৬. বাকুলত্থেরঅপদানং

৩৮৬. ‘‘হিমৰন্তস্সাৰিদূরে, সোভিতো নাম পব্বতো;

অস্সমো সুকতো ময্হং, সকসিস্সেহি মাপিতো.

৩৮৭. ‘‘মণ্ডপা চ বহূ তত্থ, পুপ্ফিতা সিন্দুৰারকা;

কপিত্থা চ বহূ তত্থ, পুপ্ফিতা জীৰজীৰকা [চম্পকা নাগকেতকা (স্যা.)].

৩৮৮. ‘‘নিগ্গুণ্ডিযো বহূ তত্থ, বদরামলকানি চ;

ফারুসকা অলাবূ চ, পুণ্ডরীকা চ পুপ্ফিতা.

৩৮৯. ‘‘আল়কা [অল়ক্কা (স্যা.)] বেলুৰা তত্থ, কদলী মাতুলুঙ্গকা;

মহানামা বহূ তত্থ, অজ্জুনা চ পিযঙ্গুকা.

৩৯০. ‘‘কোসম্বা সল়লা নিম্বা [নীপা (সী.)], নিগ্রোধা চ কপিত্থনা;

এদিসো অস্সমো ময্হং, সসিস্সোহং তহিং ৰসিং.

৩৯১. ‘‘অনোমদস্সী ভগৰা, সযম্ভূ লোকনাযকো;

গৰেসং পটিসল্লানং, মমস্সমমুপাগমি.

৩৯২. ‘‘উপেতম্হি মহাৰীরে, অনোমদস্সিমহাযসে;

খণেন লোকনাথস্স, ৰাতাবাধো সমুট্ঠহি.

৩৯৩. ‘‘ৰিচরন্তো অরঞ্ঞম্হি, অদ্দসং লোকনাযকং;

উপগন্ত্ৰান সম্বুদ্ধং, চক্খুমন্তং মহাযসং.

৩৯৪. ‘‘ইরিযঞ্চাপি দিস্ৰান, উপলক্খেসহং তদা;

অসংসযঞ্হি বুদ্ধস্স, ব্যাধি নো উদপজ্জথ.

৩৯৫. ‘‘খিপ্পং অস্সমমাগঞ্ছিং, মম সিস্সান সন্তিকে;

ভেসজ্জং কত্তুকামোহং, সিস্সে আমন্তযিং তদা.

৩৯৬. ‘‘পটিস্সুণিত্ৰান মে ৰাক্যং, সিস্সা সব্বে সগারৰা;

একজ্ঝং সন্নিপতিংসু, সত্থুগারৰতা মম.

৩৯৭. ‘‘খিপ্পং পব্বতমারুয্হ, সব্বোসধমহাসহং [মকাসহং (স্যা. ক.)];

পানীযযোগং [পানীযযোগ্গং (সী.)] কত্ৰান, বুদ্ধসেট্ঠস্সদাসহং.

৩৯৮. ‘‘পরিভুত্তে মহাৰীরে, সব্বঞ্ঞুলোকনাযকে;

খিপ্পং ৰাতো ৰূপসমি, সুগতস্স মহেসিনো.

৩৯৯. ‘‘পস্সদ্ধং দরথং দিস্ৰা, অনোমদস্সী মহাযসো;

সকাসনে নিসীদিত্ৰা, ইমা গাথা অভাসথ.

৪০০. ‘‘‘যো মে পাদাসি ভেসজ্জং, ব্যাধিঞ্চ সমযী মম;

তমহং কিত্তযিস্সামি, সুণাথ মম ভাসতো.

৪০১. ‘‘‘কপ্পসতসহস্সানি, দেৰলোকে রমিস্সতি;

ৰাদিতে তূরিযে তত্থ, মোদিস্সতি সদা অযং.

৪০২. ‘‘‘মনুস্সলোকমাগন্ত্ৰা, সুক্কমূলেন চোদিতো;

সহস্সক্খত্তুং রাজা চ, চক্কৰত্তী ভৰিস্সতি.

৪০৩. ‘‘‘পঞ্চপঞ্ঞাসকপ্পম্হি, অনোমো নাম খত্তিযো;

চাতুরন্তো ৰিজিতাৰী, জম্বুমণ্ডস্স [জম্বুদীপস্স (স্যা.)] ইস্সরো.

৪০৪. ‘‘‘সত্তরতনসম্পন্নো, চক্কৰত্তী মহব্বলো;

তাৰতিংসেপি খোভেত্ৰা, ইস্সরং কারযিস্সতি.

৪০৫. ‘‘‘দেৰভূতো মনুস্সো ৰা, অপ্পাবাধো ভৰিস্সতি;

পরিগ্গহং ৰিৰজ্জেত্ৰা, ব্যাধিং লোকে তরিস্সতি.

৪০৬. ‘‘‘অপ্পরিমেয্যে ইতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪০৭. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

৪০৮. ‘‘‘কিলেসে ঝাপযিত্ৰান, তণ্হাসোতং তরিস্সতি;

বাকুলো [বক্কুলো (সী. স্যা.)] নাম নামেন, হেস্সতি সত্থু সাৰকো.

৪০৯. ‘‘‘ইদং সব্বং অভিঞ্ঞায, গোতমো সক্যপুঙ্গৰো;

ভিক্খুসঙ্ঘে নিসীদিত্ৰা, এতদগ্গে ঠপেস্সতি’.

৪১০. ‘‘অনোমদস্সী ভগৰা, সযম্ভূ লোকনাযকো;

ৰিৰেকানুৰিলোকেন্তো, মমস্সমমুপাগমি.

৪১১. ‘‘উপাগতং মহাৰীরং, সব্বঞ্ঞুং লোকনাযকং;

সব্বোসধেন তপ্পেসিং, পসন্নো সেহি পাণিভি.

৪১২. ‘‘তস্স মে সুকতং কম্মং, সুখেত্তে বীজসম্পদা;

খেপেতুং নেৰ সক্কোমি, তদা হি সুকতং মম.

৪১৩. ‘‘লাভা মম সুলদ্ধং মে, যোহং অদ্দক্খি নাযকং;

তেন কম্মাৰসেসেন, পত্তোম্হি অচলং পদং.

৪১৪. ‘‘সব্বমেতং অভিঞ্ঞায, গোতমো সক্যপুঙ্গৰো;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

৪১৫. ‘‘অপরিমেয্যে ইতো কপ্পে, যং কম্মমকরিং তদা;

দুগ্গতিং নাভিজানামি, ভেসজ্জস্স ইদং ফলং.

৪১৬. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৪১৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

৪১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বাকুলো [বক্কুলো (সী. স্যা.)] থেরো ইমা গাথাযো অভাসিত্থাতি;

বাকুলত্থেরস্সাপদানং ছট্ঠং.