১. পিলিন্দৰচ্ছত্থেরঅপদানং

১. ‘‘নগরে হংসৰতিযা, আসিং দোৰারিকো অহং;

অক্খোভং অমিতং ভোগং, ঘরে সন্নিচিতং মম.

২. ‘‘রহোগতো নিসীদিত্ৰা, পহংসিত্ৰান মানসং [সম্পহংসিত্ৰ মানসং (সী.)];

নিসজ্জ পাসাদৰরে, এৰং চিন্তেসহং তদা.

(চিন্তনাকারো)

৩. ‘‘‘বহূ মেধিগতা ভোগা, ফীতং অন্তেপুরং মম;

রাজাপি [রাজিসি (ক.)] সন্নিমন্তেসি, আনন্দো পথৰিস্সরো.

৪. ‘‘‘অযঞ্চ বুদ্ধো উপ্পন্নো, অধিচ্চুপ্পত্তিকো মুনি;

সংৰিজ্জন্তি চ মে ভোগা, দানং দস্সামি সত্থুনো.

৫. ‘‘‘পদুমেন রাজপুত্তেন, দিন্নং দানৰরং জিনে;

হত্থিনাগে চ পল্লঙ্কে, অপস্সেনঞ্চনপ্পকং.

৬. ‘‘‘অহম্পি দানং দস্সামি, সঙ্ঘে গণৰরুত্তমে;

অদিন্নপুব্বমঞ্ঞেসং, ভৰিস্সং আদিকম্মিকো.

৭. ‘‘‘চিন্তেত্ৰাহং বহুৰিধং, যাগে যস্স সুখংফলং;

পরিক্খারদানমদ্দক্খিং, মম সঙ্কপ্পপূরণং.

৮. ‘‘‘পরিক্খারানি দস্সামি, সঙ্ঘে গণৰরুত্তমে;

অদিন্নপুব্বমঞ্ঞেসং, ভৰিস্সং আদিকম্মিকো’.

(দানৰত্থুসম্পাদনং)

৯. ‘‘নল়কারে উপাগম্ম, ছত্তং কারেসি তাৰদে;

ছত্তসতসহস্সানি, একতো সন্নিপাতযিং.

১০. ‘‘দুস্সসতসহস্সানি, একতো সন্নিপাতযিং;

পত্তসতসহস্সানি, একতো সন্নিপাতযিং.

১১. ‘‘ৰাসিযো সত্থকে চাপি, সূচিযো নখছেদনে;

হেট্ঠাছত্তে ঠপাপেসিং, কারেত্ৰা তদনুচ্ছৰে.

১২. ‘‘ৰিধূপনে তালৰণ্টে, মোরহত্থে চ চামরে;

পরিস্সাৰনে তেলধারে [তেলধরে (সী.)], কারযিং তদনুচ্ছৰে.

১৩. ‘‘সূচিঘরে অংসবদ্ধে, অথোপি কাযবন্ধনে;

আধারকে চ সুকতে, কারযিং তদনুচ্ছৰে.

১৪. ‘‘পরিভোগভাজনে চ, অথোপি লোহথালকে;

ভেসজ্জে পূরযিত্ৰান, হেট্ঠাছত্তে ঠপেসহং.

১৫. ‘‘ৰচং উসীরং লট্ঠিমধুং, পিপ্ফলী মরিচানি চ;

হরীতকিং সিঙ্গীৰেরং, সব্বং পূরেসি ভাজনে.

১৬. ‘‘উপাহনা পাদুকাযো, অথো উদকপুঞ্ছনে;

কত্তরদণ্ডে সুকতে, কারযিং তদনুচ্ছৰে.

১৭. ‘‘ওসধঞ্জননাল়ী চ [ওসধং অঞ্জনাপিচ (স্যা.)], সলাকা ধম্মকুত্তরা;

কুঞ্চিকা পঞ্চৰণ্ণেহি, সিব্বিতে কুঞ্চিকাঘরে.

১৮. ‘‘আযোগে ধূমনেত্তে চ, অথোপি দীপধারকে;

তুম্বকে চ করণ্ডে চ, কারযিং তদনুচ্ছৰে.

১৯. ‘‘সণ্ডাসে পিপ্ফলে চেৰ, অথোপি মলহারকে;

ভেসজ্জথৰিকে চেৰ, কারযিং তদনুচ্ছৰে.

