৩. তীণুপ্পলমালিযত্থেরঅপদানং

১৩. ‘‘চন্দভাগানদীতীরে, অহোসিং ৰানরো তদা;

অদ্দসং ৰিরজং বুদ্ধং, নিসিন্নং পব্বতন্তরে.

১৪. ‘‘ওভাসেন্তং দিসা সব্বা, সালরাজংৰ ফুল্লিতং;

লক্খণব্যঞ্জনূপেতং, দিস্ৰানত্তমনো অহং.

১৫. ‘‘উদগ্গচিত্তো সুমনো, পীতিযা হট্ঠমানসো;

তীণি উপ্পলপুপ্ফানি, মত্থকে অভিরোপযিং.

১৬. ‘‘পূজযিত্ৰান পুপ্ফানি, ফুস্সস্সাহং মহেসিনো;

সগারৰো ভৰিত্ৰান, পক্কামিং উত্তরামুখো.

১৭. ‘‘গচ্ছন্তো পটিকুটিকো, ৰিপ্পসন্নেন চেতসা;

সেলন্তরে পতিত্ৰান, পাপুণিং জীৰিতক্খযং.

১৮. ‘‘তেন কম্মেন সুকতেন, চেতনাপণিধীহি চ;

জহিত্ৰা পুরিমং জাতিং, তাৰতিংসমগচ্ছহং.

১৯. ‘‘সতানং তীণিক্খত্তুঞ্চ, দেৰরজ্জমকারযিং;

সতানং পঞ্চক্খত্তুঞ্চ, চক্কৰত্তী অহোসহং.

২০. ‘‘দ্ৰেনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তীণুপ্পলমালিযো থেরো ইমা গাথাযো অভাসিত্থাতি.

তীণুপ্পলমালিযত্থেরস্সাপদানং ততিযং.