৩৭. মন্দারৰপুপ্ফিযৰগ্গো

১. মন্দারৰপুপ্ফিযত্থেরঅপদানং

১. ‘‘তাৰতিংসা ইধাগন্ত্ৰা, মঙ্গলো নাম মাণৰো;

মন্দারৰং গহেত্ৰান, ৰিপস্সিস্স মহেসিনো.

২. ‘‘সমাধিনা নিসিন্নস্স, মত্থকে ধারযিং অহং;

সত্তাহং ধারযিত্ৰান, দেৰলোকং পুনাগমিং.

৩. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মন্দারৰপুপ্ফিযো থেরো ইমা গাথাযো অভাসিত্থাতি.

মন্দারৰপুপ্ফিযত্থেরস্সাপদানং পঠমং.

২. কক্কারুপুপ্ফিযত্থেরঅপদানং

৫. ‘‘যামা দেৰা ইধাগন্ত্ৰা, গোতমং সিরিৰচ্ছসং;

কক্কারুমালং [গোক্খনুমালং (সী.)] পগ্গয্হ, বুদ্ধস্স অভিরোপযিং.

৬. ‘‘দ্ৰেনৰুতে ইতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কক্কারুপুপ্ফিযো [গোক্খনুপুপ্ফিযো (ক.)] থেরো ইমা গাথাযো অভাসিত্থাতি.

কক্কারুপুপ্ফিযত্থেরস্সাপদানং দুতিযং.

৩. ভিসমুল়ালদাযকত্থেরঅপদানং

৮. ‘‘ফুস্সো নামাসি সম্বুদ্ধো, সব্বধম্মান পারগূ;

ৰিৰেককামো সব্বঞ্ঞূ [সপ্পঞ্ঞো (সী. স্যা.)], আগঞ্ছি মম সন্তিকে.

৯. ‘‘তস্মিং চিত্তং পসাদেত্ৰা, মহাকারুণিকে জিনে;

ভিসমুল়ালং পগ্গয্হ, বুদ্ধসেট্ঠস্সদাসহং.

১০. ‘‘দ্ৰেনৰুতে ইতো কপ্পে, যং ভিসমদদিং তদা;

দুগ্গতিং নাভিজানামি, ভিসদানস্সিদং ফলং.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভিসমুল়ালদাযকো থেরো ইমা গাথাযো অভাসিত্থাতি.

ভিসমুল়ালদাযকত্থেরস্সাপদানং ততিযং.

৪. কেসরপুপ্ফিযত্থেরঅপদানং

১২. ‘‘ৰিজ্জাধরো তদা আসিং, হিমৰন্তম্হি পব্বতে;

অদ্দসং ৰিরজং বুদ্ধং, চঙ্কমন্তং মহাযসং.

১৩. ‘‘তীণি কেসরপুপ্ফানি [কেসরিপুপ্ফানি (সী.)], সীসে কত্ৰানহং তদা;

উপসঙ্কম্ম সম্বুদ্ধং, ৰেস্সভুং অভিপূজযিং.

১৪. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

১৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কেসরপুপ্ফিযো থেরো ইমা গাথাযো অভাসিত্থাতি.

কেসরপুপ্ফিযত্থেরস্সাপদানং চতুত্থং.

৫. অঙ্কোলপুপ্ফিযত্থেরঅপদানং

১৬. ‘‘পদুমো নাম সম্বুদ্ধো, চিত্তকূটে ৰসী তদা;

দিস্ৰান তং অহং বুদ্ধং, সযম্ভুং অপরাজিতং [উপগচ্ছিহং (সী. স্যা.)].

১৭. ‘‘অঙ্কোলং পুপ্ফিতং দিস্ৰা, ওচিনিত্ৰানহং তদা;

উপগন্ত্ৰান সম্বুদ্ধং, পূজযিং পদুমং জিনং.

১৮. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অঙ্কোলপুপ্ফিযো থেরো ইমা গাথাযো অভাসিত্থাতি.

অঙ্কোলপুপ্ফিযত্থেরস্সাপদানং পঞ্চমং.

