৭. উচ্ছঙ্গপুপ্ফিযত্থেরঅপদানং

১৪২. ‘‘নগরে বন্ধুমতিযা, অহোসিং মালিকো তদা;

উচ্ছঙ্গং পূরযিত্ৰান, অগমং অন্তরাপণং.

১৪৩. ‘‘ভগৰা তম্হি সমযে, ভিক্খুসঙ্ঘপুরক্খতো;

মহতা আনুভাৰেন, নিয্যাতি লোকনাযকো.

১৪৪. ‘‘দিস্ৰান লোকপজ্জোতং, ৰিপস্সিং লোকতারণং;

পুপ্ফং পগ্গয্হ উচ্ছঙ্গা, বুদ্ধসেট্ঠং অপূজযিং.

১৪৫. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৪৬. ‘‘কিলেসা ঝাপিতা ময্হং…পে… ৰিহরামি অনাসৰো.

১৪৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উচ্ছঙ্গপুপ্ফিযো থেরো ইমা গাথাযো অভাসিত্থাতি.

উচ্ছঙ্গপুপ্ফিযত্থেরস্সাপদানং সত্তমং.