৫. মোঘরাজত্থেরঅপদানং

৬৪. ‘‘অত্থদস্সী তু ভগৰা, সযম্ভূ অপরাজিতো;

ভিক্খুসঙ্ঘপরিব্যূল়্হো, রথিযং পটিপজ্জথ.

৬৫. ‘‘সিস্সেহি সম্পরিৰুতো, ঘরম্হা অভিনিক্খমিং;

নিক্খমিত্ৰানহং তত্থ, অদ্দসং লোকনাযকং.

৬৬. ‘‘অভিৰাদিয সম্বুদ্ধং, সিরে কত্ৰান অঞ্জলিং;

সকং চিত্তং পসাদেত্ৰা, সন্থৰিং লোকনাযকং.

৬৭. ‘‘যাৰতা রূপিনো সত্তা, অরূপী ৰা অসঞ্ঞিনো;

সব্বে তে তৰ ঞাণম্হি, অন্তো হোন্তি সমোগধা.

৬৮. ‘‘সুখুমচ্ছিকজালেন, উদকং যো পরিক্খিপে;

যে কেচি উদকে পাণা, অন্তোজালে ভৰন্তি তে.

৬৯. ‘‘যেসঞ্চ চেতনা অত্থি, রূপিনো চ অরূপিনো;

সব্বে তে তৰ ঞাণম্হি, অন্তো হোন্তি সমোগধা.

৭০. ‘‘সমুদ্ধরসিমং লোকং, অন্ধকারসমাকুলং;

তৰ ধম্মং সুণিত্ৰান, কঙ্খাসোতং তরন্তি তে.

৭১. ‘‘অৰিজ্জানিৰুতে লোকে, অন্ধকারেন ওত্থটে;

তৰ ঞাণম্হি জোতন্তে, অন্ধকারা পধংসিতা.

৭২. ‘‘তুৰং চক্খূসি সব্বেসং, মহাতমপনূদনো;

তৰ ধম্মং সুণিত্ৰান, নিব্বাযতি বহুজ্জনো.

৭৩. ‘‘পুটকং পূরযিত্ৰান [পীঠরং (সী.), পুতরং (স্যা.)], মধুখুদ্দমনেল়কং;

উভো হত্থেহি পগ্গয্হ, উপনেসিং মহেসিনো.

৭৪. ‘‘পটিগ্গণ্হি মহাৰীরো, সহত্থেন মহা ইসী;

ভুঞ্জিত্ৰা তঞ্চ সব্বঞ্ঞূ, ৰেহাসং নভমুগ্গমি.

৭৫. ‘‘অন্তলিক্খে ঠিতো সত্থা, অত্থদস্সী নরাসভো;

মম চিত্তং পসাদেন্তো, ইমা গাথা অভাসথ.

৭৬. ‘‘‘যেনিদং থৰিতং ঞাণং, বুদ্ধসেট্ঠো চ থোমিতো;

তেন চিত্তপ্পসাদেন, দুগ্গতিং সো ন গচ্ছতি.

৭৭. ‘‘‘চতুদ্দসঞ্চক্খত্তুং [চতুসট্ঠিঞ্চ (স্যা.)] সো, দেৰরজ্জং করিস্সতি;

পথব্যা রজ্জং অট্ঠসতং, ৰসুধং আৰসিস্সতি.

৭৮. ‘‘‘পঞ্চেৰ সতক্খত্তুঞ্চ [অথ পঞ্চসতক্খত্তুং (সী.)], চক্কৰত্তী ভৰিস্সতি;

পদেসরজ্জং অসঙ্খেয্যং, মহিযা কারযিস্সতি.

৭৯. ‘‘‘অজ্ঝাযকো মন্তধরো, তিণ্ণং ৰেদান পারগূ;

গোতমস্স ভগৰতো, সাসনে পব্বজিস্সতি.

৮০. ‘‘‘গম্ভীরং নিপুণং অত্থং, ঞাণেন ৰিচিনিস্সতি;

মোঘরাজাতি নামেন, হেস্সতি সত্থু সাৰকো.

৮১. ‘‘‘তীহি ৰিজ্জাহি সম্পন্নং, কতকিচ্চমনাসৰং;

গোতমো সত্থৰাহগ্গো, এতদগ্গে ঠপেস্সতি’.

৮২. ‘‘হিত্ৰা মানুসকং যোগং, ছেত্ৰান ভৰবন্ধনং;

সব্বাসৰে পরিঞ্ঞায, ৰিহরামি অনাসৰো.

৮৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মোঘরাজো থেরো ইমা গাথাযো অভাসিত্থাতি;

মোঘরাজত্থেরস্সাপদানং পঞ্চমং.