৫. উপসীৰত্থেরঅপদানং

১০০. ‘‘হিমৰন্তস্সাৰিদূরে, অনোমো নাম পব্বতো;

অস্সমো সুকতো ময্হং, পণ্ণসালা সুমাপিতা.

১০১. ‘‘নদী চ সন্দতী তত্থ, সুপতিত্থা মনোরমা;

অনূপতিত্থে জাযন্তি, পদুমুপ্পলকা বহূ.

১০২. ‘‘পাঠীনা পাৰুসা মচ্ছা, বলজা মুঞ্জরোহিতা;

মচ্ছকচ্ছপসঞ্ছন্না [মচ্ছকচ্ছপসম্পন্না (?)], নদিকা সন্দতে তদা.

১০৩. ‘‘তিমিরা পুপ্ফিতা তত্থ, অসোকা খুদ্দমালকা;

পুন্নাগা গিরিপুন্নাগা, সম্পৰন্তি মমস্সমং.

১০৪. ‘‘কুটজা পুপ্ফিতা তত্থ, তিণসূলৰনানি চ;

সালা চ সল়লা তত্থ, চম্পকা পুপ্ফিতা বহূ.

১০৫. ‘‘অজ্জুনা অতিমুত্তা চ, মহানামা চ পুপ্ফিতা;

অসনা মধুগন্ধী চ, পুপ্ফিতা তে মমস্সমে.

১০৬. ‘‘উদ্দালকা পাটলিকা, যূথিকা চ পিযঙ্গুকা;

বিম্বিজালকসঞ্ছন্না, সমন্তা অড্ঢযোজনং.

১০৭. ‘‘মাতগ্গারা [মাতঙ্গৰা (সী.), মাতকরা (স্যা.), মাতঙ্গা ৰা (পী.)] সত্তলিযো, পাটলী সিন্দুৰারকা;

অঙ্কোলকা বহূ তত্থ, তালকুট্ঠি [তালকূটা (সী. স্যা.), তালকুট্ঠা (পী.)] চ পুপ্ফিতা;

সেলেয্যকা বহূ তত্থ, পুপ্ফিতা মম অস্সমে.

১০৮. ‘‘এতেসু পুপ্ফজাতেসু [পুপ্ফমানেসু (সী. পী.)], সোভন্তি পাদপা বহূ;

সমন্তা তেন গন্ধেন, ৰাযতে মম অস্সমো.

১০৯. ‘‘হরীতকা আমলকা, অম্বজম্বুৰিভীতকা [ৰিভিটকা (সী.)];

কোলা ভল্লাতকা বিল্লা, ফারুসকফলানি চ.

১১০. ‘‘তিন্দুকা চ পিযালা চ, মধুকা কাসুমারযো;

লবুজা পনসা তত্থ, কদলী বদরীফলা [মন্দরিফলা (ক.), চন্দরীফলা (স্যা. পী.)].

১১১. ‘‘অম্বাটকা বহূ তত্থ, ৰল্লিকারফলানি চ;

বীজপূরসপারিযো [চিরসংরসপাকা চ (স্যা.), ৰিটপা চ সপাকা চ (পী), ৰিদপরপদাদযো (ক.)], ফলিতা মম অস্সমে.

১১২. ‘‘আল়কা ইসিমুগ্গা চ, ততো মোদফলা বহূ;

অৰটা পক্কভরিতা [সক্করারিতা (ক.)], পিলক্খুদুম্বরানি চ.

১১৩. ‘‘পিপ্ফিলী মরীচা তত্থ, নিগ্রোধা চ কপিত্থনা;

উদুম্বরকা বহৰো, কণ্ডুপণ্ণা চ হরিযো [কণ্ডপক্কা চ পারিযো (সী. স্যা. পী.)].

১১৪. ‘‘এতে চঞ্ঞে চ বহৰো, ফলিতা অস্সমে মম;

পুপ্ফরুক্খাপি বহৰো, পুপ্ফিতা মম অস্সমে.

১১৫. ‘‘আলুৰা চ কল়ম্বা চ, বিল়ালী তক্কলানি চ;

আলকা তালকা চেৰ, ৰিজ্জন্তি অস্সমে মম.

১১৬. ‘‘অস্সমস্সাৰিদূরে মে, মহাজাতস্সরো অহু;

অচ্ছোদকো সীতজলো, সুপতিত্থো মনোরমো.

১১৭. ‘‘পদুমুপ্পলা বহূ তত্থ, পুণ্ডরীকসমাযুতা;

মন্দালকেহি সঞ্ছন্না, নানাগন্ধসমেরিতা.

১১৮. ‘‘গব্ভং গণ্হন্তি পদুমা, অঞ্ঞে পুপ্ফন্তি কেসরী;

ওপুপ্ফপত্তা তিট্ঠন্তি, পদুমাকণ্ণিকা বহূ.