২০. ‘‘আসন্দিযো পীঠকে চ, পল্লঙ্কে চতুরোমযে;

তদনুচ্ছৰে কারযিত্ৰা, হেট্ঠাছত্তে ঠপেসহং.

২১. ‘‘উণ্ণাভিসী তূলভিসী, অথোপি পীঠিকাভিসী [পীঠকাভিসী (স্যা. ক.)];

বিম্বোহনে [বিব্বোহনে (স্যা. ক.)] চ সুকতে, কারযিং তদনুচ্ছৰে.

২২. ‘‘কুরুৰিন্দে মধুসিত্থে, তেলং হত্থপ্পতাপকং;

সিপাটিফলকে সুচী, মঞ্চং অত্থরণেন চ.

২৩. ‘‘সেনাসনে পাদপুঞ্ছে, সযনাসনদণ্ডকে;

দন্তপোণে চ আটলী [কথলিং (স্যা.)], সীসালেপনগন্ধকে.

২৪. ‘‘অরণী ফলপীঠে [পলালপীঠে (সী.)] চ, পত্তপিধানথালকে;

উদকস্স কটচ্ছূ চ, চুণ্ণকং রজনম্বণং [রজনম্মণং (সী.)].

২৫. ‘‘সম্মজ্জনং [সম্মুঞ্জনং (স্যা.), সম্মজ্জনিং, সম্মুঞ্জনিং (?)] উদপত্তং, তথা ৰস্সিকসাটিকং;

নিসীদনং কণ্ডুচ্ছাদি, অথ অন্তরৰাসকং.

২৬. ‘‘উত্তরাসঙ্গসঙ্ঘাটী, নত্থুকং মুখসোধনং;

বিল়ঙ্গলোণং পহূতঞ্চ [লোণভূতঞ্চ (ক.)], মধুঞ্চ দধিপানকং.

২৭. ‘‘ধূপং [ধূমং (ক.)] সিত্থং পিলোতিঞ্চ, মুখপুঞ্ছনসুত্তকং;

দাতব্বং নাম যং অত্থি, যঞ্চ কপ্পতি সত্থুনো.

২৮. ‘‘সব্বমেতং সমানেত্ৰা, আনন্দং উপসঙ্কমিং;

উপসঙ্কম্ম রাজানং, জনেতারং মহেসিনো [মহেসিনং (সী.), মহাযসং (স্যা.), মহিস্সরং (ক.)];

সিরসা অভিৰাদেত্ৰা, ইদং ৰচনমব্রৰিং.

(দানোকাসযাচনা)

২৯. ‘‘‘একতো জাতসংৰদ্ধা, উভিন্নং একতো মনং [যসো (স্যা.), মনো (?)];

সাধারণা সুখদুক্খে, উভো চ অনুৰত্তকা.

৩০. ‘‘‘অত্থি চেতসিকং দুক্খং, তৰাধেয্যং অরিন্দম;

যদি সক্কোসি তং দুক্খং, ৰিনোদেয্যাসি খত্তিয.

৩১. ‘‘‘তৰ দুক্খং মম দুক্খং, উভিন্নং একতো মনো [মনং (সী. স্যা.)];

নিট্ঠিতন্তি ৰিজানাহি, মমাধেয্যং সচে তুৰং.

৩২. ‘‘‘জানাহি খো মহারাজ, দুক্খং মে দুব্বিনোদযং;

পহু সমানো গজ্জসু, একং তে দুচ্চজং ৰরং.

৩৩. ‘‘‘যাৰতা ৰিজিতে অত্থি, যাৰতা মম জীৰিতং;

এতেহি যদি তে অত্থো, দস্সামি অৰিকম্পিতো.

৩৪. ‘‘‘গজ্জিতং খো তযা দেৰ, মিচ্ছা তং বহু গজ্জিতং;

জানিস্সামি তুৰং অজ্জ, সব্বধম্মে [সচ্চধম্মে (?)] পতিট্ঠিতং.

৩৫. ‘‘‘অতিবাল়্হং নিপীল়েসি, দদমানস্স মে সতো;

কিং তে মে পীল়িতেনত্থো, পত্থিতং তে কথেহি মে.

৩৬. ‘‘‘ইচ্ছামহং মহারাজ, বুদ্ধসেট্ঠং অনুত্তরং;

ভোজযিস্সামি সম্বুদ্ধং, ৰজ্জং [ৰঞ্চুং (?)] মে মাহু জীৰিতং.

