭৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ঞাণথৰিকো থেরো ইমা গাথাযো

অভাসিত্থাতি.

ঞাণথৰিকত্থেরস্সাপদানং চতুত্থং.