১১৯. ‘‘মধু ভিসম্হা সৰতি, খীরং সপ্পি মুলাল়িভি;

সমন্তা তেন গন্ধেন, নানাগন্ধসমেরিতা.

১২০. ‘‘কুমুদা অম্বগন্ধি চ, নযিতা দিস্সরে বহূ;

জাতস্সরস্সানুকূলং, কেতকা পুপ্ফিতা বহূ.

১২১. ‘‘সুফুল্লা বন্ধুজীৰা চ, সেতৰারী সুগন্ধিকা;

কুম্ভিলা সুসুমারা চ, গহকা তত্থ জাযরে.

১২২. ‘‘উগ্গাহকা অজগরা, তত্থ জাতস্সরে বহূ;

পাঠীনা পাৰুসা মচ্ছা, বলজা মুঞ্জরোহিতা.

১২৩. ‘‘মচ্ছকচ্ছপসঞ্ছন্না, অথো পপটকাহি [পম্পটকেহি (সী.), সপটকেহি (স্যা.), পপ্পটকেহি (পী)] চ;

পারেৰতা রৰিহংসা, কুকুত্থা [কুক্কুত্থা (স্যা. ক.), কুত্থকা (পী.)] চ নদীচরা.

১২৪. ‘‘দিন্দিভা [টিট্টিভা (পী.)] চক্কৰাকা চ, পম্পকা জীৰজীৰকা;

কলন্দকা উক্কুসা চ, সেনকা উদ্ধরা বহূ.

১২৫. ‘‘কোট্ঠকা সুকপোতা চ, তুলিযা চমরা বহূ;

কারেনিযো [কাসেনিযা (স্যা.)] চ তিলকা [কিলকা (ক.)], উপজীৰন্তি তং সরং.

১২৬. ‘‘সীহা ব্যগ্ঘা চ দীপী চ, অচ্ছকোকতরচ্ছকা;

ৰানরা কিন্নরা চেৰ, দিস্সন্তি মম অস্সমে.

১২৭. ‘‘তানি গন্ধানি ঘাযন্তো, ভক্খযন্তো ফলানহং;

গন্ধোদকং পিৰন্তো চ, ৰসামি মম অস্সমে.

১২৮. ‘‘এণীমিগা ৰরাহা চ, পসদা খুদ্দরূপকা;

অগ্গিকা জোতিকা চেৰ, ৰসন্তি মম অস্সমে.

১২৯. ‘‘হংসা কোঞ্চা মযূরা চ, সালিকাপি চ কোকিলা;

মজ্জারিকা [মঞ্জরিকা (সী. স্যা. পী.)] বহূ তত্থ, কোসিকা পোট্ঠসীসকা.

১৩০. ‘‘পিসাচা দানৰা চেৰ, কুম্ভণ্ডা রক্খসা বহূ;

গরুল়া পন্নগা চেৰ, ৰসন্তি মম অস্সমে.

১৩১. ‘‘মহানুভাৰা ইসযো, সন্তচিত্তা সমাহিতা;

কমণ্ডলুধরা সব্বে, অজিনুত্তরৰাসনা;

জটাভারভরিতাৰ [তে জটাভারভরিতা (সী. পী.), জটাভারভরিতা চ (স্যা.)], ৰসন্তি মম অস্সমে.

১৩২. ‘‘যুগমত্তঞ্চ পেক্খন্তা, নিপকা সন্তৰুত্তিনো;

লাভালাভেন সন্তুট্ঠা, ৰসন্তি মম অস্সমে.

১৩৩. ‘‘ৰাকচীরং ধুনন্তা তে, ফোটেন্তাজিনচম্মকং;

সবলেহি উপত্থদ্ধা, গচ্ছন্তি অম্বরে তদা.

১৩৪. ‘‘ন তে দকং আহরন্তি, কট্ঠং ৰা অগ্গিদারুকং;

সযঞ্চ উপসম্পন্না, পাটিহীরস্সিদং ফলং.

১৩৫. ‘‘লোহদোণিং গহেত্ৰান, ৰনমজ্ঝে ৰসন্তি তে;

কুঞ্জরাৰ মহানাগা, অসম্ভীতাৰ কেসরী.

১৩৬. ‘‘অঞ্ঞে গচ্ছন্তি গোযানং, অঞ্ঞে পুব্বৰিদেহকং [পুব্বৰিদেহনং (স্যা. পী. ক.)];

অঞ্ঞে চ উত্তরকুরুং, সকং বলমৰস্সিতা [বলমপস্সিতা (স্যা. পী. ক.)].

১৩৭. ‘‘ততো পিণ্ডং আহরিত্ৰা, পরিভুঞ্জন্তি একতো;

সব্বেসং পক্কমন্তানং, উগ্গতেজান তাদিনং.

