২. সেলত্থেরঅপদানং

২০৮. ‘‘নগরে হংসৰতিযা, ৰীথিসামী অহোসহং;

মম ঞাতী সমানেত্ৰা, ইদং ৰচনমব্রৰিং.

২০৯. ‘‘‘বুদ্ধো লোকে সমুপ্পন্নো, পুঞ্ঞক্খেত্তো অনুত্তরো [পুঞ্ঞক্খেত্তং অনুত্তরং (সী.)];

আসি সো [আসীসো (সী.), আধারো (পী.)] সব্বলোকস্স, আহুতীনং পটিগ্গহো.

২১০. ‘‘‘খত্তিযা নেগমা চেৰ, মহাসালা চ ব্রাহ্মণা;

পসন্নচিত্তা সুমনা, পূগধম্মং অকংসু তে.

২১১. ‘‘‘হত্থারোহা অনীকট্ঠা, রথিকা পত্তিকারকা;

পসন্নচিত্তা সুমনা, পূগধম্মং অকংসু তে.

২১২. ‘‘‘উগ্গা চ রাজপুত্তা চ, ৰেসিযানা চ ব্রাহ্মণা;

পসন্নচিত্তা সুমনা, পূগধম্মং অকংসু তে.

২১৩. ‘‘‘আল়ারিকা কপ্পকা [আল়ারিকা চ সূদা (স্যা.)] চ, ন্হাপকা মালকারকা;

পসন্নচিত্তা সুমনা, পূগধম্মং অকংসু তে.

২১৪. ‘‘‘রজকা পেসকারা চ, চম্মকারা চ ন্হাপিতা;

পসন্নচিত্তা সুমনা, পূগধম্মং অকংসু তে.

২১৫. ‘‘‘উসুকারা ভমকারা, চম্মকারা চ তচ্ছকা;

পসন্নচিত্তা সুমনা, পূগধম্মং অকংসু তে.

২১৬. ‘‘‘কম্মারা সোণ্ণকারা চ, তিপুলোহকরা তথা;

পসন্নচিত্তা সুমনা, পূগধম্মং অকংসু তে.

২১৭. ‘‘‘ভতকা চেটকা চেৰ, দাসকম্মকরা বহূ;

যথাসকেন থামেন, পূগধম্মং অকংসু তে.

২১৮. ‘‘‘উদহারা কট্ঠহারা, কস্সকা তিণহারকা;

যথাসকেন থামেন, পূগধম্মং অকংসু তে.

২১৯. ‘‘‘পুপ্ফিকা মালিকা চেৰ, পণ্ণিকা ফলহারকা;

যথাসকেন থামেন, পূগধম্মং অকংসু তে.

২২০. ‘‘‘গণিকা কুম্ভদাসী চ, পূৰিকা [সূপিকা (ক.)] মচ্ছিকাপি চ;

যথাসকেন থামেন, পূগধম্মং অকংসু তে.

২২১. ‘‘‘এথ সব্বে সমাগন্ত্ৰা, গণং বন্ধাম একতো;

অধিকারং করিস্সাম, পুঞ্ঞক্খেত্তে অনুত্তরে’.

২২২. ‘‘তে মে সুত্ৰান ৰচনং, গণং বন্ধিংসু তাৰদে;

উপট্ঠানসালং সুকতং, ভিক্খুসঙ্ঘস্স কারযুং.

২২৩. ‘‘নিট্ঠাপেত্ৰান তং সালং, উদগ্গো তুট্ঠমানসো;

পরেতো তেহি সব্বেহি, সম্বুদ্ধমুপসঙ্কমিং.

২২৪. ‘‘উপসঙ্কম্ম সম্বুদ্ধং, লোকনাথং নরাসভং;

ৰন্দিত্ৰা সত্থুনো পাদে, ইদং ৰচনমব্রৰিং.

২২৫. ‘‘‘ইমে তীণি সতা ৰীর, পুরিসা একতো গণা;

উপট্ঠানসালং সুকতং, নিয্যাদেন্তি [নিয্যাতেন্তি (সী.)] তুৰং [তৰং (সী.), তৰ (স্যা.)] মুনি’.

২২৬. ‘‘ভিক্খুসঙ্ঘস্স পুরতো, সম্পটিচ্ছত্ৰ চক্খুমা;

তিণ্ণং সতানং পুরতো, ইমা গাথা অভাসথ.

