৪. মধুদাযকত্থেরঅপদানং

৩৩৩. ‘‘সিন্ধুযা নদিযা তীরে, সুকতো অস্সমো মম;

তত্থ ৰাচেমহং সিস্সে, ইতিহাসং সলক্খণং.

৩৩৪. ‘‘ধম্মকামা ৰিনীতা তে, সোতুকামা সুসাসনং;

ছল়ঙ্গে পারমিপ্পত্তা, সিন্ধুকূলে ৰসন্তি তে.

৩৩৫. ‘‘উপ্পাতগমনে চেৰ, লক্খণেসু চ কোৰিদা;

উত্তমত্থং গৰেসন্তা, ৰসন্তি ৰিপিনে তদা.

৩৩৬. ‘‘সুমেধো নাম সম্বুদ্ধো, লোকে উপ্পজ্জি তাৰদে;

অম্হাকং অনুকম্পন্তো, উপাগচ্ছি ৰিনাযকো.

৩৩৭. ‘‘উপাগতং মহাৰীরং, সুমেধং লোকনাযকং;

তিণসন্থারকং কত্ৰা, লোকজেট্ঠস্সদাসহং.

৩৩৮. ‘‘ৰিপিনাতো মধুং গয্হ, বুদ্ধসেট্ঠস্সদাসহং;

সম্বুদ্ধো পরিভুঞ্জিত্ৰা, ইদং ৰচনমব্রৰি.

৩৩৯. ‘‘‘যো তং অদাসি মধুং মে, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

৩৪০. ‘‘‘ইমিনা মধুদানেন, তিণসন্থারকেন চ;

তিংস কপ্পসহস্সানি, দেৰলোকে রমিস্সতি.

৩৪১. ‘‘‘তিংস কপ্পসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৩৪২. ‘‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

৩৪৩. ‘‘‘দেৰলোকা ইধাগন্ত্ৰা, মাতুকুচ্ছিং উপাগতে;

মধুৰস্সং পৰস্সিত্থ, ছাদযং মধুনা মহিং’.

৩৪৪. ‘‘মযি নিক্খন্তমত্তম্হি, কুচ্ছিযা চ সুদুত্তরা;

তত্রাপি মধুৰস্সং মে, ৰস্সতে নিচ্চকালিকং.

৩৪৫. ‘‘অগারা অভিনিক্খম্ম, পব্বজিং অনগারিযং;

লাভী অন্নস্স পানস্স, মধুদানস্সিদং ফলং.

৩৪৬. ‘‘সব্বকামসমিদ্ধোহং, ভৰিত্ৰা দেৰমানুসে;

তেনেৰ মধুদানেন, পত্তোম্হি আসৰক্খযং.

৩৪৭. ‘‘ৰুট্ঠম্হি দেৰে চতুরঙ্গুলে তিণে, সম্পুপ্ফিতে [সুপুপ্ফিতে (স্যা.)] ধরণীরুহে সঞ্ছন্নে [ৰপ্পদেসে (স্যা.)];

সুঞ্ঞে ঘরে মণ্ডপরুক্খমূলকে, ৰসামি নিচ্চং সুখিতো অনাসৰো.

৩৪৮. ‘‘মজ্ঝে মহন্তে হীনে চ [মজ্ঝে ময্হং ভৰা অস্সু (স্যা. পী. ক.)], ভৰে সব্বে অতিক্কমিং [যে ভৰে সমতিক্কমিং (স্যা. ক.), যো ভৰেসু পকিত্তযি (ক.)];

অজ্জ মে আসৰা খীণা, নত্থি দানি পুনব্ভৰো.

৩৪৯. ‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, মধুদানস্সিদং ফলং.

৩৫০. ‘‘কিলেসা ঝাপিতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

৩৫১. ‘‘স্ৰাগতং ৰত মে আসি…পে… কতং বুদ্ধস্স সাসনং.

৩৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মধুদাযকো থেরো ইমা গাথাযো অভাসিত্থাতি.

মধুদাযকত্থেরস্সাপদানং চতুত্থং.