৫. পদুমকূটাগারিযত্থেরঅপদানং

৩৫৩. ‘‘পিযদস্সী নাম ভগৰা, সযম্ভূ লোকনাযকো;

ৰিৰেককামো সম্বুদ্ধো, সমাধিকুসলো মুনি.

৩৫৪. ‘‘ৰনসণ্ডং সমোগয্হ, পিযদস্সী মহামুনি;

পংসুকূলং পত্থরিত্ৰা, নিসীদি পুরিসুত্তমো.

৩৫৫. ‘‘মিগলুদ্দো পুরে আসিং, অরঞ্ঞে [ৰিপিনে (সী.), ইরিনে (স্যা. ক.)] কাননে অহং;

পসদং মিগমেসন্তো, আহিণ্ডামি অহং তদা.

৩৫৬. ‘‘তত্থদ্দসাসিং সম্বুদ্ধং, ওঘতিণ্ণমনাসৰং;

পুপ্ফিতং সালরাজংৰ, সতরংসিংৰ উগ্গতং.

৩৫৭. ‘‘দিস্ৰানহং দেৰদেৰং, পিযদস্সিং মহাযসং;

জাতস্সরং সমোগয্হ, পদুমং আহরিং তদা.

৩৫৮. ‘‘আহরিত্ৰান পদুমং, সতপত্তং মনোরমং;

কূটাগারং করিত্ৰান, ছাদযিং পদুমেনহং.

৩৫৯. ‘‘অনুকম্পকো কারুণিকো, পিযদস্সী মহামুনি;

সত্তরত্তিন্দিৰং বুদ্ধো, কূটাগারে ৰসী জিনো.

৩৬০. ‘‘পুরাণং ছড্ডযিত্ৰান, নৰেন ছাদযিং অহং;

অঞ্জলিং পগ্গহেত্ৰান, অট্ঠাসিং তাৰদে অহং.

৩৬১. ‘‘ৰুট্ঠহিত্ৰা সমাধিম্হা, পিযদস্সী মহামুনি;

দিসং অনুৰিলোকেন্তো, নিসীদি লোকনাযকো.

৩৬২. ‘‘তদা সুদস্সনো নাম, উপট্ঠাকো মহিদ্ধিকো;

চিত্তমঞ্ঞায বুদ্ধস্স, পিযদস্সিস্স সত্থুনো.

৩৬৩. ‘‘অসীতিযা সহস্সেহি, ভিক্খূহি পরিৰারিতো;

ৰনন্তে সুখমাসীনং, উপেসি লোকনাযকং.

৩৬৪. ‘‘যাৰতা ৰনসণ্ডম্হি, অধিৰত্থা চ দেৰতা;

বুদ্ধস্স চিত্তমঞ্ঞায, সব্বে সন্নিপতুং তদা.

৩৬৫. ‘‘সমাগতেসু যক্খেসু, কুম্ভণ্ডে সহরক্খসে;

ভিক্খুসঙ্ঘে চ সম্পত্তে, গাথা পব্যাহরী [সব্যাহরী (স্যা.), মাব্যাহরী (সী.)] জিনো.

৩৬৬. ‘‘‘যো মং সত্তাহং পূজেসি, আৰাসঞ্চ অকাসি মে;

তমহং কিত্তযিস্সামি, সুণাথ মম ভাসতো.

৩৬৭. ‘‘‘সুদুদ্দসং সুনিপুণং, গম্ভীরং সুপ্পকাসিতং;

ঞাণেন কিত্তযিস্সামি, সুণাথ মম ভাসতো.

৩৬৮. ‘‘‘চতুদ্দসানি কপ্পানি, দেৰরজ্জং করিস্সতি;

কূটাগারং মহন্তস্স [ব্রহং তস্স (সী. স্যা.)], পদ্মপুপ্ফেহি ছাদিতং.

৩৬৯. ‘‘‘আকাসে ধারযিস্সতি, পুপ্ফকম্মস্সিদং [পুব্বকম্মস্সিদং (স্যা.)] ফলং;

চতুব্বীসে [চতুদ্দসে (স্যা.)] কপ্পসতে, ৰোকিণ্ণং সংসরিস্সতি.

৩৭০. ‘‘‘তত্থ পুপ্ফমযং ব্যম্হং, আকাসে ধারযিস্সতি;

যথা পদুমপত্তম্হি, তোযং ন উপলিম্পতি.

৩৭১. ‘‘‘তথেৰীমস্স ঞাণম্হি, কিলেসা নোপলিম্পরে;

মনসা ৰিনিৰট্টেত্ৰা, পঞ্চ নীৰরণে অযং.

৩৭২. ‘‘‘চিত্তং জনেত্ৰা নেক্খম্মে, অগারা পব্বজিস্সতি;

ততো পুপ্ফমযে ব্যম্হে, ধারেন্তে [পুপ্ফমযং ব্যম্হং, ধারেন্তং (স্যা. ক.)] নিক্খমিস্সতি.

৩৭৩. ‘‘‘রুক্খমূলে ৰসন্তস্স, নিপকস্স সতীমতো;

তত্থ পুপ্ফমযং ব্যম্হং, মত্থকে ধারযিস্সতি.

৩৭৪. ‘‘‘চীৰরং পিণ্ডপাতঞ্চ, পচ্চযং সযনাসনং;

দত্ৰান ভিক্খুসঙ্ঘস্স, নিব্বাযিস্সতিনাসৰো’.

৩৭৫. ‘‘কূটাগারেন চরতা [চরণা (সী. পী. ক.), চরিতে (স্যা.)], পব্বজ্জং অভিনিক্খমিং;

রুক্খমূলে ৰসন্তম্পি [ৰসন্তম্হি (সী.), ৰসতোপি (?)], কূটাগারং ধরীযতি.

৩৭৬. ‘‘চীৰরে পিণ্ডপাতে চ, চেতনা মে ন ৰিজ্জতি;

পুঞ্ঞকম্মেন সংযুত্তো, লভামি পরিনিট্ঠিতং.

৩৭৭. ‘‘গণনাতো অসঙ্খেয্যা, কপ্পকোটী বহূ মম;

রিত্তকা তে অতিক্কন্তা, পমুত্তা লোকনাযকা.

৩৭৮. ‘‘অট্ঠারসে কপ্পসতে, পিযদস্সী ৰিনাযকো;

তমহং পযিরুপাসিত্ৰা, ইমং যোনিং উপাগতো.

৩৭৯. ‘‘ইধ পস্সামি [ইধদ্দসাসিং (সী.)] সম্বুদ্ধং, অনোমং নাম চক্খুমং;

তমহং উপগন্ত্ৰান, পব্বজিং অনগারিযং.

৩৮০. ‘‘দুক্খস্সন্তকরো বুদ্ধো, মগ্গং মে দেসযী জিনো;

তস্স ধম্মং সুণিত্ৰান, পত্তোম্হি অচলং পদং.

৩৮১. ‘‘তোসযিত্ৰান সম্বুদ্ধং, গোতমং সক্যপুঙ্গৰং;

সব্বাসৰে পরিঞ্ঞায, ৰিহরামি অনাসৰো.

৩৮২. ‘‘অট্ঠারসে কপ্পসতে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩৮৩. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৩৮৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩৮৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদুমকূটাগারিযো থেরো ইমা গাথাযো অভাসিত্থাতি.

পদুমকূটাগারিযত্থেরস্সাপদানং পঞ্চমং.