১. ভদ্দালিত্থেরঅপদানং

১. ‘‘সুমেধো নাম সম্বুদ্ধো, অগ্গো কারুণিকো মুনি;

ৰিৰেককামো লোকগ্গো, হিমৰন্তমুপাগমি.

২. ‘‘অজ্ঝোগাহেত্ৰা হিমৰং, সুমেধো লোকনাযকো;

পল্লঙ্কং আভুজিত্ৰান, নিসীদি পুরিসুত্তমো.

৩. ‘‘সমাধিং সো সমাপন্নো, সুমেধো লোকনাযকো;

সত্তরত্তিন্দিৰং বুদ্ধো, নিসীদি পুরিসুত্তমো.

৪. ‘‘খারিভারং [খারিকাজং (সী.)] গহেত্ৰান, ৰনমজ্ঝোগহিং অহং;

তত্থদ্দসাসিং সম্বুদ্ধং, ওঘতিণ্ণমনাসৰং.

৫. ‘‘সম্মজ্জনিং গহেত্ৰান, সম্মজ্জিত্ৰান অস্সমং;

চতুদণ্ডে ঠপেত্ৰান, অকাসিং মণ্ডপং তদা.

৬. ‘‘সালপুপ্ফং আহরিত্ৰা, মণ্ডপং ছাদযিং অহং;

পসন্নচিত্তো সুমনো, অভিৰন্দিং তথাগতং.

৭. ‘‘যং ৰদন্তি সুমেধোতি, ভূরিপঞ্ঞং সুমেধসং;

ভিক্খুসঙ্ঘে নিসীদিত্ৰা, ইমা গাথা অভাসথ.

৮. ‘‘‘বুদ্ধস্স গিরমঞ্ঞায, সব্বে দেৰা সমাগমুং;

অসংসযং বুদ্ধসেট্ঠো, ধম্মং দেসেতি চক্খুমা.

৯. ‘‘‘সুমেধো নাম সম্বুদ্ধো, আহুতীনং পটিগ্গহো;

দেৰসঙ্ঘে নিসীদিত্ৰা, ইমা গাথা অভাসথ.

১০. ‘‘‘যো মে সত্তাহং মণ্ডপং, ধারযী সালছাদিতং;

তমহং কিত্তযিস্সামি, সুণাথ মম ভাসতো.

১১. ‘‘‘দেৰভূতো মনুস্সো ৰা, হেমৰণ্ণো ভৰিস্সতি;

পহূতভোগো হুত্ৰান, কামভোগী ভৰিস্সতি.

১২. ‘‘‘সট্ঠি নাগসহস্সানি, সব্বালঙ্কারভূসিতা;

সুৰণ্ণকচ্ছা মাতঙ্গা, হেমকপ্পনৰাসসা.

১৩. ‘‘‘আরূল়্হা গামণীযেহি, তোমরঙ্কুসপাণিভি;

সাযং পাতো [সাযপাতো (পী.)] উপট্ঠানং, আগমিস্সন্তিমং নরং;

তেহি নাগেহি পরিৰুতো, রমিস্সতি অযং নরো.

১৪. ‘‘‘সট্ঠি অস্সসহস্সানি, সব্বালঙ্কারভূসিতা;

আজানীযাৰ জাতিযা, সিন্ধৰা সীঘৰাহিনো.

১৫. ‘‘‘আরূল়্হা গামণীযেহি, ইল্লিযাচাপধারিভি;

পরিৰারেস্সন্তিমং নিচ্চং, বুদ্ধপূজাযিদং ফলং.

১৬. ‘‘‘সট্ঠি রথসহস্সানি, সব্বালঙ্কারভূসিতা;

দীপা অথোপি ৰেযগ্ঘা, সন্নদ্ধা উস্সিতদ্ধজা.

১৭. ‘‘‘আরূল়্হা গামণীযেহি, চাপহত্থেহি ৰম্মিভি;

পরিৰারেস্সন্তিমং নিচ্চং, বুদ্ধপূজাযিদং ফলং.

১৮. ‘‘‘সট্ঠি গামসহস্সানি, পরিপুণ্ণানি সব্বসো;

পহূতধনধঞ্ঞানি, সুসমিদ্ধানি সব্বসো;

সদা পাতুভৰিস্সন্তি, বুদ্ধপূজাযিদং ফলং.

১৯. ‘‘‘হত্থী অস্সা রথা পত্তী, সেনা চ চতুরঙ্গিনী;

পরিৰারেস্সন্তিমং নিচ্চং, বুদ্ধপূজাযিদং ফলং.

২০. ‘‘‘অট্ঠারসে কপ্পসতে, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

২১. ‘‘‘সতানং তীণিক্খত্তুঞ্চ, দেৰরজ্জং করিস্সতি;

পদেসরজ্জং ৰিপুলং, গণনাতো অসঙ্খিযং.

২২. ‘‘‘তিংসকপ্পসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

২৩. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, ৰিহরিস্সতিনাসৰো’.

২৪. ‘‘তিংসকপ্পসহস্সম্হি, অদ্দসং লোকনাযকং;

এত্থন্তরমুপাদায, গৰেসিং অমতং পদং.

২৫. ‘‘লাভা ময্হং সুলদ্ধং মে, যমহঞ্ঞাসি সাসনং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২৬. ‘‘নমো তে পুরিসাজঞ্ঞ, নমো তে পুরিসুত্তম;

তৰ ঞাণং পকিত্তেত্ৰা, পত্তোম্হি অচলং পদং.

২৭. ‘‘যং যং যোনুপপজ্জামি, দেৰত্তং অথ মানুসং;

সব্বত্থ সুখিতো হোমি, ফলং মে ঞাণকিত্তনে.

২৮. ‘‘ইদং পচ্ছিমকং ময্হং, চরিমো ৰত্ততে ভৰো;

নাগোৰ বন্ধনং ছেত্ৰা, ৰিহরামি অনাসৰো.

২৯. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

৩০. ‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৩১. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ভদ্দালিত্থেরো ইমা গাথাযো অভাসিত্থাতি.

ভদ্দালিত্থেরস্সাপদানং পঠমং.