২. একছত্তিযত্থেরঅপদানং

৩২. ‘‘চন্দভাগানদীতীরে, অস্সমো সুকতো মম;

সুসুদ্ধপুলিনাকিণ্ণো, পন্নসালা সুমাপিতা.

৩৩. ‘‘উত্তানকূলা নদিকা, সুপতিত্থা মনোরমা;

মচ্ছকচ্ছপসম্পন্না [… সঞ্ছন্না (ক.)], সুসুমারনিসেৰিতা.

৩৪. ‘‘অচ্ছা দীপী চ মযূরা, করৰীকা চ সাল়িকা;

কূজন্তি সব্বদা এতে, সোভযন্তা মমস্সমং.

৩৫. ‘‘কোকিলা মঞ্জুভাণী চ, হংসা চ মধুরস্সরা;

অভিকূজন্তি তে তত্থ, সোভযন্তা মমস্সমং.

৩৬. ‘‘সীহা ব্যগ্ঘা ৰরাহা চ, অচ্ছ [ৰক (সী. পী.), বকা (স্যা.), ৰকা (ক.)] কোকতরচ্ছকা;

গিরিদুগ্গম্হি নাদেন্তি, সোভযন্তা মমস্সমং.

৩৭. ‘‘এণীমিগা চ সরভা, ভেরণ্ডা সূকরা বহূ;

গিরিদুগ্গম্হি নাদেন্তি, সোভযন্তা মমস্সমং.

৩৮. ‘‘উদ্দালকা চম্পকা চ, পাটলী সিন্দুৰারকা;

অতিমুত্তা অসোকা চ, সোভযন্তি মমস্সমং [পুপ্ফন্তি মম অস্সমে (সী. পী.)].

৩৯. ‘‘অঙ্কোলা যূথিকা চেৰ, সত্তলী বিম্বিজালিকা;

কণিকারা চ পুপ্ফন্তি, সোভযন্তা মমস্সমং [কণিকাকণিকারা চ, পুপ্ফন্তি মম অস্সমে (সী. স্যা. পী.)].

৪০. ‘‘নাগা সালা চ সল়লা, পুণ্ডরীকেত্থ পুপ্ফিতা;

দিব্বগন্ধং সম্পৰন্তা, সোভযন্তি মমস্সমং.

৪১. ‘‘অজ্জুনা অসনা চেত্থ, মহানামা চ পুপ্ফিতা;

সালা চ কঙ্গুপুপ্ফা চ, সোভযন্তি মমস্সমং.

৪২. ‘‘অম্বা জম্বূ চ তিলকা, নিম্বা চ সালকল্যাণী;

দিব্বগন্ধং সম্পৰন্তা, সোভযন্তি মমস্সমং.

৪৩. ‘‘অসোকা চ কপিট্ঠা চ, গিরিমালেত্থ [ভগিনিমালেত্থ (সী. পী.), ভগিনিমালা চ (স্যা.)] পুপ্ফিতা;

দিব্বগন্ধং সম্পৰন্তা, সোভযন্তি মমস্সমং.

৪৪. ‘‘কদম্বা কদলী চেৰ, ইসিমুগ্গা চ রোপিতা;

ধুৰং ফলানি ধারেন্তি, সোভযন্তা মমস্সমং.

৪৫. ‘‘হরীতকা আমলকা, অম্বজম্বুৰিভীতকা;

কোলা ভল্লাতকা বিল্লা, ফলিনো মম অস্সমে.

৪৬. ‘‘অৰিদূরে পোক্খরণী, সুপতিত্থা মনোরমা;

মন্দালকেহি সঞ্ছন্না, পদুমুপ্পলকেহি চ.

৪৭. ‘‘গব্ভং গণ্হন্তি পদুমা, অঞ্ঞে পুপ্ফন্তি কেসরী;

ওপত্তকণ্ণিকা চেৰ, পুপ্ফন্তি মম অস্সমে.

৪৮. ‘‘পাঠীনা পাৰুসা মচ্ছা, বলজা মুঞ্জরোহিতা;

অচ্ছোদকম্হি ৰিচরং, সোভযন্তি মমস্সমং.

৪৯. ‘‘নযিতা অম্বগন্ধী চ, অনুকূলে চ কেতকা;

দিব্বগন্ধং সম্পৰন্তা, সোভযন্তি মমস্সমং.

৫০. ‘‘মধু ভিসম্হা সৰতি, খীরসপ্পি মুল়ালিভি;

দিব্বগন্ধং সম্পৰন্তা, সোভযন্তি মমস্সমং.

৫১. ‘‘পুলিনা সোভনা তত্থ, আকিণ্ণা জলসেৰিতা;

ওপুপ্ফা পুপ্ফিতা সেন্তি, সোভযন্তা মমস্সমং.

৫২. ‘‘জটাভারেন ভরিতা, অজিনুত্তরৰাসনা;

ৰাকচীরধরা সব্বে, সোভযন্তি মমস্সমং.

