১. তিস্সমেত্তেয্যত্থেরঅপদানং

১. ‘‘পব্ভারকূটং নিস্সায, সোভিতো নাম তাপসো;

পৰত্তফলং ভুঞ্জিত্ৰা, ৰসতি পব্বতন্তরে.

২. ‘‘অগ্গিং দারুং আহরিত্ৰা, উজ্জালেসিং অহং তদা;

উত্তমত্থং গৰেসন্তো, ব্রহ্মলোকূপপত্তিযা.

৩. ‘‘পদুমুত্তরো লোকৰিদূ, আহুতীনং পটিগ্গহো;

মমুদ্ধরিতুকামো সো, আগচ্ছি মম সন্তিকে.

৪. ‘‘কিং করোসি মহাপুঞ্ঞ, দেহি মে অগ্গিদারুকং;

অহমগ্গিং পরিচরে, ততো মে সুদ্ধি হোহিতি [হেহিতি (সী.)].

৫. ‘‘সুভদ্দকো ত্ৰং মনুজে, দেৰতে ত্ৰং পজানসি;

তুৰং অগ্গিং পরিচর, হন্দ তে অগ্গিদারুকং.

৬. ‘‘ততো কট্ঠং গহেত্ৰান, অগ্গিং উজ্জালযী জিনো;

ন তত্থ কট্ঠং পজ্ঝাযি, পাটিহেরং মহেসিনো.

৭. ‘‘ন তে অগ্গি পজ্জলতি, আহুতী তে ন ৰিজ্জতি;

নিরত্থকং ৰতং তুয্হং, অগ্গিং পরিচরস্সু মে.

৮. ‘‘কীদিসো সো [তে (স্যা. ক.)] মহাৰীর, অগ্গি তৰ পৰুচ্চতি;

ময্হম্পি কথযস্সেতং, উভো পরিচরামসে.

৯. ‘‘হেতুধম্মনিরোধায, কিলেসসমণায চ;

ইস্সামচ্ছরিযং হিত্ৰা, তযো এতে মমাহুতী.

১০. ‘‘কীদিসো ত্ৰং মহাৰীর, কথং গোত্তোসি মারিস;

আচারপটিপত্তি তে, বাল়্হং খো মম রুচ্চতি.

১১. ‘‘খত্তিযম্হি কুলে জাতো, অভিঞ্ঞাপারমিং গতো;

সব্বাসৰপরিক্খীণো, নত্থি দানি পুনব্ভৰো.

১২. ‘‘যদি বুদ্ধোসি সব্বঞ্ঞূ, পভঙ্কর তমোনুদ;

নমস্সিস্সামি তং দেৰ, দুক্খস্সন্তকরো তুৰং.

১৩. ‘‘পত্থরিত্ৰাজিনচম্মং, নিসীদনমদাসহং;

নিসীদ নাথ সব্বঞ্ঞু, উপট্ঠিস্সামহং তুৰং.

১৪. ‘‘নিসীদি ভগৰা তত্থ, অজিনম্হি সুৰিত্থতে;

নিমন্তযিত্ৰা সম্বুদ্ধং, পব্বতং অগমাসহং.

১৫. ‘‘খারিভারঞ্চ পূরেত্ৰা, তিন্দুকফলমাহরিং;

মধুনা যোজযিত্ৰান, ফলং বুদ্ধস্সদাসহং.

১৬. ‘‘মম নিজ্ঝাযমানস্স, পরিভুঞ্জি তদা জিনো;

তত্থ চিত্তং পসাদেসিং, পেক্খন্তো লোকনাযকং.

১৭. ‘‘পদুমুত্তরো লোকৰিদূ, আহুতীনং পটিগ্গহো;

মমস্সমে নিসীদিত্ৰা, ইমা গাথা অভাসথ.

১৮. ‘‘‘যো মং ফলেন তপ্পেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

১৯. ‘‘‘পঞ্চৰীসতিক্খত্তুং সো, দেৰরজ্জং করিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

২০. ‘‘‘তস্স সঙ্কপ্পমঞ্ঞায, পুব্বকম্মসমঙ্গিনো;

অন্নং পানঞ্চ ৰত্থঞ্চ, সযনঞ্চ মহারহং.

২১. ‘‘‘পুঞ্ঞকম্মেন সংযুত্তা, নিব্বত্তিস্সন্তি তাৰদে;

সদা পমুদিতো চাযং, ভৰিস্সতি অনামযো.

২২. ‘‘‘উপপজ্জতি যং যোনিং, দেৰত্তং অথ মানুসং;

সব্বত্থ সুখিতো হুত্ৰা, মনুস্সত্তং গমিস্সতি.

২৩. ‘‘‘অজ্ঝাযকো মন্তধরো, তিণ্ণং ৰেদান পারগূ;

সম্বুদ্ধং উপগন্ত্ৰান, অরহা সো ভৰিস্সতি’.

২৪. ‘‘যতো সরামি অত্তানং, যতো পত্তোস্মি ৰিঞ্ঞুতং;

ভোগে মে ঊনতা নত্থি, ফলদানস্সিদং ফলং.

২৫. ‘‘ৰরধম্মমনুপ্পত্তো, রাগদোসে সমূহনিং;

সব্বাসৰপরিক্খীণো, নত্থি দানি পুনব্ভৰো.

২৬. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

২৭. ‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২৮. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তিস্সমেত্তেয্যো থেরো ইমা গাথাযো অভাসিত্থাতি.

তিস্সমেত্তেয্যত্থেরস্সাপদানং পঠমং.