২২৭. ‘‘‘তিসতাপি চ জেট্ঠো চ, অনুৰত্তিংসু একতো;

সম্পত্তিঞ্হি [সম্পত্তীহি (স্যা. ক.)] করিত্ৰান, সব্বে অনুভৰিস্সথ.

২২৮. ‘‘‘পচ্ছিমে ভৰে সম্পত্তে, সীতিভাৰমনুত্তরং;

অজরং অমতং সন্তং, নিব্বানং ফস্সযিস্সথ’.

২২৯. ‘‘এৰং বুদ্ধো ৰিযাকাসি, সব্বঞ্ঞূ সমণুত্তরো;

বুদ্ধস্স ৰচনং সুত্ৰা, সোমনস্সং পৰেদযিং.

২৩০. ‘‘তিংস কপ্পসহস্সানি, দেৰলোকে রমিং অহং;

দেৰাধিপো পঞ্চসতং, দেৰরজ্জমকারযিং.

২৩১. ‘‘সহস্সক্খত্তুং রাজা চ, চক্কৰত্তী অহোসহং;

দেৰরজ্জং করোন্তস্স, মহাদেৰা অৰন্দিসুং.

২৩২. ‘‘ইধ মানুসকে রজ্জং [রজ্জে (সী.)], পরিসা হোন্তি বন্ধৰা;

পচ্ছিমে ভৰে সম্পত্তে, ৰাসেট্ঠো নাম ব্রাহ্মণো.

২৩৩. ‘‘অসীতিকোটি নিচযো, তস্স পুত্তো অহোসহং;

সেলো ইতি মম নামং, ছল়ঙ্গে পারমিং গতো.

২৩৪. ‘‘জঙ্ঘাৰিহারং ৰিচরং, সসিস্সেহি পুরক্খতো;

জটাভারিকভরিতং, কেণিযং নাম তাপসং.

২৩৫. ‘‘পটিযত্তাহুতিং দিস্ৰা, ইদং ৰচনমব্রৰিং;

‘আৰাহো ৰা ৰিৰাহো ৰা, রাজা ৰা তে নিমন্তিতো’.

২৩৬. ‘‘আহুতিং [নাহুতিং (?)] যিট্ঠুকামোহং, ব্রাহ্মণে দেৰসম্মতে;

ন নিমন্তেমি রাজানং, আহুতী মে ন ৰিজ্জতি.

২৩৭. ‘‘ন চত্থি ময্হমাৰাহো, ৰিৰাহো মে ন ৰিজ্জতি;

সক্যানং নন্দিজননো, সেট্ঠো লোকে সদেৰকে.

২৩৮. ‘‘সব্বলোকহিতত্থায, সব্বসত্তসুখাৰহো;

সো মে নিমন্তিতো অজ্জ, তস্সেতং পটিযাদনং.

২৩৯. ‘‘তিম্বরূসকৰণ্ণাভো, অপ্পমেয্যো অনূপমো;

রূপেনাসদিসো বুদ্ধো, স্ৰাতনায নিমন্তিতো.

২৪০. ‘‘উক্কামুখপহট্ঠোৰ, খদিরঙ্গারসন্নিভো;

ৰিজ্জূপমো মহাৰীরো, সো মে বুদ্ধো নিমন্তিতো.

২৪১. ‘‘পব্বতগ্গে যথা অচ্চি, পুণ্ণমাযেৰ চন্দিমা;

নল়গ্গিৰণ্ণসঙ্কাসো, সো মে বুদ্ধো নিমন্তিতো.

২৪২. ‘‘অসম্ভীতো ভযাতীতো, ভৰন্তকরণো মুনি;

সীহূপমো মহাৰীরো, সো মে বুদ্ধো নিমন্তিতো.

২৪৩. ‘‘কুসলো বুদ্ধধম্মেহি, অপসয্হো পরেহি সো;

নাগূপমো মহাৰীরো, সো মে বুদ্ধো নিমন্তিতো.

২৪৪. ‘‘সদ্ধম্মাচারকুসলো, বুদ্ধনাগো অসাদিসো;

উসভূপমো মহাৰীরো, সো মে বুদ্ধো নিমন্তিতো.