৫৩. ‘‘যুগমত্তমপেক্খন্তা, নিপকা সন্তৰুত্তিনো;

কামভোগে অনপেক্খা, ৰসন্তি মম অস্সমে.

৫৪. ‘‘পরূল়্হকচ্ছনখলোমা, পঙ্কদন্তা রজস্সিরা;

রজোজল্লধরা সব্বে, ৰসন্তি মম অস্সমে.

৫৫. ‘‘অভিঞ্ঞাপারমিপ্পত্তা, অন্তলিক্খচরা চ তে;

উগ্গচ্ছন্তা নভং এতে, সোভযন্তি মমস্সমং.

৫৬. ‘‘তেহি সিস্সেহি পরিৰুতো, ৰসামি ৰিপিনে তদা;

রত্তিন্দিৰং ন জানামি, সদা ঝানসমপ্পিতো.

৫৭. ‘‘ভগৰা তম্হি সমযে, অত্থদস্সী মহামুনি;

তমন্ধকারং নাসেন্তো, উপ্পজ্জি লোকনাযকো.

৫৮. ‘‘অথ অঞ্ঞতরো সিস্সো, আগচ্ছি মম সন্তিকং;

মন্তে অজ্ঝেতুকামো সো, ছল়ঙ্গং নাম লক্খণং.

৫৯. ‘‘বুদ্ধো লোকে সমুপ্পন্নো, অত্থদস্সী মহামুনি;

চতুসচ্চং পকাসেন্তো, দেসেতি অমতং পদং.

৬০. ‘‘তুট্ঠহট্ঠো পমুদিতো, ধম্মন্তরগতাসযো;

অস্সমা অভিনিক্খম্ম, ইদং ৰচনমব্রৰিং.

৬১. ‘‘‘বুদ্ধো লোকে সমুপ্পন্নো, দ্ৰত্তিংসৰরলক্খণো;

এথ সব্বে গমিস্সাম, সম্মাসম্বুদ্ধসন্তিকং’.

৬২. ‘‘ওৰাদপটিকরা তে, সধম্মে পারমিং গতা;

সাধূতি সম্পটিচ্ছিংসু, উত্তমত্থগৰেসকা.

৬৩. ‘‘জটাভারভরিতা তে [জটাভারেন ভরিতা (ক.)], অজিনুত্তরৰাসনা;

উত্তমত্থং গৰেসন্তা, নিক্খমিংসু ৰনা তদা.

৬৪. ‘‘ভগৰা তম্হি সমযে, অত্থদস্সী মহাযসো;

চতুসচ্চং পকাসেন্তো, দেসেতি অমতং পদং.

৬৫. ‘‘সেতচ্ছত্তং গহেত্ৰান, বুদ্ধসেট্ঠস্স ধারযিং;

একাহং ধারযিত্ৰান, বুদ্ধসেট্ঠং অৰন্দহং.

৬৬. ‘‘অত্থদস্সী তু ভগৰা, লোকজেট্ঠো নরাসভো;

ভিক্খুসঙ্ঘে নিসীদিত্ৰা, ইমা গাথা অভাসথ.

৬৭. ‘‘‘যো মে ছত্তং অধারেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৬৮. ‘‘‘ইমস্স জাযমানস্স, দেৰত্তে অথ মানুসে;

ধারেস্সতি সদা ছত্তং, ছত্তদানস্সিদং ফলং.

৬৯. ‘‘‘সত্তসত্ততিকপ্পানি, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

৭০. ‘‘‘সত্তসত্ততিক্খত্তুঞ্চ, দেৰরজ্জং করিস্সতি;

পদেসরজ্জং ৰিপুলং, গণনাতো অসঙ্খিযং.

৭১. ‘‘‘অট্ঠারসে কপ্পসতে, গোতমো সক্যপুঙ্গৰো;

তমন্ধকারং নাসেন্তো, উপ্পজ্জিস্সতি চক্খুমা.

৭২. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, ৰিহরিস্সতিনাসৰো’.

৭৩. ‘‘যতো অহং কম্মমকং, ছত্তং বুদ্ধস্স ধারযং;

এত্থন্তরে ন জানামি, সেতচ্ছত্তং অধারিতং.

৭৪. ‘‘ইদং পচ্ছিমকং ময্হং, চরিমো ৰত্ততে ভৰো;

ছত্তধারণমজ্জাপি, ৰত্ততে নিচ্চকালিকং.

৭৫. ‘‘অহো মে সুকতং কম্মং, অত্থদস্সিস্স তাদিনো;

সব্বাসৰা পরিক্খীণা, নত্থি দানি পুনব্ভৰো.

৭৬. ‘‘কিলেসা ঝাপিতা ময্হং…পে… ৰিহরামি অনাসৰো.

৭৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

৭৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একছত্তিযো থেরো ইমা গাথাযো অভাসিত্থাতি;

একছত্তিযত্থেরস্সাপদানং দুতিযং.