৩৭. ‘‘‘অঞ্ঞং তেহং ৰরং দম্মি, মা যাচিত্থো তথাগতং [অযাচিতো তথাগতো (স্যা. ক.)];

অদেয্যো কস্সচি বুদ্ধো, মণি জোতিরসো যথা.

৩৮. ‘‘‘ননু তে গজ্জিতং দেৰ, যাৰ জীৰিতমত্তনো [ৰিজিতমত্থিতং (ক.), জীৰিতমত্থিকং (স্যা.)];

জীৰিতং [ৰিজিতং (ক.)] দদমানেন, যুত্তং দাতুং তথাগতং.

৩৯. ‘‘‘ঠপনীযো মহাৰীরো, অদেয্যো কস্সচি জিনো;

ন মে পটিস্সুতো বুদ্ধো, ৰরস্সু অমিতং ধনং.

৪০. ‘‘‘ৰিনিচ্ছযং পাপুণাম, পুচ্ছিস্সাম ৰিনিচ্ছযে;

যথাসণ্ঠং [যথাসন্তং (সী.)] কথেস্সন্তি, পটিপুচ্ছাম তং তথা.

৪১. ‘‘‘রঞ্ঞো হত্থে গহেত্ৰান, অগমাসিং ৰিনিচ্ছযং;

পুরতো অক্খদস্সানং, ইদং ৰচনমব্রৰিং.

৪২. ‘‘‘সুণন্তু মে অক্খদস্সা, রাজা ৰরমদাসি মে;

ন কিঞ্চি ঠপযিত্ৰান, জীৰিতম্পি [ৰিজিতংপি (ক.)] পৰারযি.

৪৩. ‘‘‘তস্স মে ৰরদিন্নস্স, বুদ্ধসেট্ঠং ৰরিং অহং;

সুদিন্নো হোতি মে বুদ্ধো, ছিন্দথ সংসযং মম.

৪৪. ‘‘‘সোস্সাম তৰ ৰচনং, ভূমিপালস্স রাজিনো;

উভিন্নং ৰচনং সুত্ৰা, ছিন্দিস্সামেত্থ সংসযং.

৪৫. ‘‘‘সব্বং দেৰ তযা দিন্নং, ইমস্স সব্বগাহিকং [সব্বগাহিতং (স্যা. ক.)];

ন কিঞ্চি ঠপযিত্ৰান, জীৰিতম্পি পৰারযি.

৪৬. ‘‘‘কিচ্ছপ্পত্তোৰ হুত্ৰান, যাচী ৰরমনুত্তরং [যাৰজীৰমনুত্তরং (স্যা. ক.)];

ইমং সুদুক্খিতং ঞত্ৰা, অদাসিং সব্বগাহিকং.

৪৭. ‘‘‘পরাজযো তুৰং [তৰং (সী.)] দেৰ, অস্স দেয্যো তথাগতো;

উভিন্নং সংসযো ছিন্নো, যথাসণ্ঠম্হি [যথাসন্তম্হি (সী.)] তিট্ঠথ.

৪৮. ‘‘‘রাজা তত্থেৰ ঠত্ৰান, অক্খদস্সেতদব্রৰি;

সম্মা ময্হম্পি দেয্যাথ, পুন বুদ্ধং লভামহং.

৪৯. ‘‘‘পূরেত্ৰা তৰ সঙ্কপ্পং, ভোজযিত্ৰা তথাগতং;

পুন দেয্যাসি [দেয্যাথ (ক.)] সম্বুদ্ধং, আনন্দস্স যসস্সিনো’.

(নিমন্তনকথা)

৫০. ‘‘অক্খদস্সেভিৰাদেত্ৰা, আনন্দঞ্চাপি খত্তিযং;

তুট্ঠো পমুদিতো হুত্ৰা, সম্বুদ্ধমুপসঙ্কমিং.

৫১. ‘‘উপসঙ্কম্ম সম্বুদ্ধং, ওঘতিণ্ণমনাসৰং;

সিরসা অভিৰাদেত্ৰা, ইদং ৰচনমব্রৰিং.

৫২. ‘ৰসীসতসহস্সেহি, অধিৰাসেহি চক্খুম;

হাসযন্তো মম চিত্তং, নিৰেসনমুপেহি মে’.

