৪. একদুস্সদাযকত্থেরঅপদানং

১৯. ‘‘নগরে হংসৰতিযা, অহোসিং তিণহারকো;

তিণহারেন জীৰামি, তেন পোসেমি দারকে.

২০. ‘‘পদুমুত্তরো নাম জিনো, সব্বধম্মান পারগূ;

তমন্ধকারং নাসেত্ৰা, উপ্পজ্জি লোকনাযকো.

২১. ‘‘সকে ঘরে নিসীদিত্ৰা, এৰং চিন্তেসহং তদা;

‘বুদ্ধো লোকে সমুপ্পন্নো, দেয্যধম্মো চ নত্থি মে.

২২. ‘‘‘ইদং মে সাটকং একং, নত্থি মে কোচি দাযকো;

দুক্খো নিরযসম্ফস্সো, রোপযিস্সামি দক্খিণং’.

২৩. ‘‘এৰাহং চিন্তযিত্ৰান, সকং চিত্তং পসাদযিং;

একং দুস্সং গহেত্ৰান, বুদ্ধসেট্ঠস্সদাসহং.

২৪. ‘‘একং দুস্সং দদিত্ৰান, উক্কুট্ঠিং সম্পৰত্তযিং;

যদি বুদ্ধো তুৰং ৰীর, তারেহি মং মহামুনি.

২৫. ‘‘পদুমুত্তরো লোকৰিদূ, আহুতীনং পটিগ্গহো;

মম দানং পকিত্তেন্তো, অকা মে অনুমোদনং.

২৬. ‘‘‘ইমিনা একদুস্সেন, চেতনাপণিধীহি চ;

কপ্পসতসহস্সানি, ৰিনিপাতং ন গচ্ছতি.

২৭. ‘‘‘ছত্তিংসক্খত্তুং দেৰিন্দো, দেৰরজ্জং করিস্সতি;

তেত্তিংসক্খত্তুং রাজা চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

২৮. ‘‘‘দেৰলোকে মনুস্সে ৰা, সংসরন্তো তুৰং ভৰে;

রূপৰা গুণসম্পন্নো, অনৰক্কন্তদেহৰা;

অক্খোভং অমিতং দুস্সং, লভিস্সসি যদিচ্ছকং’.

২৯. ‘‘ইদং ৰত্ৰান সম্বুদ্ধো, জলজুত্তমনামকো;

নভং অব্ভুগ্গমী ধীরো, হংসরাজাৰ অম্বরে.

৩০. ‘‘যং যং যোনুপপজ্জামি, দেৰত্তং অথ মানুসং;

ভোগে মে ঊনতা নত্থি, একদুস্সস্সিদং ফলং.

৩১. ‘‘পদুদ্ধারে পদুদ্ধারে, দুস্সং নিব্বত্ততে মমং;

হেট্ঠা দুস্সম্হি তিট্ঠামি, উপরি ছদনং মম.

৩২. ‘‘চক্কৰাল়মুপাদায, সকাননং সপব্বতং;

ইচ্ছমানো চহং অজ্জ, দুস্সেহি ছাদযেয্যহং.

৩৩. ‘‘তেনেৰ একদুস্সেন, সংসরন্তো ভৰাভৰে;

সুৰণ্ণৰণ্ণো হুত্ৰান, সংসরামি ভৰাভৰে.

৩৪. ‘‘ৰিপাকং একদুস্সস্স, নজ্ঝগং কত্থচিক্খযং;

অযং মে অন্তিমা জাতি, ৰিপচ্চতি ইধাপি মে.

৩৫. ‘‘সতসহস্সিতো কপ্পে, যং দুস্সমদদিং তদা;

দুগ্গতিং নাভিজানামি, একদুস্সস্সিদং ফলং.

৩৬. ‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদুস্সদাযকো থেরো ইমা গাথাযো অভাসিত্থাতি.

একদুস্সদাযকত্থেরস্সাপদানং চতুত্থং.