৮. আযাগদাযকত্থেরঅপদানং

৯৪. ‘‘নিব্বুতে লোকনাথম্হি, সিখিম্হি ৰদতং ৰরে;

হট্ঠো হট্ঠেন চিত্তেন, অৰন্দিং থূপমুত্তমং.

৯৫. ‘‘ৰড্ঢকীহি কথাপেত্ৰা, মূলং দত্ৰানহং তদা;

হট্ঠো হট্ঠেন চিত্তেন, আযাগং কারপেসহং.

৯৬. ‘‘অট্ঠ কপ্পানি দেৰেসু, অব্বোকিণ্ণং [অব্বোচ্ছিন্নং (সী.)] ৰসিং অহং;

অৰসেসেসু কপ্পেসু, ৰোকিণ্ণং সংসরিং অহং.

৯৭. ‘‘কাযে ৰিসং ন কমতি, সত্থানি ন চ হন্তি মে;

উদকেহং ন মিয্যামি, আযাগস্স ইদং ফলং.

৯৮. ‘‘যদিচ্ছামি অহং ৰস্সং, মহামেঘো পৰস্সতি;

দেৰাপি মে ৰসং এন্তি, পুঞ্ঞকম্মস্সিদং ফলং.

৯৯. ‘‘সত্তরতনসম্পন্নো, তিসক্খত্তুং অহোসহং;

ন মং কেচাৰজানন্তি, পুঞ্ঞকম্মস্সিদং ফলং.

১০০. ‘‘একত্তিংসে ইতো কপ্পে, আযাগং যমকারযিং;

দুগ্গতিং নাভিজানামি, আযাগস্স ইদং ফলং.

১০১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আযাগদাযকো থেরো ইমা গাথাযো অভাসিত্থাতি.

আযাগদাযকত্থেরস্সাপদানং অট্ঠমং.