৭. গিরিমানন্দত্থেরঅপদানং

৪১৯. ‘‘ভরিযা মে কালঙ্কতা, পুত্তো সীৰথিকং গতো;

মাতা পিতা মতা ভাতা, একচিতম্হি [মাতা পিতা চ ভাতা চ, একচিতকম্হি (সী. স্যা.)] ডয্হরে.

৪২০. ‘‘তেন সোকেন সন্তত্তো, কিসো পণ্ডু অহোসহং;

চিত্তক্খেপো চ মে আসি, তেন সোকেন অট্টিতো.

৪২১. ‘‘সোকসল্লপরেতোহং, ৰনন্তমুপসঙ্কমিং;

পৰত্তফলং ভুঞ্জিত্ৰা, রুক্খমূলে ৰসামহং.

৪২২. ‘‘সুমেধো নাম সম্বুদ্ধো, দুক্খস্সন্তকরো জিনো;

মমুদ্ধরিতুকামো সো, আগঞ্ছি মম সন্তিকং.

৪২৩. ‘‘পদসদ্দং সুণিত্ৰান, সুমেধস্স মহেসিনো;

পগ্গহেত্ৰানহং সীসং, উল্লোকেসিং মহামুনিং.

৪২৪. ‘‘উপাগতে মহাৰীরে, পীতি মে উদপজ্জথ;

তদাসিমেকগ্গমনো, দিস্ৰা তং লোকনাযকং.

৪২৫. ‘‘সতিং পটিলভিত্ৰান, পণ্ণমুট্ঠিমদাসহং;

নিসীদি ভগৰা তত্থ, অনুকম্পায চক্খুমা.

৪২৬. ‘‘নিসজ্জ তত্থ ভগৰা, সুমেধো লোকনাযকো;

ধম্মং মে কথযী বুদ্ধো, সোকসল্লৰিনোদনং.

৪২৭. ‘‘‘অনৰ্হিতা ততো আগুং, অননুঞ্ঞাতা ইতো গতা;

যথাগতা তথা গতা, তত্থ কা পরিদেৰনা.

৪২৮. ‘‘‘যথাপি পথিকা সত্তা, ৰস্সমানায ৰুট্ঠিযা;

সভণ্ডা উপগচ্ছন্তি, ৰস্সস্সাপতনায তে.

৪২৯. ‘‘‘ৰস্সে চ তে ওরমিতে, সম্পযন্তি যদিচ্ছকং;

এৰং মাতা পিতা তুয্হং, তত্থ কা পরিদেৰনা.

৪৩০. ‘‘‘আগন্তুকা পাহুনকা, চলিতেরিতকম্পিতা;

এৰং মাতা পিতা তুয্হং, তত্থ কা পরিদেৰনা.

৪৩১. ‘‘‘যথাপি উরগো জিণ্ণং, হিত্ৰা গচ্ছতি সং তচং [সংতনুং (স্যা. ক.)];

এৰং মাতা পিতা তুয্হং, সং তনুং ইধ হীযরে’.

৪৩২. ‘‘বুদ্ধস্স গিরমঞ্ঞায, সোকসল্লং ৰিৰজ্জযিং;

পামোজ্জং জনযিত্ৰান, বুদ্ধসেট্ঠং অৰন্দহং.

৪৩৩. ‘‘ৰন্দিত্ৰান মহানাগং, পূজযিং গিরিমঞ্জরিং [গিরিমঞ্জরিমপূজযিং (সী. স্যা.)];

দিব্বগন্ধং সম্পৰন্তং [দিব্বগন্ধেন সম্পন্নং (সী. স্যা.)], সুমেধং লোকনাযকং.

৪৩৪. ‘‘পূজযিত্ৰান সম্বুদ্ধং, সিরে কত্ৰান অঞ্জলিং;

অনুস্সরং গুণগ্গানি, সন্থৰিং লোকনাযকং.

৪৩৫. ‘‘নিত্তিণ্ণোসি [নিত্তণ্হোসি (সী.), ৰিতিণ্ণোসি (স্যা.)] মহাৰীর, সব্বঞ্ঞু লোকনাযক;

সব্বে সত্তে উদ্ধরসি, ঞাণেন ত্ৰং মহামুনে.

৪৩৬. ‘‘ৰিমতিং দ্ৰেল়্হকং ৰাপি, সঞ্ছিন্দসি মহামুনে;

পটিপাদেসি মে মগ্গং, তৰ ঞাণেন চক্খুম.

৪৩৭. ‘‘অরহা ৰসিপত্তা [সিদ্ধিপত্তা (সী. স্যা.)] চ, ছল়ভিঞ্ঞা মহিদ্ধিকা;

অন্তলিক্খচরা ধীরা, পরিৰারেন্তি তাৰদে.

৪৩৮. ‘‘পটিপন্না চ সেখা চ, ফলট্ঠা সন্তি সাৰকা;

সূরোদযেৰ পদুমা, পুপ্ফন্তি তৰ সাৰকা.

৪৩৯. ‘‘মহাসমুদ্দোৰক্খোভো, অতুলোপি [যথা সমুদ্দো অক্খোভো, অতুলো চ (সী.)] দুরুত্তরো;

এৰং ঞাণেন সম্পন্নো, অপ্পমেয্যোসি চক্খুম.

৪৪০. ‘‘ৰন্দিত্ৰাহং লোকজিনং, চক্খুমন্তং মহাযসং;

পুথু দিসা নমস্সন্তো, পটিকুটিকো অগঞ্ছহং.

৪৪১. ‘‘দেৰলোকা চৰিত্ৰান, সম্পজানো পতিস্সতো;

ওক্কমিং মাতুযা কুচ্ছিং, সন্ধাৰন্তো ভৰাভৰে.

৪৪২. ‘‘অগারা অভিনিক্খম্ম, পব্বজিং অনগারিযং;

আতাপী নিপকো ঝাযী, পটিসল্লানগোচরো.

৪৪৩. ‘‘পধানং পদহিত্ৰান, তোসযিত্ৰা মহামুনিং;

চন্দোৰব্ভঘনা মুত্তো, ৰিচরামি অহং সদা.

৪৪৪. ‘‘ৰিৰেকমনুযুত্তোম্হি, উপসন্তো নিরূপধি;

সব্বাসৰে পরিঞ্ঞায, ৰিহরামি অনাসৰো.

৪৪৫. ‘‘তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪৪৬. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৪৪৭. ‘‘স্ৰাগতং ৰত মে আসি…পে… কতং বুদ্ধস্স সাসনং.

৪৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গিরিমানন্দো থেরো ইমা গাথাযো অভাসিত্থাতি.

গিরিমানন্দত্থেরস্সাপদানং সত্তমং.