৩৬. সদ্দসঞ্ঞকৰগ্গো

১. সদ্দসঞ্ঞকত্থেরঅপদানং

১. ‘‘মিগলুদ্দো পুরে আসিং, অরঞ্ঞে কাননে অহং;

তত্থদ্দসাসিং সম্বুদ্ধং, দেৰসঙ্ঘপুরক্খতং.

২. ‘‘চতুসচ্চং পকাসেন্তং, উদ্ধরন্তং মহাজনং;

অস্সোসিং মধুরং ৰাচং, করৰীকরুদোপমং [রুতোপমং (?)].

৩. ‘‘ব্রহ্মসরস্স মুনিনো, সিখিনো লোকবন্ধুনো;

ঘোসে চিত্তং পসাদেত্ৰা, পত্তোম্হি আসৰক্খযং.

৪. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, পসাদস্স ইদং ফলং.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সদ্দসঞ্ঞকো থেরো ইমা গাথাযো অভাসিত্থাতি.

সদ্দসঞ্ঞকত্থেরস্সাপদানং পঠমং.

২. যৰকলাপিযত্থেরঅপদানং

৬. ‘‘নগরে অরুণৰতিযা, আসিং যৰসিকো তদা;

পন্থে দিস্ৰান সম্বুদ্ধং, যৰকলাপং সন্থরিং [যৰকলাপমৰত্থরিং (সী.)].

৭. ‘‘অনুকম্পকো কারুণিকো, সিখী লোকগ্গনাযকো;

মম সঙ্কপ্পমঞ্ঞায, নিসীদি যৰসন্থরে.

৮. ‘‘দিস্ৰা নিসিন্নং ৰিমলং, মহাঝাযিং ৰিনাযকং;

পামোজ্জং জনযিত্ৰান, তত্থ কালঙ্কতো অহং.

৯. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, যৰত্থরে ইদং ফলং.

১০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যৰকলাপিযো থেরো ইমা গাথাযো অভাসিত্থাতি.

যৰকলাপিযত্থেরস্সাপদানং দুতিযং.

৩. কিংসুকপূজকত্থেরঅপদানং

১১. ‘‘কিংসুকং পুপ্ফিতং দিস্ৰা, পগ্গহেত্ৰান অঞ্জলিং;

বুদ্ধং সরিত্ৰা সিদ্ধত্থং, আকাসে অভিপূজযিং.

১২. ‘‘চতুন্নৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিংসুকপূজকো থেরো ইমা গাথাযো অভাসিত্থাতি.

কিংসুকপূজকত্থেরস্সাপদানং ততিযং.

৪. সকোসককোরণ্ডদাযকত্থেরঅপদানং

১৪. ‘‘অক্কন্তঞ্চ পদং দিস্ৰা, সিখিনো লোকবন্ধুনো;

একংসং অজিনং কত্ৰা, পদসেট্ঠং অৰন্দহং.

১৫. ‘‘কোরণ্ডং পুপ্ফিতং দিস্ৰা, পাদপং ধরণীরুহং;

সকোসকং [সকোটকং (সী. স্যা.)] গহেত্ৰান, পদচক্কং অপূজযিং.

১৬. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, পদপূজাযিদং ফলং.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সকোসক [সকোটক (সী. স্যা.)] কোরণ্ডদাযকো থেরো ইমা গাথাযো অভাসিত্থাতি.

সকোসককোরণ্ডদাযকত্থেরস্সাপদানং চতুত্থং.

৫. দণ্ডদাযকত্থেরঅপদানং

১৮. ‘‘কাননং ৰনমোগয্হ, ৰেল়ুং ছেত্ৰানহং তদা;

আলম্বনং করিত্ৰান, সঙ্ঘস্স অদদং অহং.

১৯. ‘‘তেন চিত্তপ্পসাদেন, সুব্বতে অভিৰাদিয;

আলম্বনম্পি দত্ৰান, পক্কামিং উত্তরামুখো.

২০. ‘‘চতুন্নৰুতিতো কপ্পে, যং দণ্ডমদদিং তদা;

দুগ্গতিং নাভিজানামি, দণ্ডদানস্সিদং ফলং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দণ্ডদাযকো থেরো ইমা গাথাযো অভাসিত্থাতি.

