১০. সালমণ্ডপিযত্থেরঅপদানং

১৯০. ‘‘অজ্ঝোগাহেত্ৰা সালৰনং, সুকতো অস্সমো মম;

সালপুপ্ফেহি সঞ্ছন্নো, ৰসামি ৰিপিনে তদা.

১৯১. ‘‘পিযদস্সী চ ভগৰা, সযম্ভূ অগ্গপুগ্গলো;

ৰিৰেককামো সম্বুদ্ধো, সালৰনমুপাগমি.

১৯২. ‘‘অস্সমা অভিনিক্খম্ম, পৰনং অগমাসহং;

মূলফলং গৰেসন্তো, আহিণ্ডামি ৰনে তদা.

১৯৩. ‘‘তত্থদ্দসাসিং সম্বুদ্ধং, পিযদস্সিং মহাযসং;

সুনিসিন্নং সমাপন্নং, ৰিরোচন্তং মহাৰনে.

১৯৪. ‘‘চতুদণ্ডে ঠপেত্ৰান, বুদ্ধস্স উপরী অহং;

মণ্ডপং সুকতং কত্ৰা, সালপুপ্ফেহি ছাদযিং.

১৯৫. ‘‘সত্তাহং ধারযিত্ৰান, মণ্ডপং সালছাদিতং;

তত্থ চিত্তং পসাদেত্ৰা, বুদ্ধসেট্ঠমৰন্দহং.

১৯৬. ‘‘ভগৰা তম্হি সমযে, ৰুট্ঠহিত্ৰা সমাধিতো;

যুগমত্তং পেক্খমানো, নিসীদি পুরিসুত্তমো.

১৯৭. ‘‘সাৰকো ৰরুণো নাম, পিযদস্সিস্স সত্থুনো;

ৰসীসতসহস্সেহি, উপগচ্ছি ৰিনাযকং.

১৯৮. ‘‘পিযদস্সী চ ভগৰা, লোকজেট্ঠো নরাসভো;

ভিক্খুসঙ্ঘে নিসীদিত্ৰা, সিতং পাতুকরী জিনো.

১৯৯. ‘‘অনুরুদ্ধো উপট্ঠাকো, পিযদস্সিস্স সত্থুনো;

একংসং চীৰরং কত্ৰা, অপুচ্ছিত্থ মহামুনিং.

২০০. ‘‘‘কো নু খো ভগৰা হেতু, সিতকম্মস্স সত্থুনো;

কারণে ৰিজ্জমানম্হি, সত্থা পাতুকরে সিতং’.

২০১. ‘‘‘সত্তাহং সালচ্ছদনং [পুপ্ফছদনং (সী. স্যা. পী.)], যো মে ধারেসি মাণৰো;

তস্স কম্মং সরিত্ৰান, সিতং পাতুকরিং অহং.

২০২. ‘‘‘অনোকাসং ন পস্সামি, যত্থ [যং তং (স্যা. পী. ক.)] পুঞ্ঞং ৰিপচ্চতি;

দেৰলোকে মনুস্সে ৰা, ওকাসোৰ ন সম্মতি.

২০৩. ‘‘‘দেৰলোকে ৰসন্তস্স, পুঞ্ঞকম্মসমঙ্গিনো;

যাৰতা পরিসা তস্স, সালচ্ছন্না ভৰিস্সতি.

২০৪. ‘‘‘তত্থ দিব্বেহি নচ্চেহি, গীতেহি ৰাদিতেহি চ;

রমিস্সতি সদা সন্তো, পুঞ্ঞকম্মসমাহিতো.

২০৫. ‘‘‘যাৰতা পরিসা তস্স, গন্ধগন্ধী ভৰিস্সতি;

সালস্স পুপ্ফৰস্সো চ, পৰস্সিস্সতি তাৰদে.

২০৬. ‘‘‘ততো চুতোযং মনুজো, মানুসং আগমিস্সতি;

ইধাপি সালচ্ছদনং, সব্বকালং ধরিস্সতি [ধরিযতি (সী. পী.)].

২০৭. ‘‘‘ইধ নচ্চঞ্চ গীতঞ্চ, সম্মতাল়সমাহিতং;

পরিৰারেস্সন্তি মং নিচ্চং, বুদ্ধপূজাযিদং ফলং.

২০৮. ‘‘‘উগ্গচ্ছন্তে চ সূরিযে, সালৰস্সং পৰস্সতি;

পুঞ্ঞকম্মেন সংযুত্তং, ৰস্সতে সব্বকালিকং.

২০৯. ‘‘‘অট্ঠারসে কপ্পসতে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

২১০. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

২১১. ‘‘‘ধম্মং অভিসমেন্তস্স, সালচ্ছন্নং ভৰিস্সতি;

চিতকে ঝাযমানস্স, ছদনং তত্থ হেস্সতি’.

২১২. ‘‘ৰিপাকং কিত্তযিত্ৰান, পিযদস্সী মহামুনি;

পরিসায ধম্মং দেসেসি, তপ্পেন্তো ধম্মৰুট্ঠিযা.

২১৩. ‘‘তিংসকপ্পানি দেৰেসু, দেৰরজ্জমকারযিং;

সট্ঠি চ সত্তক্খত্তুঞ্চ, চক্কৰত্তী অহোসহং.

২১৪. ‘‘দেৰলোকা ইধাগন্ত্ৰা, লভামি ৰিপুলং সুখং;

ইধাপি সালচ্ছদনং, মণ্ডপস্স ইদং ফলং.

২১৫. ‘‘অযং পচ্ছিমকো ময্হং, চরিমো ৰত্ততে ভৰো;

ইধাপি সালচ্ছদনং, হেস্সতি সব্বকালিকং.

২১৬. ‘‘মহামুনিং তোসযিত্ৰা, গোতমং সক্যপুঙ্গৰং;

পত্তোম্হি অচলং ঠানং, হিত্ৰা জযপরাজযং.

২১৭. ‘‘অট্ঠারসে কপ্পসতে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২১৮. কিলেসা ঝাপিতা ময্হং…পে… ৰিহরামি অনাসৰো.

২১৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

২২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সালমণ্ডপিযো থেরো ইমা গাথাযো

অভাসিত্থাতি.

সালমণ্ডপিযত্থেরস্সাপদানং দসমং.

পংসুকূলৰগ্গো একূনপঞ্ঞাসমো.