৮. হরীতকদাযকত্থেরঅপদানং

৬০. ‘‘হরীতকং আমলকং, অম্বজম্বুৰিভীতকং;

কোলং ভল্লাতকং বিল্লং, সযমেৰ হরামহং.

৬১. ‘‘দিস্ৰান পব্ভারগতং, ঝাযিং ঝানরতং মুনিং;

আবাধেন আপীল়েন্তং, অদুতীযং মহামুনিং.

৬২. ‘‘হরীতকং গহেত্ৰান, সযম্ভুস্স অদাসহং;

খাদমত্তম্হি ভেসজ্জে, ব্যাধি পস্সম্ভি [পস্সদ্ধি (ক.)] তাৰদে.

৬৩. ‘‘পহীনদরথো বুদ্ধো, অনুমোদমকাসি মে;

‘ভেসজ্জদানেনিমিনা, ব্যাধিৰূপসমেন চ.

৬৪. ‘‘‘দেৰভূতো মনুস্সো ৰা, জাতো ৰা অঞ্ঞজাতিযা;

সব্বত্থ সুখিতো হোতু, মা চ তে ব্যাধিমাগমা’.

৬৫. ‘‘ইদং ৰত্ৰান সম্বুদ্ধো, সযম্ভূ অপরাজিতো;

নভং অব্ভুগ্গমী ধীরো, হংসরাজাৰ অম্বরে.

৬৬. ‘‘যতো হরীতকং দিন্নং, সযম্ভুস্স মহেসিনো;

ইমং জাতিং উপাদায, ব্যাধি মে নুপপজ্জথ.

৬৭. ‘‘অযং পচ্ছিমকো ময্হং, চরিমো ৰত্ততে ভৰো;

তিস্সো ৰিজ্জা সচ্ছিকতা, কতং বুদ্ধস্স সাসনং.

৬৮. ‘‘চতুন্নৰুতিতো কপ্পে, ভেসজ্জমদদিং তদা;

দুগ্গতিং নাভিজানামি, ভেসজ্জস্স ইদং ফলং.

৬৯. ‘‘কিলেসা ঝাপিতা ময্হং…পে… ৰিহরামি অনাসৰো.

৭০. ‘‘স্ৰাগতং ৰত মে আসি…পে… কতং বুদ্ধস্স সাসনং.

৭১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা হরীতকদাযকো থেরো ইমা গাথাযো

অভাসিত্থাতি.

হরীতকদাযকত্থেরস্সাপদানং অট্ঠমং.