১. অৰটফলদাযকত্থেরঅপদানং

১. ‘‘সতরংসি নাম ভগৰা, সযম্ভূ অপরাজিতো;

ৰিৰেককামো সম্বুদ্ধো, গোচরাযাভিনিক্খমি.

২. ‘‘ফলহত্থো অহং দিস্ৰা, উপগচ্ছিং নরাসভং;

পসন্নচিত্তো সুমনো, অৰটং [অৰণ্টং (সী.), অম্বটং (স্যা.)] অদদিং ফলং.

৩. ‘‘চতুন্নৰুতিতো কপ্পে, যং ফলমদদিং অহং;

দুগ্গতিং নাভিজানামি, ফলদানস্সিদং ফলং.

৪. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

৫. ‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অৰটফলদাযকো থেরো ইমা গাথাযো অভাসিত্থাতি.

অৰটফলদাযকত্থেরস্সাপদানং পঠমং.