২৪৫. ‘‘অনন্তৰণ্ণো অমিতযসো, ৰিচিত্তসব্বলক্খণো;

সক্কূপমো মহাৰীরো, সো মে বুদ্ধো নিমন্তিতো.

২৪৬. ‘‘ৰসী গণী পতাপী চ, তেজস্সী চ দুরাসদো;

ব্রহ্মূপমো মহাৰীরো, সো মে বুদ্ধো নিমন্তিতো.

২৪৭. ‘‘পত্তধম্মো দসবলো, বলাতিবলপারগো;

ধরণূপমো মহাৰীরো, সো মে বুদ্ধো নিমন্তিতো.

২৪৮. ‘‘সীলৰীচিসমাকিণ্ণো, ধম্মৰিঞ্ঞাণখোভিতো;

উদধূপমো মহাৰীরো, সো মে বুদ্ধো নিমন্তিতো.

২৪৯. ‘‘দুরাসদো দুপ্পসহো, অচলো উগ্গতো ব্রহা;

নেরূপমো মহাৰীরো, সো মে বুদ্ধো নিমন্তিতো.

২৫০. ‘‘অনন্তঞাণো অসমসমো, অতুলো অগ্গতং গতো;

গগনূপমো মহাৰীরো, সো মে বুদ্ধো নিমন্তিতো.

পন্নরসমং ভাণৰারং.

২৫১. ‘‘পতিট্ঠা ভযভীতানং, তাণো সরণগামিনং;

অস্সাসকো মহাৰীরো, সো মে বুদ্ধো নিমন্তিতো.

২৫২. ‘‘আসযো বুদ্ধিমন্তানং, পুঞ্ঞক্খেত্তং সুখেসিনং;

রতনাকরো মহাৰীরো, সো মে বুদ্ধো নিমন্তিতো.

২৫৩. ‘‘অস্সাসকো ৰেদকরো, সামঞ্ঞফলদাযকো;

মেঘূপমো মহাৰীরো, সো মে বুদ্ধো নিমন্তিতো.

২৫৪. ‘‘লোকচক্খু মহাতেজো, সব্বতমৰিনোদনো;

সূরিযূপমো মহাৰীরো, সো মে বুদ্ধো নিমন্তিতো.

২৫৫. ‘‘আরম্মণৰিমুত্তীসু, সভাৰদস্সনো মুনি;

চন্দূপমো মহাৰীরো, সো মে বুদ্ধো নিমন্তিতো.

২৫৬. ‘‘বুদ্ধো সমুস্সিতো লোকে, লক্খণেহি অলঙ্কতো;

অপ্পমেয্যো মহাৰীরো, সো মে বুদ্ধো নিমন্তিতো.

২৫৭. ‘‘যস্স ঞাণং অপ্পমেয্যং, সীলং যস্স অনূপমং;

ৰিমুত্তি অসদিসা যস্স, সো মে বুদ্ধো নিমন্তিতো.

২৫৮. ‘‘যস্স ধীতি অসদিসা, থামো যস্স অচিন্তিযো;

যস্স পরক্কমো জেট্ঠো, সো মে বুদ্ধো নিমন্তিতো.

২৫৯. ‘‘রাগো দোসো চ মোহো চ, ৰিসা সব্বে সমূহতা;

অগদূপমো মহাৰীরো, সো মে বুদ্ধো নিমন্তিতো.

২৬০. ‘‘ক্লেসব্যাধিবহুদুক্খ সব্বতমৰিনোদনো [ৰিনোদকো (সী. স্যা.)];

ৰেজ্জূপমো মহাৰীরো, সো মে বুদ্ধো নিমন্তিতো.

২৬১. ‘‘বুদ্ধোতি ভো যং ৰদেসি, ঘোসোপেসো সুদুল্লভো;

বুদ্ধো বুদ্ধোতি সুত্ৰান, পীতি মে উদপজ্জথ.

২৬২. ‘‘অব্ভন্তরং অগণ্হন্তং, পীতি মে বহি নিচ্ছরে;

সোহং পীতিমনো সন্তো, ইদং ৰচনমব্রৰিং.

২৬৩. ‘‘‘কহং নু খো সো ভগৰা, লোকজেট্ঠো নরাসভো;

তত্থ গন্ত্ৰা নমস্সিস্সং, সামঞ্ঞফলদাযকং’.