দণ্ডদাযকত্থেরস্সাপদানং পঞ্চমং.

৬. অম্বযাগুদাযকত্থেরঅপদানং

২২. ‘‘সতরংসী নাম সম্বুদ্ধো, সযম্ভূ অপরাজিতো;

ৰুট্ঠহিত্ৰা সমাধিম্হা, ভিক্খায মমুপাগমি.

২৩. ‘‘পচ্চেকবুদ্ধং দিস্ৰান, অম্বযাগুং অদাসহং;

ৰিপ্পসন্নমনং তস্স, ৰিপ্পসন্নেন চেতসা.

২৪. ‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, অম্বযাগুযিদং ফলং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বযাগুদাযকো থেরো ইমা গাথাযো অভাসিত্থাতি.

অম্বযাগুদাযকত্থেরস্সাপদানং ছট্ঠং.

৭. সুপুটকপূজকত্থেরঅপদানং

২৬. ‘‘দিৰাৰিহারা নিক্খন্তো, ৰিপস্সী লোকনাযকো;

ভিক্খায ৰিচরন্তো সো, মম সন্তিকুপাগমি.

২৭. ‘‘ততো পতীতো সুমনো, বুদ্ধসেট্ঠস্স তাদিনো;

লোণসুপুটকং দত্ৰা, কপ্পং সগ্গম্হি মোদহং.

২৮. ‘‘একনৰুতিতো কপ্পে, যং পুটকমদাসহং;

দুগ্গতিং নাভিজানামি, পুটকস্স ইদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুপুটকপূজকো থেরো ইমা গাথাযো অভাসিত্থাতি.

সুপুটকপূজকত্থেরস্সাপদানং সত্তমং.

৮. মঞ্চদাযকত্থেরঅপদানং

৩০. ‘‘ৰিপস্সিনো ভগৰতো, লোকজেট্ঠস্স তাদিনো;

একং মঞ্চং মযা দিন্নং, পসন্নেন সপাণিনা.

৩১. ‘‘হত্থিযানং অস্সযানং, দিব্বযানং সমজ্ঝগং;

তেন মঞ্চকদানেন, পত্তোম্হি আসৰক্খযং.

৩২. ‘‘একনৰুতিতো কপ্পে, যং মঞ্চমদদিং তদা;

দুগ্গতিং নাভিজানামি, মঞ্চদানস্সিদং ফলং.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মঞ্চদাযকো থেরো ইমা গাথাযো অভাসিত্থাতি.

মঞ্চদাযকত্থেরস্সাপদানং অট্ঠমং.

৯. সরণগমনিযত্থেরঅপদানং

৩৪. ‘‘আরুহিম্হ তদা নাৰং, ভিক্খু চাজীৰকো চহং;

নাৰায ভিজ্জমানায, ভিক্খু মে সরণং অদা.

৩৫. ‘‘একত্তিংসে ইতো কপ্পে, যঞ্চ মে সরণং অদা;

দুগ্গতিং নাভিজানামি, সরণাগমনে ফলং.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সরণগমনিযো থেরো ইমা গাথাযো অভাসিত্থাতি.

সরণগমনিযত্থেরস্সাপদানং নৰমং.

১০. পিণ্ডপাতিকত্থেরঅপদানং

৩৭. ‘‘তিস্সো নামাসি সম্বুদ্ধো, ৰিহাসি ৰিপিনে তদা;

তুসিতা হি ইধাগন্ত্ৰা, পিণ্ডপাতং অদাসহং.

৩৮. ‘‘সম্বুদ্ধমভিৰাদেত্ৰা, তিস্সং নাম মহাযসং;

সকং চিত্তং পসাদেত্ৰা, তুসিতং অগমাসহং.

৩৯. ‘‘দ্ৰেনৰুতে ইতো কপ্পে, যং দানমদদিং তদা;

দুগ্গতিং নাভিজানামি, পিণ্ডপাতস্সিদং ফলং.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পিণ্ডপাতিকো থেরো ইমা গাথাযো অভাসিত্থাতি.

পিণ্ডপাতিকত্থেরস্সাপদানং দসমং.

সদ্দসঞ্ঞকৰগ্গো ছত্তিংসতিমো.