২. পাটলিপুপ্ফিযত্থেরঅপদানং

৬. ‘‘ৰিপস্সী নাম ভগৰা, সযম্ভূ অগ্গপুগ্গলো;

পুরক্খতো সসিস্সেহি, পাৰিসি বন্ধুমং জিনো.

৭. ‘‘তীণি পাটলিপুপ্ফানি, উচ্ছঙ্গে ঠপিতানি মে;

সীসং ন্হাযিতুকামোৰ, নদীতিত্থং অগচ্ছহং.

৮. ‘‘নিক্খম্ম বন্ধুমতিযা, অদ্দসং লোকনাযকং;

ইন্দীৰরংৰ জলিতং, আদিত্তংৰ হুতাসনং.

৯. ‘‘ব্যগ্ঘূসভংৰ পৰরং, অভিজাতংৰ কেসরিং;

গচ্ছন্তং সমণানগ্গং, ভিক্খুসঙ্ঘপুরক্খতং.

১০. ‘‘তস্মিং পসন্নো [সমণে (ক.)] সুগতে, কিলেসমলধোৰনে;

গহেত্ৰা তীণি পুপ্ফানি, বুদ্ধসেট্ঠং অপূজযিং.

১১. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাটলিপুপ্ফিযো থেরো ইমা গাথাযো অভাসিত্থাতি.

পাটলিপুপ্ফিযত্থেরস্সাপদানং দুতিযং.