২৬৪. ‘‘‘পগ্গয্হ দক্খিণং বাহুং, ৰেদজাতো কতঞ্জলী;

আচিক্খি মে ধম্মরাজং, সোকসল্লৰিনোদনং.

২৬৫. ‘‘‘উদেন্তংৰ মহামেঘং, নীলং অঞ্জনসন্নিভং;

সাগরং ৰিয দিস্সন্তং, পস্সসেতং মহাৰনং.

২৬৬. ‘‘‘এত্থ সো ৰসতে বুদ্ধো, অদন্তদমকো মুনি;

ৰিনযন্তো চ ৰেনেয্যে, বোধেন্তো বোধিপক্খিযে.

২৬৭. ‘‘‘পিপাসিতোৰ উদকং, ভোজনংৰ জিঘচ্ছিতো;

গাৰী যথা ৰচ্ছগিদ্ধা, এৰাহং ৰিচিনিং জিনং.

২৬৮. ‘‘‘আচারউপচারঞ্ঞূ, ধম্মানুচ্ছৰিসংৰরং;

সিক্খাপেমি সকে সিস্সে, গচ্ছন্তে জিনসন্তিকং.

২৬৯. ‘‘‘দুরাসদা ভগৰন্তো, সীহাৰ একচারিনো;

পদে পদং নিক্খিপন্তা, আগচ্ছেয্যাথ মাণৰা.

২৭০. ‘‘‘আসীৰিসো যথা ঘোরো, মিগরাজাৰ কেসরী;

মত্তোৰ কুঞ্জরো দন্তী, এৰং বুদ্ধা দুরাসদা.

২৭১. ‘‘‘উক্কাসিতঞ্চ খিপিতং, অজ্ঝুপেক্খিয মাণৰা;

পদে পদং নিক্খিপন্তা, উপেথ বুদ্ধসন্তিকং.

২৭২. ‘‘‘পটিসল্লানগরুকা, অপ্পসদ্দা দুরাসদা;

দুরূপসঙ্কমা বুদ্ধা, গরূ হোন্তি সদেৰকে.

২৭৩. ‘‘‘যদাহং পঞ্হং পুচ্ছামি, পটিসম্মোদযামি ৰা;

অপ্পসদ্দা তদা হোথ, মুনিভূতাৰ তিট্ঠথ.

২৭৪. ‘‘‘যং সো দেসেতি সম্বুদ্ধো [সদ্ধম্মং (সী. স্যা.)], খেমং নিব্বানপত্তিযা;

তমেৰত্থং নিসামেথ, সদ্ধম্মসৰনং সুখং’.

২৭৫. ‘‘উপসঙ্কম্ম সম্বুদ্ধং, সম্মোদিং মুনিনা অহং;

তং কথং ৰীতিসারেত্ৰা, লক্খণে উপধারযিং.

২৭৬. ‘‘লক্খণে দ্ৰে চ কঙ্খামি, পস্সামি তিংসলক্খণে;

কোসোহিতৰত্থগুয্হং, ইদ্ধিযা দস্সযী মুনি.

২৭৭. ‘‘জিৰ্হং নিন্নামযিত্ৰান, কণ্ণসোতে চ নাসিকে;

পটিমসি নলাটন্তং, কেৰলং ছাদযী জিনো.

২৭৮. ‘‘তস্সাহং লক্খণে দিস্ৰা, পরিপুণ্ণে সব্যঞ্জনে;

বুদ্ধোতি নিট্ঠং গন্ত্ৰান, সহ সিস্সেহি পব্বজিং.

২৭৯. ‘‘সতেহি তীহি সহিতো, পব্বজিং অনগারিযং;

অদ্ধমাসে অসম্পত্তে, সব্বে পত্তাম্হ নিব্বুতিং.

২৮০. ‘‘একতো কম্মং কত্ৰান, পুঞ্ঞক্খেত্তে অনুত্তরে;

একতো সংসরিত্ৰান, একতো ৰিনিৰত্তযুং.

২৮১. ‘‘গোপানসিযো দত্ৰান, পূগধম্মে ৰসিং অহং;

তেন কম্মেন সুকতেন, অট্ঠ হেতূ লভামহং.