৫৩. ‘‘পদুমুত্তরো লোকৰিদূ, আহুতীনং পটিগ্গহো;

মম সঙ্কপ্পমঞ্ঞায, অধিৰাসেসি চক্খুমা.

৫৪. ‘‘অধিৰাসনমঞ্ঞায, অভিৰাদিয সত্থুনো;

হট্ঠো উদগ্গচিত্তোহং, নিৰেসনমুপাগমিং.

(দানপটিযাদনং)

৫৫. ‘‘মিত্তামচ্চে সমানেত্ৰা, ইদং ৰচনমব্রৰিং;

‘সুদুল্লভো মযা লদ্ধো, মণি জোতিরসো যথা.

৫৬. ‘‘‘কেন তং পূজযিস্সাম, অপ্পমেয্যো অনূপমো;

অতুলো অসমো ধীরো, জিনো অপ্পটিপুগ্গলো.

৫৭. ‘‘‘তথাসমসমো চেৰ, অদুতিযো নরাসভো;

দুক্করং অধিকারঞ্হি, বুদ্ধানুচ্ছৰিকং মযা.

৫৮. ‘‘‘নানাপুপ্ফে সমানেত্ৰা, করোম পুপ্ফমণ্ডপং;

বুদ্ধানুচ্ছৰিকং এতং, সব্বপূজা ভৰিস্সতি’.

৫৯. ‘‘উপ্পলং পদুমং ৰাপি, ৰস্সিকং অধিমুত্তকং [অতিমুত্তকং (?)];

চম্পকং [চন্দনং (ক.)] নাগপুপ্ফঞ্চ, মণ্ডপং কারযিং অহং.

৬০. ‘‘সতাসনসহস্সানি, ছত্তচ্ছাযায পঞ্ঞপিং;

পচ্ছিমং আসনং ময্হং, অধিকং সতমগ্ঘতি.

৬১. ‘‘সতাসনসহস্সানি, ছত্তচ্ছাযায পঞ্ঞপিং;

পটিযাদেত্ৰা অন্নপানং, কালং আরোচযিং অহং.

৬২. ‘‘আরোচিতম্হি কালম্হি, পদুমুত্তরো মহামুনি;

ৰসীসতসহস্সেহি, নিৰেসনমুপেসি মে.

৬৩. ‘‘ধারেন্তং উপরিচ্ছত্তং [ধারেন্তমুপরিচ্ছত্তে (সী.)], সুফুল্লপুপ্ফমণ্ডপে;

ৰসীসতসহস্সেহি, নিসীদি পুরিসুত্তমো.

৬৪. ‘‘‘ছত্তসতসহস্সানি, সতসহস্সমাসনং;

কপ্পিযং অনৰজ্জঞ্চ, পটিগণ্হাহি চক্খুম’.

৬৫. ‘‘পদুমুত্তরো লোকৰিদূ, আহুতীনং পটিগ্গহো;

মমং তারেতুকামো সো, সম্পটিচ্ছি মহামুনি.

(দানকথা)

৬৬. ‘‘ভিক্খুনো একমেকস্স, পচ্চেকং পত্তমদাসহং;

জহিংসু সুম্ভকং [পুব্বকং (সী.), সম্ভতং (স্যা.), মত্তিকং (?)] পত্তং, লোহপত্তং অধারযুং.

৬৭. ‘‘সত্তরত্তিন্দিৰং বুদ্ধো, নিসীদি পুপ্ফমণ্ডপে;

বোধযন্তো বহূ সত্তে, ধম্মচক্কং পৰত্তযি.

৬৮. ‘‘ধম্মচক্কং পৰত্তেন্তো, হেট্ঠতো পুপ্ফমণ্ডপে;

চুল্লাসীতিসহস্সানং, ধম্মাভিসমযো অহু.

৬৯. ‘‘সত্তমে দিৰসে পত্তে, পদুমুত্তরো মহামুনি;

ছত্তচ্ছাযাযমাসীনো, ইমা গাথা অভাসথ.

(ব্যাকরণং)

৭০. ‘‘‘অনূনকং দানৰরং, যো মে পাদাসি মাণৰো;

তমহং কিত্তযিস্সামি, সুণাথ মম ভাসতো.

৭১. ‘‘‘হত্থী অস্সা রথা পত্তী, সেনা চ চতুরঙ্গিনী;