৬. কদম্বপুপ্ফিযত্থেরঅপদানং

২০. ‘‘সুৰণ্ণৰণ্ণং সম্বুদ্ধং, গচ্ছন্তং অন্তরাপণে;

কঞ্চনগ্ঘিযসঙ্কাসং, বাত্তিংসৰরলক্খণং.

২১. ‘‘নিসজ্জ পাসাদৰরে, অদ্দসং লোকনাযকং;

কদম্বপুপ্ফং পগ্গয্হ, ৰিপস্সিং অভিপূজযিং.

২২. ‘‘একনৰুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কদম্বপুপ্ফিযো থেরো ইমা গাথাযো অভাসিত্থাতি.

কদম্বপুপ্ফিযত্থেরস্সাপদানং ছট্ঠং.

৭. উদ্দালকপুপ্ফিযত্থেরঅপদানং

২৪. ‘‘অনোমো [সুজাতো (স্যা.), অনুমো (ক.)] নাম সম্বুদ্ধো, গঙ্গাকূলে ৰসী তদা;

উদ্দালকং গহেত্ৰান, পূজযিং অপরাজিতং.

২৫. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদ্দালকপুপ্ফিযো থেরো ইমা গাথাযো অভাসিত্থাতি.

উদ্দালকপুপ্ফিযত্থেরস্সাপদানং সত্তমং.

৮. একচম্পকপুপ্ফিযত্থেরঅপদানং

২৭. ‘‘উপসন্তো চ সম্বুদ্ধো, ৰসতী পব্বতন্তরে;

একচম্পকমাদায, উপগচ্ছিং নরুত্তমং.

২৮. ‘‘পসন্নচিত্তো সুমনো, পচ্চেকমুনিমুত্তমং;

উভোহত্থেহি পগ্গয্হ, পূজযিং অপরাজিতং.

২৯. ‘‘পঞ্চসট্ঠিম্হিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একচম্পকপুপ্ফিযো থেরো ইমা গাথাযো অভাসিত্থাতি.

একচম্পকপুপ্ফিযত্থেরস্সাপদানং অট্ঠমং.

৯. তিমিরপুপ্ফিযত্থেরঅপদানং

৩১. ‘‘চন্দভাগানদীতীরে, অনুসোতং ৰজামহং;

অদ্দসং ৰিরজং বুদ্ধং, সালরাজংৰ ফুল্লিতং.

৩২. ‘‘পসন্নচিত্তো সুমনো, পচ্চেকমুনিমুত্তমং;

গহেত্ৰা তিমিরং পুপ্ফং, মত্থকে ওকিরিং অহং.

৩৩. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিমিরপুপ্ফিযো থেরো ইমা গাথাযো অভাসিত্থাতি.

তিমিরপুপ্ফিযত্থেরস্সাপদানং নৰমং.

১০. সল়লপুপ্ফিযত্থেরঅপদানং

৩৫. ‘‘চন্দভাগানদীতীরে, অহোসিং কিন্নরো তদা;

তত্থদ্দসং দেৰদেৰং, চঙ্কমন্তং নরাসভং.

৩৬. ‘‘ওচিনিত্ৰান সল়লং, পুপ্ফং বুদ্ধস্সদাসহং;

উপসিঙ্ঘি মহাৰীরো, সল়লং দেৰগন্ধিকং.

৩৭. ‘‘পটিগ্গহেত্ৰা সম্বুদ্ধো, ৰিপস্সী লোকনাযকো;

উপসিঙ্ঘি মহাৰীরো, পেক্খমানস্স মে সতো.

৩৮. ‘‘পসন্নচিত্তো সুমনো, ৰন্দিত্ৰা দ্ৰিপদুত্তমং;

অঞ্জলিং পগ্গহেত্ৰান, পুন পব্বতমারুহিং.

৩৯. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সল়লপুপ্ফিযো থেরো ইমা গাথাযো অভাসিত্থাতি.

সল়লপুপ্ফিযত্থেরস্সাপদানং দসমং.

মন্দারৰপুপ্ফিযৰগ্গো সত্ততিংসতিমো.