১০. অজিতত্থেরঅপদানং

৪৮৪. ‘‘পদুমুত্তরো নাম জিনো, সব্বধম্মান পারগূ;

অজ্ঝোগাহেত্ৰা হিমৰন্তং, নিসীদি লোকনাযকো.

৪৮৫. ‘‘নাহং অদ্দক্খিং [পস্সামি (?)] সম্বুদ্ধং, নপি সদ্দং সুণোমহং;

মম ভক্খং গৰেসন্তো, আহিণ্ডামি ৰনে অহং [তদা (সী.)].

৪৮৬. ‘‘তত্থদ্দস্সাসিং সম্বুদ্ধং, দ্ৰত্তিংসৰরলক্খণং;

দিস্ৰান ৰিত্তিমাপজ্জিং [চিত্তমাপজ্জি (সী.), চিত্তমাপজ্জিং (স্যা.)], সত্তো কো নামযং ভৰে.

৪৮৭. ‘‘লক্খণানি ৰিলোকেত্ৰা, মম ৰিজ্জং অনুস্সরিং;

সুতঞ্হি মেতং ৰুড্ঢানং, পণ্ডিতানং সুভাসিতং.

৪৮৮. ‘‘তেসং যথা তং ৰচনং, অযং বুদ্ধো ভৰিস্সতি;

যংনূনাহং সক্করেয্যং, গতিং মে সোধযিস্সতি.

৪৮৯. ‘‘খিপ্পং অস্সমমাগন্ত্ৰা, মধুতেলং গহিং অহং;

কোলম্বকং গহেত্ৰান, উপগচ্ছিং ৰিনাযকং [নরাসভং (সী.)].

৪৯০. ‘‘তিদণ্ডকে গহেত্ৰান, অব্ভোকাসে ঠপেসহং;

পদীপং পজ্জলিত্ৰান, অট্ঠক্খত্তুং অৰন্দহং.

৪৯১. ‘‘সত্তরত্তিন্দিৰং বুদ্ধো, নিসীদি পুরিসুত্তমো;

ততো রত্যা ৰিৰসানে, ৰুট্ঠাসি লোকনাযকো.

৪৯২. ‘‘পসন্নচিত্তো সুমনো, সব্বরত্তিন্দিৰং অহং;

দীপং বুদ্ধস্স পাদাসিং, পসন্নো সেহি পাণিভি.

৪৯৩. ‘‘সব্বে ৰনা গন্ধমযা, পব্বতে গন্ধমাদনে;

বুদ্ধস্স আনুভাৰেন, আগচ্ছুং বুদ্ধসন্তিকং [উপগচ্ছুং তদা জিনং (সী.)].

৪৯৪. ‘‘যে কেচি পুপ্ফগন্ধাসে, পুপ্ফিতা ধরণীরুহা;

বুদ্ধস্স আনুভাৰেন, সব্বে সন্নিপতুং তদা.

৪৯৫. ‘‘যাৰতা হিমৰন্তম্হি, নাগা চ গরুল়া উভো;

ধম্মঞ্চ সোতুকামা তে, আগচ্ছুং বুদ্ধসন্তিকং.

৪৯৬. ‘‘দেৰলো নাম সমণো, বুদ্ধস্স অগ্গসাৰকো;

ৰসীসতসহস্সেহি, বুদ্ধসন্তিকুপাগমি.

৪৯৭. ‘‘পদুমুত্তরো লোকৰিদূ, আহুতীনং পটিগ্গহো;

ভিক্খুসঙ্ঘে নিসীদিত্ৰা, ইমা গাথা অভাসথ.

৪৯৮. ‘‘‘যো মে দীপং পদীপেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৪৯৯. ‘‘‘সট্ঠি কপ্পসহস্সানি, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

সোল়সমং ভাণৰারং.

৫০০. ‘‘‘ছত্তিসক্খত্তুং দেৰিন্দো, দেৰরজ্জং করিস্সতি;

পথৰিযং সত্তসতং, ৰিপুলং রজ্জং করিস্সতি.

৫০১. ‘‘‘পদেসরজ্জং ৰিপুলং, গণনাতো অসঙ্খিযং;

ইমিনা দীপদানেন, দিব্বচক্খু ভৰিস্সতি.

৫০২. ‘‘‘সমন্ততো অট্ঠকোসং [অড্ঢকোসং (সী. স্যা.)], পস্সিস্সতি অযং সদা;

দেৰলোকা চৰন্তস্স, নিব্বত্তন্তস্স জন্তুনো.

