৯. সব্বদাযকত্থেরঅপদানং

৪৫৬. ‘‘মহাসমুদ্দং ওগয্হ, ভৰনং মে সুনিম্মিতং;

সুনিম্মিতা পোক্খরণী, চক্কৰাকপকূজিতা.

৪৫৭. ‘‘মন্দালকেহি সঞ্ছন্না, পদুমুপ্পলকেহি চ;

নদী চ সন্দতে তত্থ, সুপতিত্থা মনোরমা.

৪৫৮. ‘‘মচ্ছকচ্ছপসঞ্ছন্না, নানাদিজসমোত্থতা;

মযূরকোঞ্চাভিরুদা, কোকিলাদীহি ৰগ্গুহি.

৪৫৯. ‘‘পারেৰতা রৰিহংসা চ, চক্কৰাকা নদীচরা;

দিন্দিভা সাল়িকা চেত্থ, পম্মকা [পম্পকা (সী.), চপ্পকা (স্যা.)] জীৰজীৰকা.

৪৬০. ‘‘হংসা কোঞ্চাপি নদিতা [কোঞ্চাভিনদিতা (সী. স্যা.)], কোসিযা পিঙ্গলা বহূ;

সত্তরতনসম্পন্না, মণিমুত্তিকৰালুকা.

৪৬১. ‘‘সব্বসোণ্ণমযা রুক্খা, নানাগন্ধসমেরিতা;

উজ্জোতেন্তি দিৰারত্তিং, ভৰনং সব্বকালিকং.

৪৬২. ‘‘সট্ঠি তূরিযসহস্সানি, সাযং পাতো পৰজ্জরে;

সোল়সিত্থিসহস্সানি, পরিৰারেন্তি মং সদা.

৪৬৩. ‘‘অভিনিক্খম্ম ভৰনা, সুমেধং লোকনাযকং;

পসন্নচিত্তো সুমনো, ৰন্দযিং তং মহাযসং.

৪৬৪. ‘‘সম্বুদ্ধং অভিৰাদেত্ৰা, সসঙ্ঘং তং নিমন্তযিং;

অধিৰাসেসি সো ধীরো, সুমেধো লোকনাযকো.

৪৬৫. ‘‘মম ধম্মকথং কত্ৰা, উয্যোজেসি মহামুনি;

সম্বুদ্ধং অভিৰাদেত্ৰা, ভৰনং মে উপাগমিং.

৪৬৬. ‘‘আমন্তযিং পরিজনং, সব্বে সন্নিপতাথ [সন্নিপতত্থ (ক.)] ৰো;

পুব্বণ্হসমযং বুদ্ধো, ভৰনং আগমিস্সতি.

৪৬৭. ‘‘লাভা অম্হং সুলদ্ধং নো, যে ৰসাম তৰন্তিকে;

মযম্পি বুদ্ধসেট্ঠস্স, পূজং কস্সাম সত্থুনো.

৪৬৮. ‘‘অন্নপনং পট্ঠপেত্ৰা, কালং আরোচযিং অহং;

ৰসীসতসহস্সেহি, উপেসি লোকনাযকো.

৪৬৯. ‘‘পঞ্চঙ্গিকেহি তূরিযেহি, পচ্চুগ্গমনমকাসহং;

সব্বসোণ্ণমযে পীঠে, নিসীদি পুরিসুত্তমো.

৪৭০. ‘‘উপরিচ্ছদনং আসি, সব্বসোণ্ণমযং তদা;

বীজনিযো পৰাযন্তি, ভিক্খুসঙ্ঘস্স অন্তরে.

৪৭১. ‘‘পহূতেনন্নপানেন, ভিক্খুসঙ্ঘমতপ্পযিং;

পচ্চেকদুস্সযুগল়ে, ভিক্খুসঙ্ঘস্সদাসহং.

৪৭২. ‘‘যং ৰদন্তি সুমেধোতি, লোকাহুতিপটিগ্গহং;

ভিক্খুসঙ্ঘে নিসীদিত্ৰা, ইমা গাথা অভাসথ.

৪৭৩. ‘‘যো মে অন্নেন পানেন, সব্বে ইমে চ তপ্পযিং;

তমহং কিত্তযিস্সামি, সুণাথ মম ভাসতো.

৪৭৪. ‘‘অট্ঠারসে কপ্পসতে, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

৪৭৫. ‘‘উপ্পজ্জতি [উপগচ্ছতি (সী.)] যং যোনিং, দেৰত্তং অথ মানুসং;

সব্বদা সব্বসোৰণ্ণং, ছদনং ধারযিস্সতি.

৪৭৬. ‘‘তিংসকপ্পসহস্সম্হি, ওক্কাককুসলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪৭৭. ‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

৪৭৮. ‘‘‘ভিক্খুসঙ্ঘে নিসীদিত্ৰা, সীহনাদং নদিস্সতি;

চিতকে ছত্তং ধারেন্তি, হেট্ঠা ছত্তম্হি ডয্হথ’.

৪৭৯. ‘‘সামঞ্ঞং মে অনুপ্পত্তং, কিলেসা ঝাপিতা মযা;

মণ্ডপে রুক্খমূলে ৰা, সন্তাপো মে ন ৰিজ্জতি.

৪৮০. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, সব্বদানস্সিদং ফলং.

৪৮১. ‘‘কিলেসা ঝাপিতা ময্হং…পে… ৰিহরামি অনাসৰো.

৪৮২. ‘‘স্ৰাগতং ৰত মে আসি…পে… কতং বুদ্ধস্স সাসনং.

৪৮৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সব্বদাযকো থেরো ইমা গাথাযো অভাসিত্থাতি.

সব্বদাযকত্থেরস্সাপদানং নৰমং.