৫. নল়াগারিকত্থেরঅপদানং

৩১. ‘‘হিমৰন্তস্সাৰিদূরে, হারিতো নাম পব্বতো;

সযম্ভূ নারদো নাম, রুক্খমূলে ৰসী তদা.

৩২. ‘‘নল়াগারং করিত্ৰান, তিণেন ছাদযিং অহং;

চঙ্কমং সোধযিত্ৰান, সযম্ভুস্স অদাসহং.

৩৩. ‘‘চতুদ্দসসু কপ্পেসু, দেৰলোকে রমিং অহং;

চতুসত্ততিক্খত্তুঞ্চ, দেৰরজ্জং অকারযিং.

৩৪. ‘‘চতুসত্ততি [সত্তসত্ততি (সী.)] ক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

৩৫. ‘‘উব্বিদ্ধং ভৰনং ময্হং, ইন্দলট্ঠীৰ উগ্গতং;

সহস্সথম্ভং অতুলং, ৰিমানং সপভস্সরং.

৩৬. ‘‘দ্ৰে সম্পত্তী অনুভোত্ৰা, সুক্কমূলেন চোদিতো;

গোতমস্স ভগৰতো, সাসনে পব্বজিং অহং.

৩৭. ‘‘পধানপহিতত্তোম্হি, উপসন্তো নিরূপধি;

নাগোৰ বন্ধনং ছেত্ৰা, ৰিহরামি অনাসৰো.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নল়াগারিকো থেরো ইমা গাথাযো অভাসিত্থাতি.

নল়াগারিকত্থেরস্সাপদানং পঞ্চমং.