৫০৩. ‘‘‘দিৰা ৰা যদি ৰা রত্তিং, পদীপং ধারযিস্সতি;

জাযমানস্স সত্তস্স, পুঞ্ঞকম্মসমঙ্গিনো.

৫০৪. ‘‘‘যাৰতা নগরং আসি, তাৰতা জোতযিস্সতি;

উপপজ্জতি যং যোনিং, দেৰত্তং অথ মানুসং.

৫০৫. ‘‘‘অস্সেৰ দীপদানস্স, [অট্ঠদীপফলেন হি; উপট্ঠিস্সন্তিমং জন্তুং (স্যা.), অট্ঠ দীপা ফলেন হি; ন জহিস্সন্তি’মং জন্তুং (?)] অট্ঠদীপফলেন হি;

ন জযিস্সন্তিমং জন্তূ [অট্ঠদীপফলেন হি; উপট্ঠিস্সন্তিমং জন্তুং (স্যা.), অট্ঠ দীপা ফলেন হি; ন জহিস্সন্তি’মং জন্তুং (?)], দীপদানস্সিদং ফলং.

৫০৬. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৫০৭. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

৫০৮. ‘‘‘তোসযিত্ৰান সম্বুদ্ধং, গোতমং সক্যপুঙ্গৰং;

অজিতো নাম নামেন, হেস্সতি সত্থু সাৰকো’.

৫০৯. ‘‘সট্ঠি কপ্পসহস্সানি, দেৰলোকে রমিং অহং;

তত্রাপি মে দীপসতং, জোততে নিচ্চকালিকং [সব্বকালিকং (সী.)].

৫১০. ‘‘দেৰলোকে মনুস্সে ৰা, নিদ্ধাৰন্তি পভা মম;

বুদ্ধসেট্ঠং সরিত্ৰান, ভিয্যো হাসং জনেসহং.

৫১১. ‘‘তুসিতাহং চৰিত্ৰান, ওক্কমিং মাতুকুচ্ছিযং;

জাযমানস্স সন্তস্স, আলোকো ৰিপুলো অহু.

৫১২. ‘‘অগারা অভিনিক্খম্ম, পব্বজিং অনগারিযং;

বাৰরিং উপসঙ্কম্ম, সিস্সত্তং অজ্ঝুপাগমিং.

৫১৩. ‘‘হিমৰন্তে ৰসন্তোহং, অস্সোসিং লোকনাযকং;

উত্তমত্থং গৰেসন্তো, উপগচ্ছিং ৰিনাযকং.

৫১৪. ‘‘দন্তো বুদ্ধো দমেতাৰী, ওঘতিণ্ণো নিরূপধি;

নিব্বানং কথযী বুদ্ধো, সব্বদুক্খপ্পমোচনং.

৫১৫. ‘‘তং মে আগমনং সিদ্ধং, তোসিতোহং মহামুনিং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৫১৬. ‘‘সতসহস্সিতো কপ্পে, যং দীপমদদিং তদা;

দুগ্গতিং নাভিজানামি, দীপদানস্সিদং ফলং.

৫১৭. ‘‘কিলেসা ঝাপিতা ময্হং…পে… ৰিহরামি অনাসৰো.

৫১৮. ‘‘স্ৰাগতং ৰত মে আসি…পে… কতং বুদ্ধস্স সাসনং.

৫১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অজিতো থেরো ইমা গাথাযো অভাসিত্থাতি.

অজিতত্থেরস্সাপদানং দসমং.

পিলিন্দৰচ্ছৰগ্গো চত্তালীসমো.

তস্সুদ্দানং –

পিলিন্দৰচ্ছো সেলো চ, সব্বকিত্তী মধুংদদো;

কূটাগারী বাকুলো চ, গিরি সল়লসৰ্হযো.

সব্বদো অজিতো চেৰ, গাথাযো গণিতা ইহ;

সতানি পঞ্চ গাথানং, ৰীসতি চ তদুত্তরীতি.

অথ ৰগ্গুদ্দানং –

পদুমারক্খদো চেৰ, উমা গন্ধোদকেন চ;

একপদ্ম সদ্দসঞ্ঞী, মন্দারং বোধিৰন্দকো.

অৰটঞ্চ পিলিন্দি [এৰমেৰ দিস্সতি] চ, গাথাযো গণিতা ইহ;

চতুসত্ততি গাথাযো, একাদস সতানি চ.

পদুমৰগ্গদসকং.