৯. অম্বপিণ্ডিযত্থেরঅপদানং

৭২. ‘‘হত্থিরাজা তদা আসিং, ঈসাদন্তো উরুল়্হৰা;

ৰিচরন্তো ব্রহারঞ্ঞে, অদ্দসং লোকনাযকং.

৭৩. ‘‘অম্বপিণ্ডং গহেত্ৰান, অদাসিং সত্থুনো অহং;

পটিগ্গণ্হি মহাৰীরো, সিদ্ধত্থো লোকনাযকো.

৭৪. ‘‘মম নিজ্ঝাযমানস্স, পরিভুঞ্জি তদা জিনো;

তত্থ চিত্তং পসাদেত্ৰা, তুসিতং উপপজ্জহং.

৭৫. ‘‘ততো অহং চৰিত্ৰান, চক্কৰত্তী অহোসহং;

এতেনেৰ উপাযেন, অনুভুত্ৰান সম্পদা.

৭৬. ‘‘পধানপহিতত্তোহং, উপসন্তো নিরূপধি;

সব্বাসৰে পরিঞ্ঞায, ৰিহরামি অনাসৰো.

৭৭. ‘‘চতুন্নৰুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

৭৮. ‘‘কিলেসা ঝাপিতা ময্হং…পে… ৰিহরামি অনাসৰো.

৭৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

৮০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বপিণ্ডিযো থেরো ইমা গাথাযো

অভাসিত্থাতি.

অম্বপিণ্ডিযত্থেরস্সাপদানং নৰমং.