১৩৮. ‘‘অজিনচম্মসদ্দেন, ৰনং সদ্দাযতে তদা;

এদিসা তে মহাৰীর, সিস্সা উগ্গতপা মম.

১৩৯. ‘‘পরিৰুতো অহং তেহি, ৰসামি মম অস্সমে;

তোসিতা সককম্মেন, ৰিনীতাপি সমাগতা.

১৪০. ‘‘আরাধযিংসু মং এতে, সককম্মাভিলাসিনো;

সীলৰন্তো চ নিপকা, অপ্পমঞ্ঞাসু কোৰিদা.

১৪১. ‘‘পদুমুত্তরো লোকৰিদূ, আহুতীনং পটিগ্গহো;

সমযং সংৰিদিত্ৰান, উপগচ্ছি ৰিনাযকো.

১৪২. ‘‘উপগন্ত্ৰান সম্বুদ্ধো, আতাপী নিপকো মুনি;

পত্তং পগ্গয্হ সম্বুদ্ধো, ভিক্খায মমুপাগমি.

১৪৩. ‘‘উপাগতং মহাৰীরং, জলজুত্তমনাযকং;

তিণসন্থরং [তিণত্থরং (স্যা.), তিণত্থতং (ক.)] পঞ্ঞাপেত্ৰা, সালপুপ্ফেহি ওকিরিং.

১৪৪. ‘‘নিসাদেত্ৰান [নিসীদেত্ৰান (সী.), নিসীদিত্ৰান (স্যা. পী.)] সম্বুদ্ধং, হট্ঠো সংৰিগ্গমানসো;

খিপ্পং পব্বতমারুয্হ, অগল়ুং [অগরুং (সী.)] অগ্গহিং অহং.

১৪৫. ‘‘কুম্ভমত্তং গহেত্ৰান, পনসং দেৰগন্ধিকং;

খন্ধে আরোপযিত্ৰান, উপগচ্ছিং ৰিনাযকং.

১৪৬. ‘‘ফলং বুদ্ধস্স দত্ৰান, অগল়ুং অনুলিম্পহং;

পসন্নচিত্তো সুমনো, বুদ্ধসেট্ঠং অৰন্দিহং.

১৪৭. ‘‘পদুমুত্তরো লোকৰিদূ, আহুতীনং পটিগ্গহো;

ইসিমজ্ঝে নিসীদিত্ৰা, ইমা গাথা অভাসথ.

১৪৮. ‘‘‘যো মে ফলঞ্চ অগল়ুং, আসনঞ্চ অদাসি মে;

তমহং কিত্তযিস্সামি, সুণাথ মম ভাসতো.

১৪৯. ‘‘‘গামে ৰা যদি ৰারঞ্ঞে, পব্ভারেসু গুহাসু ৰা;

ইমস্স চিত্তমঞ্ঞায, নিব্বত্তিস্সতি ভোজনং.

১৫০. ‘‘‘দেৰলোকে মনুস্সে ৰা, উপপন্নো অযং নরো;

ভোজনেহি চ ৰত্থেহি, পরিসং তপ্পযিস্সতি.

১৫১. ‘‘‘উপপজ্জতি যং যোনিং, দেৰত্তং অথ মানুসং;

অক্খোভভোগো হুত্ৰান, সংসরিস্সতিযং নরো.

১৫২. ‘‘‘তিংসকপ্পসহস্সানি, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

১৫৩. ‘‘‘একসত্ততিক্খত্তুঞ্চ, দেৰরজ্জং করিস্সতি;

পদেসরজ্জং ৰিপুলং, গণনাতো অসঙ্খিযং.

১৫৪. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

১৫৫. ‘‘‘তস্স ধম্মেসু দাযাদো, ওরসো ধম্মনিম্মিতো [(উপসীৰো নাম নামেন, হেস্সতি সত্থু সাৰকো) (স্যা.)];

সব্বাসৰে পরিঞ্ঞায, ৰিহরিস্সতিনাসৰো’.

১৫৬. ‘‘সুলদ্ধলাভো লদ্ধো মে, যোহং অদ্দক্খিং নাযকং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৫৭. ‘‘গামে ৰা যদি ৰারঞ্ঞে, পব্ভারেসু গুহাসু ৰা;

মম সঙ্কপ্পমঞ্ঞায, ভোজনং হোতি মে সদা.

১৫৮. ‘‘কিলেসা ঝাপিতা ময্হং…পে… ৰিহরামি অনাসৰো.

১৫৯. ‘‘স্ৰাগতং ৰত মে আসি…পে… কতং বুদ্ধস্স সাসনং.

১৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপসীৰো [উপসিৰো (ক.)] থেরো ইমা গাথাযো অভাসিত্থাতি.

উপসীৰত্থেরস্সাপদানং পঞ্চমং.