৮. যাগুদাযকত্থেরঅপদানং

১৪৯. ‘‘অতিথিং [অতীতং (ক.)] মে গহেত্ৰান, অগচ্ছিং গামকং তদা;

সম্পুণ্ণনদিকং দিস্ৰা, সঙ্ঘারামং উপাগমিং.

১৫০. ‘‘আরঞ্ঞকা ধুতধরা, ঝাযিনো লূখচীৰরা;

ৰিৰেকাভিরতা ধীরা, সঙ্ঘারামে ৰসন্তি তে.

১৫১. ‘‘গতি তেসং উপচ্ছিন্না, সুৰিমুত্তান তাদিনং;

পিণ্ডায তে ন গচ্ছন্তি, ওরুদ্ধনদিতায হি [ওরুদ্ধনদিকাযতিং (স্যা.)].

১৫২. ‘‘পসন্নচিত্তো সুমনো, ৰেদজাতো কতঞ্জলী;

তণ্ডুলং মে গহেত্ৰান, যাগুদানং অদাসহং.

১৫৩. ‘‘পঞ্চন্নং যাগুং দত্ৰান, পসন্নো সেহি পাণিভি;

সককম্মাভিরদ্ধোহং, তাৰতিংসমগচ্ছহং.

১৫৪. ‘‘মণিমযঞ্চ মে ব্যম্হং, নিব্বত্তি তিদসে গণে;

নারীগণেহি সহিতো, মোদামি ব্যম্হমুত্তমে.

১৫৫. ‘‘তেত্তিংসক্খত্তুং দেৰিন্দো, দেৰরজ্জমকারযিং;

তিংসক্খত্তুং চক্কৰত্তী, মহারজ্জমকারযিং.

১৫৬. ‘‘পদেসরজ্জং ৰিপুলং, গণনাতো অসঙ্খিযং;

দেৰলোকে মনুস্সে ৰা, অনুভোত্ৰা সযং [যসং (স্যা.)] অহং.

১৫৭. ‘‘পচ্ছিমে ভৰে সম্পত্তে, পব্বজিং অনগারিযং;

সহ ওরোপিতে কেসে, সব্বং সম্পটিৰিজ্ঝহং.

১৫৮. ‘‘খযতো ৰযতো চাপি, সম্মসন্তো কল়েৰরং;

পুরে সিক্খাপদাদানা, অরহত্তমপাপুণিং.

১৫৯. ‘‘সুদিন্নং মে দানৰরং, ৰাণিজ্জং সম্পযোজিতং;

তেনেৰ যাগুদানেন, পত্তোম্হি অচলং পদং.

১৬০. ‘‘সোকং পরিদ্দৰং ব্যাধিং, দরথং চিত্ততাপনং;

নাভিজানামি উপ্পন্নং, যাগুদানস্সিদং ফলং.

১৬১. ‘‘যাগুং সঙ্ঘস্স দত্ৰান, পুঞ্ঞক্খেত্তে অনুত্তরে;

পঞ্চানিসংসে অনুভোমি, অহো যাগুসুযিট্ঠতা.

১৬২. ‘‘অব্যাধিতা রূপৰতা, খিপ্পং ধম্মনিসন্তিতা [নিবুজ্ঝিতা (স্যা.)];

লাভিতা অন্নপানস্স, আযু পঞ্চমকং মম.

১৬৩. ‘‘যো কোচি ৰেদং জনযং, সঙ্ঘে যাগুং দদেয্য সো;

ইমানি পঞ্চ ঠানানি, পটিগণ্হেয্য পণ্ডিতো.

১৬৪. ‘‘করণীযং কতং সব্বং, ভৰা উগ্ঘাটিতা মযা;

সব্বাসৰা পরিক্খীণা, নত্থি দানি পুনব্ভৰো.

১৬৫. ‘‘সো অহং ৰিচরিস্সামি, গামা গামং পুরা পুরং;

নমস্সমানো সম্বুদ্ধং, ধম্মস্স চ সুধম্মতং.

১৬৬. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, যাগুদানস্সিদং ফলং.

১৬৭. ‘‘কিলেসা ঝাপিতা ময্হং…পে… ৰিহরামি অনাসৰো.

১৬৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৬৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যাগুদাযকো থেরো ইমা গাথাযো অভাসিত্থাতি.

যাগুদাযকত্থেরস্সাপদানং অট্ঠমং.